تۇساۋى كەسىلگەن ارت-البومنىڭ قۇرامىنا نيزامي شىعارمالارىنىڭ نەگىزىندە جارىق كورگەن تانىمال سۋرەتشىلەردىڭ 100-دەن استام جۇمىسى ەنگەن.
ءىس-شارانى ەلباسى كىتاپحاناسىنىڭ ديرەكتورى باقىتجان تەمىربولات اشتى.
«قازاقستاننىڭ تۇڭعىش پرەزيدەنتى نۇرسۇلتان ءابىش ۇلى نازارباەۆ « ۇلى دالانىڭ جەتى قىرى» ماقالاسىندا ء«تول تاريحىن بىلەتىن, باعالايتىن جانە ماقتان ەتەتىن حالىقتىڭ بولاشاعى زور» دەپ اتاپ كورسەتكەن بولاتىن. ەلباسى كىتاپحاناسى تۇركسوي ۇيىمىنىڭ تۇركى الەمىنىڭ ۇلى ويشىلى نيزامي گياندجاۆيدىڭ كوركەم البومىن تانىستىرۋ جونىندەگى باستاماسىن قولدادى. بۇل ەڭبەكتىڭ تۇركى حالىقتارىنىڭ عانا ەمەس, الەم وركەنيەتىنىڭ تاريحىنا, عىلىمى مەن مادەني مۇراسىنا ەلەۋلى ۇلەس قوساتىنىنا سەنىمدىمىن», دەدى ول ءوز سوزىندە.
ازەربايجان رەسپۋبليكاسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى اعالار اتاموعلانوۆ نيزامي گانجاۋي مۇرالارىنىڭ قۇندىلىعىنا توقتالا كەتتى.
«سابىر ءتۇبىن سارى التىن ساناعان نيزامي گانجاۋي ءومىر سىناعىنا تاپ بولعاندارعا تاعىلىم بولاتىنىن بىلگەن. توزىمدىلىك – شاتاسقان ءتۇيىندى شەشەتىن قاسيەت... ەڭبەك ەتكەندى قارا جەر دە قۇر قالدىرمايتىنىن جەتكىزۋگە تىرىسقان ءنيزاميدىڭ قازاق تاريحى مەن مادەنيەتىمەن بايلانىسى تىعىز. ۇلى ويشىلدىڭ شىعارماشىلىعى قازاق ادەبيەتىندە جىل سايىن كوبەيىپ كەلەتىنى ءبىزدى قۋانتادى», دەدى ول.
ايتا كەتسەك, «نيزامي گانجاۋي» ارت-البومىن قۇرۋ يدەياسىنىڭ اۆتورى – تۇركسوي باس حاتشىسى دۇيسەن قاسەيىنوۆ.
«البومعا ەنگەن ءار سۋرەتتىڭ وزىندىك تاريحى بار. باسىلىمنىڭ وقىرمانى مۇمكىندىگىنشە كوپ بولسىن دەپ, البومدى اعىلشىن تىلىندە جارىققا شىعاردىق. مۇنداي ماڭىزدى كىتاپتاردى ءبىز سەريامەن باسۋدى ۇيعاردىق. ولاردىڭ قاتارىندا اباي قۇنانباي ۇلى, ولجاس سۇلەيمەنوۆ, شىڭعىس ايتماتوۆ سىندى ۇلى تۇلعالارعا ارنالعان ەڭبەكتەر بار. بۇگىندە الىشەر ناۋاي, ماقتىمق ۇلى داۋلەتمامەد ۇلىنا ارنالعان البومدار ازىرلەنۋ ۇستىندە. تۇركسوي تۇركى الەمىندەگى كورنەكتى تۇلعالاردىڭ مۇراسىن جاڭعىرتۋدى كوزدەيدى», دەدى دۇيسەن قاسەيىنوۆ.
ىسشاراعا تۇركسوي ۇيىمىنىڭ وكىلدەرى, قازاقستاننىڭ مەملەكەت جانە قوعام قايراتكەرلەرى, ديپلوماتتار مەن عالىمدار, سونداي-اق باق وكىلدەرى قاتىستى.
