جاسىل جايلاۋدا اۋناپ-كۇلگەن ادام سول ءبىر اياۋلى ءساتتى ماڭگىلىك تۇمارىنداي جانىندا ساقتارى انىق. ونىڭ ۇستىنە وشاق باسىنداعى ىستىق كۇلشەنىڭ ءيىسى الەمنىڭ بارلىق اتىرىنەن قىمبات. جانىڭدى جىلىتادى, مەيىرىم توگەدى. سۋرەتشىلەر وداعىنىڭ مۇشەسى, بەلگىلى سۋرەتشى جاڭاتاي شاردەنوۆتىڭ «تاڭەرتەڭ» كارتيناسى ءبىزدى سول بەيمارال شاقتارمەن قايتا قاۋىشتىرعانداي.
قىلقالام شەبەرى تابيعات سۋرەتىن سالۋعا قۇشتار. ونىسى ەرەكشە شىعادى. تۋىندىلارىنىڭ كوپشىلىگى تىكەلەي تابيعاتتىڭ وزىندە جازىلعان. ونىڭ جۇمىستارىن بوياۋدى اياماي جاعۋىنا, نازىك ۇيلەستىرىلگەن تۇستەرگە, باتىل كوڭىل كۇيگە قاراپ وڭاي تانۋعا بولادى. ەڭ عاجابى, ول اشىق كۇلگىن, قوڭىر-جيرەن, كوگىلدىر-سۇر, بوز-جاسىل سىندى تۇستەردىڭ كۇردەلى ۇيلەسىمىنىڭ نازىك ساۋلەسىنەن وزىنە تارتىپ الاتىن سۇلۋلىقتى كورە ءبىلدى.
باقساڭىز, «تاڭەرتەڭ» كارتيناسىنىڭ تۇكپىرىنە كيىز ءۇيدىڭ قاسىنداعى پەشكە اس دايىنداپ جاتقان ايەلدى بەينەلەي وتىرىپ, جايلاۋداعى قازاق ءومىرىنىڭ تىنىشتىعى مەن بەرەكەسىن جەتكىزگەن. الىستا تاۋدىڭ ەتەگىندە شوپاننىڭ سۇلباسى مەن قالىڭ شوپكە جا-يىلىپ جۇرگەن مال بايقالادى. كارتينانىڭ الدىڭعى پلانىنداعى جاسىل ءشوپ باسەڭدەپ بارىپ كوكجيەكتەگى قار باسقان كوگىلدىر تاۋلارعا باياۋ اۋىسادى.
اۆتور كارتينانى اشىق تۇستەردەن قاشا وتىرىپ, وزىنە ءتان قالىپتا بوياۋدى جالپاق قارقىندى تەحنيكامەن قالىڭ ەتىپ جاعۋ ارقىلى جازعان. جەلدىڭ تولقىنىنان شوپتەر تەربەتىلىپ تۇرعانداي اسەر بەرەدى. ۇلكەن كەڭىستىك پەن تازا اۋا سەزەتىندەيسىز.
جاڭاتاي شاردەنوۆتىڭ كارتينالارىنا قاراعان سايىن ودان ونىڭ جانى, مەيىرىمدىلىگى, ۇيلەسىمدىلىككە, تابيعاتقا ۇمتىلىسى, تۋعان جەرىنە دەگەن سۇيىسپەنشىلىگى سەزىلەدى.
