مەملەكەت باسشىسىنىڭ تاپسىرماسى بويىنشا بيىل ەلوردادا قولجەتىمدى جەڭىلدىكتى تۇرعىن ءۇي سانى 10 مىڭ پاتەرگە دەيىن ۇلعايتىلدى.
جاڭا قونىستانۋشىلارعا كىلتتەردى ەلوردا اكىمىنىڭ ورىنباسارى نۇرلان نۇركەنوۆ تابىس ەتتى. ۇيلەر ەسىل اۋدانىندا ورنالاسقان (ە34 جانە ە44 كوشەلەرىندە).
«تاۋەلسىزدىكتىڭ 30 جىلدىعى كۇنى قالانىڭ جاڭا اۋدانىندا جاڭا پاتەرلەردىڭ كىلتىن تاپسىرۋ مەن ءۇشىن ۇلكەن قۇرمەت. بۇگىن وسى ءۇيدىڭ ماڭىندا ءبىز ەڭ زاماناۋي جابدىقتارمەن جابدىقتالعان 4 مىڭ وقۋشىعا ارنالعان BINOM مەكتەبىن اشتىق. ارينە, بۇل اۋداندا ءالى كوپ جۇمىس بار. ينجەنەرلىك ينفراقۇرىلىم بويىنشا جۇمىستاردى جالعاستىرامىز, جولدار مەن وتپە جولداردى, قوعامدىق كولىك جۇمىسىن ۇيىمداستىرامىز. بىراق, ەڭ الدىمەن, ءبىز جۇرت ءومىر ءسۇرىپ, بالالارىن وقىتا الۋى ءۇشىن تۇرعىن ءۇي مەن مەكتەپ اشامىز.
بولاشاقتا بۇل اۋدان ەلورداداعى ەڭ جايلى ورىنداردىڭ بىرىنە اينالاتىنىنا سەنىمدىمىن. بارشاڭىزعا اماندىق, دەنساۋلىق, باقىت, تابىس تىلەيمىن! قونىس تويى قۇتتى بولسىن!», دەدى نۇرلان نۇركەنوۆ كىلتتەردى تاپسىرۋ كەزىندە.
قونىس يەلەرىن «وتباسى بانك» اق ورتالىق فيليالى ديرەكتورىنىڭ ورىنباسارى جانار ىزىمبەتوۆا دا قۇتتىقتادى.
«سىزدەردى قازاقستان رەسپۋبليكاسىنىڭ تاۋەلسىزدىك كۇنىمەن, سونداي-اق قونىس تويلارىڭىزبەن قۇتتىقتايمىن! جاڭا ۇيلەرىڭىزدە بەرەكە مەن مولشىلىق بولسىن! قۇرمەتتى قونىس يەلەرى, سىزدەردى جاڭا باسپانالارىڭىزبەن قۇتتىقتايمىن! ۇيلەرىڭىزگە جىلۋلىق, دەنساۋلىق جانە جايلىلىق تىلەيمىن!», دەدى ول.
بيبىگۇل تۇراباەۆا ەلوردادا 2007 جىلدان بەرى تۇرعىن ءۇي كەزەگىندە تۇر. بۇگىن ول باسپانالى بولعان باقىتتى جانداردىڭ قاتارىندا.
«مەن ەلوردا تۇرعىنىمىن, №1 بالالار اۋرۋحاناسىندا مەدبيكە بولىپ جۇمىس ىستەيمىن. 2007 جىلدان باستاپ تۇرعىن ءۇي كەزەگىندە تۇرمىن. بۇگىن مەرەكە كۇنى باسپانالى بولىپ وتىرمىن. وسىنداي ماڭىزدى وقيعا بۇگىن بولعانىنا قۋانىشتىمىن. قازاقستاننىڭ بارلىق ازاماتىن تاۋەلسىزدىكتىڭ 30 جىلدىعىمەن قۇتتىقتايمىن! بارشاڭىزعا بەيبىتشىلىك, جاقسىلىق تىلەيمىن!», دەپ قۋانىشىمەن ءبولىستى بيبىگۇل تۇراباەۆا.
ءلاززات جانپەيىسوۆا ءۇشىن بۇگىن قوس مەرەكە – ونىڭ بالالارى بۇگىن قونىس تويىن تويلاپ جاتىر.
مەملەكەت باسشىسىنىڭ تاپسىرماسى بويىنشا ەلوردادا قولجەتىمدى جەڭىلدىكتى تۇرعىن ءۇي كولەمىن ۇلعايتۋ بويىنشا جۇيەلى جۇمىس جۇرگىزىلۋدە. بيىل نۇر-سۇلتاندا 10 مىڭ جەڭىلدىكتى الەۋمەتتىك پاتەر سالىندى. تەك سوڭعى ءۇش جىلدا قولجەتىمدى تۇرعىن ءۇي سانى 5,5 ەسەگە ارتتى.
مىسالى, 2018 جىلى 1800 الەۋمەتتىك پاتەر بەرىلگەن بولسا, 2019 جىلى – 2 900 الەۋمەتتىك پاتەر, 2020 جىلى – 7 000-نان استام پاتەر سالىنىپ, پايدالانۋعا بەرىلدى. بيىلعى مەجە – 10 000 الەۋمەتتىك پاتەر
سونىمەن قاتار, ەلباسىنىڭ باستاماسىمەن قولعا الىنعان «جۇمىس ىستەيتىن جاستارعا جالعا بەرىلەتىن تۇرعىن ءۇي» باعدارلاماسى بيىل دا جالعاسىن تابادى; سول سياقتى جاستارعا ارنالعان Elorda Jastary ارنايى تۇرعىن ءۇي باعدارلاماسى ىسكە قوسىلدى.
