17 جەلتوقساندا «كراسينەتس» باۋ-باقشا سەرىكتەستىگى اۋماعىندا بەلگىسىز جانۋاردىڭ شابۋىلىنان كەيىن 7 جاسار قىز قايتىس بولعان ەدى. العان جاراقاتتارىنا قاراپ, قىزعا جانۋار شابۋىل جاساعانى بەلگىلى بولدى. قايعىلى وقيعادان كەيىن ماماندار بۇرالقى يتتەردى اتۋعا شەشىم شىعاردى.
قاڭعىباس يتتەر توتەنشە جاعداي بولعان لەسحوز اۋىلىندا ۇستالا باستادى. سونىمەن قاتار, بۇل جۇمىستى بۇكىل قالا بويىنشا جۇرگىزۋ جوسپارلانىپ وتىر.
كەيىنگى ءۇش كۇندە 85 يت اتىلعانى انىقتالدى. وسكەمەندە وسى ماقساتقا بيىل 17 ميلليون تەڭگە, وبلىس بويىنشا 80 ميلليون تەڭگەدەن اسا قاراجات جۇمسالعان.
تەلەارنا مالىمەتىنشە, جىل باسىنان بەرى وڭىردە 24 مىڭنان اسا قاڭعىباس يت پەن مىسىق جويىلعان. زووتەحنيكتەر مۇنداي شاراعا قارسى, بىراق ۆەتەريناريا باسقارماسى قازىر باسقا شەشىم جوق ەكەنىن مالىمدەدى.
«كەيبىر كەزدە ازاماتتار مەن جانۋارلار قۇقىعىن قورعاۋشىلار قارسىلىق كورسەتەدى. الايدا قاڭعىباس يت ءبىر ادامعا ەمەس, قوعامعا قاۋىپتى. سوندىقتان بۇل جۇمىستى ۋچاسكەلىك ينسپەكتورلارمەن بىرگە جالعاستىرىپ جاتىرمىز», دەپ ءتۇسىندىردى شىعىس قازاقستان وبلىسى ۆەتەريناريا باسقارماسىنىڭ باسشىسى ەرتاي باتحولدين.
