مەملەكەتتىڭ قوسىمشا قۇن سالىعى سوماسىن قايتارۋى – قازاقستانداعى عانا ەمەس, الەمدەگى سالىقتىق اكىمشىلەندىرۋدىڭ ەڭ وزەكتى ماسەلەلەرىنىڭ ءبىرى. مەملەكەت ءۇشىن تاۋار, جۇمىس, كورسەتىلەتىن قىزمەتتەردىڭ ناقتى قوزعالىسىن باقىلاۋ, سونىمەن بىرگە ءار كەزەڭدە تولەنگەن قوسىمشا قۇن سالىعىن ەسەپتەپ وتىرۋ وتە قيىن. سالىق تولەۋدەن جالتارۋدىڭ ءتۇرلى سحەماسى مەن وزگە دە تاسىلدەرىنىڭ سالدارىنان قوسىمشا قۇن سالىعىن نەگىزسىز وتەۋ تاۋەكەلدەرىن تۋدىرىپ, بيۋدجەتكە شىعىن اكەلەدى.
– وتاندىق سالىق تولەۋشىلەر ءۇشىن قولدانىستاعى ءتارتىپ قوسىمشا قۇن سالىعى سوماسىن قايتارۋ ءىس-شارالارى مەرزىمدەرىنىڭ نەگىزسىز سوزىلۋىنا, قايتارۋعا جاتاتىن قوسىمشا قۇن سالىعىنىڭ ەلەۋلى بولىگىنىڭ جوعالۋىنا, وزگە دە سالىقتىق تاۋەكەلدەردىڭ تۋىنداۋىنا اكەپ سوقتىرادى, – دەيدى «اتامەكەن» ۇلتتىق كاسىپكەرلەر پالاتاسى باسقارما توراعاسىنىڭ كەڭەسشىسى ەكاتەرينا نيكيتينسكايا.
بۇگىندە قاناتقاقتى جوبا اياسىندا قاتىسۋشىلار قوسىمشا قۇن سالىعى سوماسىنىڭ جىلدام قايتارىلۋىنا مۇمكىندىك الدى. سونداي-اق سالىق ورگاندارى قانداي دا ءبىر اكىمشىلىك جانە ەكونوميكالىق سانكتسيالاردى قولدانباي جەتكىزۋشىلەرمەن «سالىقتىق الشاقتىقتاردى» دەربەس رەتتەۋ قۇقىعىنا يە بولدى. تىزبەكتەر بويىنشا ورىن العان سالىقتىق بۇزۋشىلىقتار تۋرالى اقپارات كامەرالدىق باقىلاۋ شەڭبەرىندە مەملەكەتتىك كىرىستەر كوميتەتىنە ۇسىنىلۋى ءتيىس.
– جوباعا مەموراندۋم جاساسقان استىق نارىعىنىڭ قاتىسۋشىلارى تارتىلادى. ولار مەملەكەتتىك كىرىستەر ورگاندارىنىڭ سالىقتىق قۇپيانى قۇرايتىن «سالىقتىق الشاقتىقتار» بويىنشا مالىمەتتەردى جاريا ەتۋ, تاراتۋ جانە ءۇشىنشى تۇلعالارعا بەرۋىنە جازباشا رۇقسات بەرەدى. كاسىپكەرلەر ءۇشىن جوبانىڭ سالىقتىق اكىمشىلىك ءىس-قيمىلداردىڭ اشىقتىعىن قامتاماسىز ەتۋگە ارنالعانى وتە ماڭىزدى. سالىق سوماسىن قايتارۋ كوشپەلى تەكسەرۋلەرسىز كامەرالدىق باقىلاۋ رەجىمىندە جۇزەگە اسىرىلادى جانە بيزنەستىڭ ءوزىن ءوزى رەتتەۋ قاعيداتتارىنا كوشۋىنە مۇمكىندىك بەرەدى, – دەيدى قازاقستان استىق وداعىنىڭ توراعاسى نۇرلان وسپانوۆ.
مەموراندۋم اگروونەركاسىپكە جانە ساباقتاس سالالارعا ىسكەرلىك اينالىمنىڭ اشىق تاجىريبەلەرىن ەنگىزۋ, باسەكەلەستىكتى دامىتۋ, نارىقتىڭ ءوزىن ءوزى رەتتەۋدىڭ تيىمدىلىگىن قامتاماسىز ەتۋ, بيزنەس پەن مەملەكەتتىك قۇرىلىمنىڭ ديالوگ قۇرۋىن كوزدەيدى.
قوسىمشا قۇن سالىعىن وڭاي تارتىپپەن قايتارۋ ءۇشىن قاتىسۋشىلار ەكى نۇسقانىڭ ءبىرىن تاڭداي الادى. ءبىرىنشى نۇسقا بويىنشا بانك كەپىلدىگى بولعان جاعدايدا 15 جۇمىس كۇنى ىشىندە قوسىمشا قۇن سالىعى قايتارىلادى. ەكىنشى نۇسقا بويىنشا كامەرالدىق باقىلاۋ راسىمدەرى اياقتالعاننان كەيىن بىردەن ساتىپ الۋشى مەن ءونىم بەرۋشى اراسىنداعى «سالىقتىق الشاقتىقتار» جوق نەمەسە جويىلعان كەزەڭدە قوسىمشا قۇن سالىعىن قايتارۋدى ۇسىنۋ جوسپارلانعان.
ەسكە سالا كەتەيىك, 2019 جىلعى قازاندا قارجى مينيسترلىگى جانە «اتامەكەن» ۇلتتىق كاسىپكەرلەر پالاتاسىنىڭ باستاماسىمەن تاجىريبە الماسۋ ماقساتىندا نۇر-سۇلتاندا رەسەيدىڭ فەدەرالدى سالىق قىزمەتى جانە اگروونەركاسىپ حارتياسى وكىلدەرىنىڭ ساپارى ۇيىمداستىرىلدى. «اتامەكەن» جۇرگىزگەن تالقىلاۋلار مەن كونسۋلتاتسيالار ناتيجەسىندە قازاقستاننىڭ استىق وداعى جانە مەملەكەتتىك كىرىستەر كوميتەتى بىرلەسىپ, اگروونەركاسىپتەگى قوسىمشا قۇن سالىعىنىڭ ارتىلعان سوماسىن وڭايلاتىلعان جولمەن قايتارۋ بويىنشا قاناتقاقتى جوبانى ىسكە اسىرۋ بويىنشا جۇمىستى باستادى. بۇل رەتتە ءبىزدىڭ ماماندار رەسەيدە ءتورت جىلدان بەرى جۇمىس ىستەپ كەلە جاتقان حارتيا ءتيپى بويىنشا ادال سالىق تولەۋشىلەردى اشىق اقپاراتتاندىرۋ جۇيەسىنە ەرەكشە قىزىعۋشىلىق تانىتتى. رەسەيدە العاشقى حارتيا 2017 جىلعى مامىردا اگروونەركاسىپ سالاسىندا قۇرىلعان جانە ونىڭ تاجىريبەسى قازىرگى ۋاقىتتا نارىقتىڭ باسقا سەگمەنتتەرىنە ءساتتى تارالۋدا.
