«بۇگىن تاڭەرتەڭ دۇنيەجۇزىلىك مەتەورولوگيالىق ۇيىم رەسەيدىڭ ۆەرحويانسك قالاسىندا اركتيكالىق تەمپەراتۋرا رەكوردى - تسەلسي بويىنشا 38 گرادۋس نەمەسە فارەنگەيت شكالاسى بويىنشا 100,4 بولعانىن مويىندادى. ول وتكەن جىلدىڭ 20 ماۋسىمىندا تىركەلگەن», دەدى دۇنيەجۇزىلىك مەتەورولوگيالىق ۇيىمنىڭ ءباسپاسوز حاتشىسى كلەر نۋلليس.
«بۇل رەكورد بۇكىل سىبىردەگى جىلىنۋدىڭ ايقىن دالەلى», دەدى ايگىلى بريتاندىق كليماتولوگ جانە دمۇ كوميتەتىنىڭ مۇشەسى فيل دجونس.
ۆەرحويانسك پوليار شەڭبەرىنەن سولتۇستىككە قاراي 115 شاقىرىمداي جەردە ورنالاسقان. اركتيكاعا قاراعاندا جەرورتا تەڭىزىنە ءتان جاڭا تەمپەراتۋرا رەكوردى ءسىبىردىڭ ۇزاققا سوزىلعان ىستىق تولقىنى كەزىندە مەتەورولوگيالىق باقىلاۋ ستانتسياسىندا ولشەندى.
ساحا (ياكۋتيا) رەسپۋبليكاسىنىڭ سولتۇستىك بولىگىندە ورنالاسقان ۆەرحويانسك قالاسىنداعى مەتەوستانتسيادا تەمپەراتۋرانى باقىلاۋ 1885 جىلدان بەرى جۇرگىزىلىپ كەلەدى. اتالعان ۇيىم ساراپشىلارى ءسىبىردىڭ اركتيكالىق ايماعىنداعى جازدىڭ جوعارى تەمپەراتۋراسى ورتتەردىڭ كۇشەيۋى مەن تەڭىز مۇزىنىڭ جاپپاي ەرۋىنە اكەلگەنىن اتاپ ءوتتى.
اركتيكاداعى جىلىنۋ 2020 جىلدى تاريحتاعى ەڭ جىلى ءۇش جىلدىڭ بىرىنە اينالدىردى.
