«2019 جىلدان باستاپ اۋدان اكىمدەرى جانە قۇزىرلى باسقارمالارمەن بىرلەسىپ, ەلوردا اۋماعىندا يەسىز قالعان نىسانداردى انىقتاۋ, تىركەۋ جۇمىسى جالعاسىپ كەلەدى. وتكەن جىلى جالپى سوماسى 2 ملرد 878 ملن تەڭگەنىڭ يەسىز قالعان 680 نىسان جانە 60 بىرلىك ترانسفورماتورلىق قوسالقى ستانتسياسى كوممۋنالدىق مەنشىككە قابىلداندى. بيىل 158 يەسىز نىسان انىقتالدى. ونىڭ سوماسى 1,8 ملرد تەڭگەنى قۇرايدى», دەدى ەرسىن وتەباەۆ قالالىق ءماسليحاتتىڭ قوعامدىق كەڭەسىنىڭ وتىرىسىندا.
باسقارما باسشىسىنىڭ مالىمدەۋىنشە, سوڭعى 2 جىلدىڭ ىشىندە ەلوردا اۋماعىندا قاراۋسىز جاتقان 886 نىسان انىقتالىپ, كوممۋنالدىق مەنشىك رەتىندە قابىلدانىپتى.
«اتاپ ايتقاندا, 180 شاقىرىم ەلەكترمەن جابدىقتاۋ نىسانى, 34 شاقىرىم سۋمەن جابدىقتاۋ, 90 شاقىرىم كارىز جەلىسى, 59 شاقىرىم جىلۋمەن جابدىقتاۋ جەلىسى جانە 2227 قۇدىق بار», دەيدى ول.
