ورتالىقتىڭ اشىلۋىنا نۇر-سۇلتان قالاسى اكىمىنىڭ ورىنباسارى اسحات ورالوۆ قاتىستى.
«تاۋەلسىزدىك كۇنى قۇتتى بولسىن! اتا-انالار مەن بالالاردى بۇگىنگى مەرەكەمەن شىن جۇرەكتەن قۇتتىقتايمىن! 30 جىل ىشىندە ءبىز ۇلكەن جەتىستىكتەرگە جەتتىك. بىراق وزەكتى ماسەلەلەر ءالى دە كوپ. سوندىقتان ءبىز ونىڭ دا شەشىمىن تابۋ ءۇشىن بىرىگىپ جۇمىس ىستەگىمىز كەلەدى. ءاربىر جانۇياعا زور دەنساۋلىق, اماندىق جانە تابىس تىلەيمىن!», دەدى ا.ورالوۆ.
ايتا كەتەيىك, جوبانى ەلوردا اكىمدىگى مەن «باقىتتى شاڭىراق» قورى جۇزەگە اسىردى.
«تەڭ قوعام» ورتالىعى مۇگەدەك بالالارى بار وتباسىلار ءۇشىن ارنايى اشىلدى. جاڭا تۋعان بالالار مەن 18 جاسقا دەيىنگى بالالارعا كومەكتەسەمىز. مۇندا بىلىكتى ماماندار بار. ورتالىقتا سەگىز اسسيستەنت جۇمىس ىستەيدى. ولار ءار وتباسىنىڭ جاعدايىن بىلەدى جانە ولارعا كومەكتەسەدى», دەدى «تەڭ قوعام» ورتالىعىنىڭ جەتەكشىسى سالتانات راقىشەۆا.
ورتالىقتى اشۋدىڭ ماڭىزدىلىعىن اتا-انالار دا اتاپ ءوتتى. بۇل ورتالىق كوپشىلىك ءۇشىن ۇلكەن كومەك بولىپ سانالادى, ويتكەنى مۇندا بالالار لوگوپەدتەرمەن, پسيحولوگتارمەن تەگىن جۇمىس ىستەيدى, ساۋىقتىرۋ ماسساجىن, ەمدىك دەنە شىنىقتىرۋدى الادى جانە مونتەسسوري ادىستەمەسى بويىنشا وقىتىلادى.
ەلوردادا وڭالتۋ ورتالىقتارىنىڭ جەلىسى ايتارلىقتاي كەڭەيتىلدى. بيىل جازدا كورۋ قابىلەتى بۇزىلعان بالالارعا ارنالعان مامانداندىرىلعان بالاباقشا اشىلدى. قالا اۋداندارىندا 29 «ۇيدەگى دارىگەر» نىسانى اشىلدى, ينۆاتاكسي سانى 2 ەسە ارتتى.
جاڭا ۇيلەردىڭ ءبىرىنشى قاباتىندا «قادامدىق قولجەتىمدىلىك» قاعيداتى بويىنشا بالالارعا ارنالعان شاعىن ورتالىقتار, وڭالتۋ ورتالىقتارى, بالاباقشالار, مەديتسينالىق ورتالىقتار جانە ت.ب. اشىلادى. بۇدان باسقا, وتكەن جىلى ەلوردادا بتسپ, اۋتيزم, داۋن سيندرومى جانە ت.ب. دياگنوزدارى بار بالالاردى وڭالتۋمەن اينالىساتىن بىرقاتار ءىرى وڭالتۋ ورتالىقتارى اشىلدى. مىسالى, «اسىل ميراس» جاڭا اۋتيزم ورتالىعى, بۇل اۋتيستىك سپەكتردىڭ اۋرۋلارى بار بالالاردى 50%-عا كوبىرەك قامتۋعا مۇمكىندىك بەردى. تۇڭعىش پرەزيدەنت قورى مەن «سامۇرىق-قازىنا» اق قولداۋىمەن №1 قالالىق بالالار اۋرۋحاناسى بازاسىندا وتكەن جىلدىڭ كۇزىندە «قامقورلىق» وڭالتۋ ورتالىعى اشىلدى. ول جىل سايىن سال اۋرۋىنا شالدىققان 600-گە جۋىق بالانى تەگىن مەديتسينالىق كومەكپەن قامتۋعا مۇمكىندىك بەرەدى.
