ءمادريدتىڭ «رەالى» ءبىراز ۋاقىتتان بەرى كيلليانعا كوز تىككەنى بەلگىلى. پاريجدىك كلۋبتىڭ باسشىلىعىنا «قۇدا ءتۇسىپ» كوڭىلى قالعان كورولدىك كلۋب پرەزيدەنتى فلورەنتينو پەرەس ەندى 2022 جىلدى اسىعا كۇتىپ وتىر. تەك 2022 جىلدىڭ قاي مەزگىلىندە دەگەن عانا ساۋال كۇن تارتىبىندە تۇر. ءدال قازىر مباپپەنىڭ پاريجدىكتەرمەن كەلىسىمشارتىنىڭ اياقتالۋىنا ءبىر جىلدان از ۋاقىت قالدى. ال جىل بۇرىن فرانتسيالىق كوماندا باسشىلارى فۋتبولشىنى 160 ميلليون ەۋروعا جىبەرمەي قويعان ەدى. سوعان قاراعاندا كيلليان كەلىسىم شارتى اياقتالعان كەزدە, ياعني, 2022 جىلدىڭ جازىندا «رەالدىڭ» جەيدەسىن كيەتىن شىعار. الايدا كلۋب باسشىلارى فۋتبولشىنى قاڭتار ايىندا ساتىپ الۋعا دا تىرىسۋى مۇمكىن.
«مانچەستەر سيتي» فۋتبولشىسى فەرران توررەستىڭ اعىلشىن كلۋبىمەن كەلىسىم شارتى 2025 جىلعا دەيىن ەكەنى بەلگىلى. الايدا فۋتبولشى قاڭتار ايىندا يسپانيالىق «بارسەلونانىڭ» ساپىنا اۋىسۋى ىقتيمال. فۋتبولشىنىڭ ءوزى «بارسەلونادا» ويناعىسى كەلەتىنىن ايتقان بولاتىن. ءوز كەزەگىندە كاتالونيالىق كلۋب جەتەكشىلەرى دە توررەستى اسىعا توسىپ وتىرعانىن جەتكىزگەن.
«مانچەستەر يۋنايتەد» فۋتبولشىسى پول پوگبانىڭ كلۋب اۋىستىرۋى ىقتيمال دەگەن اڭگىمە تاراعالى دا ءبىراز جىل بولدى. بۇل اڭگىمەلەرگە نۇكتە قويىلاتىن كەز كەلگەن سەكىلدى. ماۋسىم سوڭىندا پوگبانىڭ اعىلشىن كلۋبىمەن كەلىسىمشارتى اياقتالادى. يسپانيانىڭ «رەالى», يتاليانىڭ «يۋۆەنتۋسى» جانە پاريجدىك «پسج» فۋتبولشىنى قاتارىنا قوسۋدان ءۇمىتتى.
«بارسەلونا» ساپىندا ءارتۇرلى ماۋسىمدا ءبىرتۇرلى ويىن ورنەگىن كورسەتكەن ۋسمان دەمبەلەنى «توتتەنحەم» مەن «يۋۆەنتۋس» فۋتبول كلۋبتارى قۇشاق جايا قارسى الۋعا ءازىر. ايتكەنمەن ول «نيۋكاسلعا» بارۋى ابدەن مۇمكىن. كاتالوندىق كلۋبتىڭ باپكەرلىك قۇرامى دەمبەلەنىڭ ءتارتىبىن جاقتىرمايتىنىن, فۋتبولشىنىڭ كەلىسىمشارتىنىڭ كەلەسى جىلى اياقتالاتىنىن ەسكەرسەك, ۋسماننىڭ كلۋب اۋىستىراتىنى تالاس تۋدىرمايدى.
«ناپولي» ساپىندا جاسىنداي جارقىراپ جۇرگەن لورەنتسو ينسينەنىڭ دە كوماندا اۋىستىراتىن ۋاقىتى جاقىنداپ قالدى. كلۋب باسشىلارىنىڭ جاڭا ەرەجەسىنە كوڭىلى تولماي جۇرگەن فۋتبولشى ءوزى ۇزاق جىل نامىسىن قورعاعان «ناپوليدەن» كەتەتىن سەكىلدى. ويتكەنى ول جالاقىسىنىڭ تومەندەگەنىن قالامايدى. فۋتبولشىعا «ينتەر», «چەلسي», «توتتەنحەم», «نيۋكاسل» كوماندالارى قىزىعۋشىلىق تانىتىپ وتىر.
