كينوتۋىندىنىڭ قويۋشى رەجيسسەرى ءارى ستسەناري اۆتورى جاڭابەك جەتىرۋوۆ. ءفيلمدى قر مادەنيەت جانە سپورت مينيسترلىگىنىڭ تاپسىرىسى بويىنشا ش.ايمانوۆ اتىنداعى «قازاقفيلم» كينوستۋدياسى تۇسىرگەن.
ءابىش كەكىلباەۆتىڭ پوۆەسى «شىڭىراۋدىڭ» جەلىسى بويىنشا تۇسىرىلگەن كارتينا قۇدىق قازۋشى ەڭسەپتىڭ وقيعاسىن بايانداي وتىرىپ, مەنمەندىك, باقتالاستىق, ماحاببات, دوستىق, قاستاندىق سىندى ادامعا ءتان قۇبىلىستاردى كوتەرەدى.
«وسىدان تۋرا ون جىل بۇرىن, ەل تاۋەلسىزدىگىنىڭ 20 جىلدىعىنا وراي استانا قالاسىندا جاڭابەك اعامىز تۇسىرگەن, زامانىمىزدىڭ زاڭعار جازۋشىسى ءابىش كەكىلباەۆتىڭ شىعارماشىلىق جولىنا ارنالعان دەرەكتى ءفيلمنىڭ تۇساۋكەسەرىن وتكىزىپ ەدىك. ەندى مىنە, ءابىش اعامىزدىڭ پوۆەسى جەلىسىمەن تۇسىرىلگەن تاماشا كوركەم ءفيلمنىڭ تۇساۋكەسەرىنە جينالىپ وتىرمىز. ارينە, پاندەميا بولماسا, بۇل فيلم تالاي فەستيۆالدەردە جۇلدەلى ورىنداردان كورىنەتىن ەدى. سوعان قاراماستان, «شىڭىراۋ» ءفيلمى 10-عا جۋىق حالىقارالىق بەدەلدى كينوفەستيۆالگە قاتىسىپ, كورەرمەن مەن كينوسىنشىلاردىڭ ىقىلاسىنا بولەندى», دەدى «قازاقفيلمنىڭ» ۆيتسە-پرەزيدەنتى ايدارحان ادىلباەۆ.
ء«فيلمنىڭ تۇساۋكەسەرىن 2019 جىلى ناۋرىز ايىندا وتكىزەمىز دەپ جوسپارلاپ ەدىك, الايدا پاندەمياعا بايلانىستى باسقا كۇنگە اۋىستىرۋعا تۋرا كەلدى. ءتىپتى ءبىزدىڭ ءفيلمدى العان كەيبىر فەستيۆالدەر دە وتكىزىلمەي قالدى. بۇگىنگى تۇساۋكەسەردى ۇيىمداستىرۋعا قول ۇشىن سوزعان, «قازاقفيلمگە» جانە قازاق ونەرى مەن مادەنيەتىنىڭ مەتسەناتى جاۋعاشتى نابيەۆكە العىسىمدى بىلدىرەمىن», دەدى ءفيلمنىڭ رەجيسسەرى جاڭابەك جەتىرۋوۆ.
«بۇل پوۆەست 1982 جىلى جازىلعان بولاتىن. كوپتەگەن رەجيسسەرلەر تۇسىرەمىز دەپ ۇمىتتەنىپ ەدى, ناتيجەسىندە جاڭابەك اعامىز قولعا الدى. ول كىسى اتامىزبەن بىرنەشە رەت كەزدەسىپ, ستسەناريدىڭ العاشقى نۇسقاسىن وزىنە ماقۇلداتقان بولاتىن. وكىنىشكە قاراي, اتامىز ءفيلمدى ءتۇسىرۋ جۇمىسى باستالعانىن كورمەي كەتتى. 2019 جىلى استانادا «ەۋرازيا» حالىقارالىق كينوفەستيۆالىنىڭ باعدارلاماسىندا «شىڭىراۋ» ءفيلمى العاش رەت كورسەتىلدى», دەدى جازۋشىنىڭ نەمەرەسى ابىل كەكىلباەۆ.
ەستەرىڭىزگە سالا كەتەيىك, ءفيلمنىڭ ءتۇسىرىلىمى ماڭعىستاۋ وبلىسىندا ءوتتى. كارتينادا قاراقيا ويىسى, ءۇستىرت شوقىسى جانە كاسپي تەڭىزى كورىنىس تابادى. فيلمدەگى باستى رولدەردى اسىلحان تولەپوۆ, الدابەك شالباەۆ جانە ايجان جەتىرۋ سومدادى.
كينوتۋىندى داككا قالاسىندا وتكەن 17-ءشى حالىقارالىق فەستيۆال شەڭبەرىندە العاش رەت كورسەتىلدى (بانگلادەش, 2019). بۇل فەستيۆالدە وتاندىق تۋىندى «ۇزدىك وپەراتورلىق جۇمىس» (وپەراتورى ريۆكات يبراگيموۆ) جۇلدەسىن جەڭىپ العانىن ايتا كەتكەن ءجون. سونىمەن قاتار «شىڭىراۋ» ءفيلمى 37-ءشى حالىقارالىق فادجر كينوفەستيۆالدىڭ (يران, ءساۋىر, 2019 ج.), 28-ءشى بۇكىلقىتايلىق «التىن اتەش جانە ءجۇز گۇل» اتتى كينوفەستيۆالى (قىتاي, قاراشا, 2019 ج.), Asian International Film Festival Arizona كينوفەستيۆالدىڭ (اقش, جەلتوقسان, 2019 ج.), Kaaryat International Film Festival of India فەستيۆالدىڭ ء(ۇندىستان, جەلتوقسان, 2019 ج.), 24-ءشى حالىقارالىق كەرالا كينوفەستيۆالدىڭ ء(ۇندىستان, جەلتوقسان, 2019 ج.), 13-ءشى حالىقارالىق Sofia MENAR Film Festival (بولگاريا, قاڭتار, 2021 ج.) سىندى باسقا دا كينوفەستيۆالدەردىڭ كونكۋرستىق باعدارلاماسىنا قاتىستى.
ودان بولەك, بۇل فيلم 2019 جىلى زاڭعار جازۋشى, كورنەكتى مەملەكەت جانە قوعام قايراتكەرى ءابىش كەكىلباەۆتىڭ 80 جىلدىعىنا وراي ماسكەۋدە قازاقستاندىق كينو كۇندەرى اياسىندا كورسەتىلگەن بولاتىن.
