تاعىلىمدى شاراعا حالىقارالىق تۇركى اكادەمياسىنىڭ پرەزيدەنتى دارحان قىدىرالى, قىرعىز ۇلتتىق عىلىم اكادەمياسىنىڭ پرەزيدەنتى مۋرات جۋماتاەۆ, قىرعىز رەسپۋبليكاسى پرەزيدەنتىنىڭ كەڭەسشىسى ارسلان كويچيەۆ, قىرعىز رەسپۋبليكاسىنىڭ جوگوركۋ كەنەش دەپۋتاتى كانىبەك يماناليەۆ, ش. ايتماتوۆ اتىنداعى ءتىل جانە ادەبيەت ينستيتۋتى ديرەكتورى ابدىلداجان اكماتاليەۆ, تانىمال قىرعىز تاريحشىسى زاينيدين كۋرمانوۆ, سونىمەن قاتار مەملەكەت جانە قوعام قايراتكەرلەرى مەن زيالى قاۋىم وكىلدەرى قاتىستى.
ايتا كەتۋ كەرەك, قاسىم تىنىستانوۆتىڭ 1925 جىلى قازاق جانە قىرعىز تىلدەرىندە جارىق كورگەن «قاسىم جىرلارى» اتتى كىتابى تۇركى اكادەمياسى تاراپىنان تۇرىك تىلىنە تولىق اۋدارىلىپ, فاكسيميلەسىمەن قوسا اكادەميالىق جيناق رەتىندە جاريانىپ وتىر. بىرەگەي باسىلىمداعى جىرلار قىرعىزشا لاتىن الىپبيىندە جانە تۇرىكشە اۋدارماسىمەن قاتارلاستىرا بەرىلگەن.
سونىمەن قاتار ساياسي تۇلعا ءجۇسىپ ابدراحمانوۆ تۋرالى قازاقستان رەسپۋبليكاسى ورتالىق مەملەكەتتىك ءارحيۆى, قازاقستان رەسپۋبليكاسى پرەزيدەنتىنىڭ ءارحيۆى, قر ورتالىق مەملەكەتتىك كينو-فوتوقۇجاتتار مەن دىبىس جازبالار ءارحيۆى قورلارىنداعى قۇندى تاريحي ماتەريالدارى توپتاستىرىلعان جيناق وقىرمانعا جول تارتتى.
جيىن سوڭىندا قازاق-قىرعىز عىلىمي بايلانىستارىن نىعايتۋداعى بەلسەندى ەڭبەگى ءۇشىن ارسلان كويچيەۆ, كانىبەك يماناليەۆ, زاينيدين كۋرمانوۆ, تۇركى اكادەمياسىنىڭ التىن مەدالىمەن, اينۋرا كادىرمانبەتوۆا, ايدا كۋباتوۆا, تاميلا ماماتوۆا كۇمىس مەدالىمەن, ال نەگيزبەك شابداناليەۆ پەن ميرگۇل تەكەشوۆا قۇرمەت گراموتاسىمەن ماراپاتتالدى.
