«تاۋەلسىزدىك كۇنى – كۇللى جۇرتىمىز ءۇشىن ۇلىق مەرەكە. ازاتتىعىمىزدىڭ 30 جىلدىعى قارساڭىندا ازاماتتاردىڭ ەڭبەگى ەلەنىپ, مەملەكەت باسشىسى تاراپىنان ءارتۇرلى ماراپات الىپ جاتىر. توككەن تەر مەن تىنىمسىز ەڭبەكتى ەلدىڭ ەڭ جوعارعى باسشىسى ەلەپ جاتسا, ارينە, ول – زور قۋانىش. ماراپات يەلەرىن شىن جۇرەكتەن قۇتتىقتايمىن! ەڭ باستىسى ەلىمىز امان, جۇرتىمىز تىنىش بولعاي!», دەپ جازدى بەرىك ءۋالي.
ەل تاۋەلسىزدىگىنىڭ 30 جىلدىعىنا وراي باق سالاسىندا زور ەڭبەك سىڭىرگەن بىرقاتار جۋرناليست قازاقستان رەسپۋبليكاسى پرەزيدەنتىنىڭ 2021 جىلعى 2 جەلتوقسانداعى جارلىعىنا سايكەس مەملەكەتتىك ماراپاتتارعا يە بولدى.
«قۇرمەت» وردەنىمەن «حابار» اگەنتتىگىنىڭ تەلەجۇرگىزۋشىسى زەيىن الىپبەك پەن «قازاقستان» ۇتا «اپتا» ساراپتامالىق باعدارلاماسىنىڭ جۇرگىزۋشىسى جاينا سلامبەك ناگرادتالدى.
ال, «ەرەن ەڭبەگى ءۇشىن» مەدالىمەن «حابار24» تەلەارناسىنىڭ جۇرگىزۋشىسى اسىلبەك ابدۋلوۆ, جۋرناليست مۇحتار تۇمەنباي جانە «كتك» تەلەارناسىنىڭ جۇرگىزۋشىسى ءمادينا بالعاباەۆا ماراپاتتالدى.
