سپورت • 14 جەلتوقسان، 2021

تالعاردا بالعىن بالۋاندار بەلدەستى

101 رەت كورسەتىلدى

تاۋەلسىزدىگىمىزدىڭ 30 جىلدىعىنا وراي الماتىنىڭ ىرگەسىندە ورنالاسقان تالعار قالاسىندا قازاق كۇرەسىنەن الەم جانە ازيا چەمپيوناتىنىڭ جۇلدەگەرى، حالىقارالىق دارەجەدەگى سپورت شەبەرى ەركىن سايداقوۆتىڭ جۇلدەسىنە ارنالعان جاسوسپىرىمدەر اراسىندا رەسپۋبليكالىق تۋرنير ءوتتى.

اتالعان جارىسقا ەلىمىزدىڭ 11 وبلىسىنان كەلگەن بارلىعى 25 كوماندا قاتىستى. اشىلۋ سالتاناتىندا تالعار اۋداندىق سپورت باسقارماسىنىڭ باسشىسى امانجول نۇعمانوۆ، اباي اتىنداعى قازۇپۋ ونەر جانە مادەنيەت ينستيتۋتىنىڭ ديرەكتورى توققوجا مۇقاجان ۇلى، گرەك-ريم كۇرەسىنەن كسرو جانە الەم چەمپيونى نۇرتان جۇمابەكوۆ، №2 بالالار سپورت مەكتەبىنىڭ ديرەكتورى ايگۇل ورالبەكقىزى باستاعان قادىرلى قوناقتار قۇتتىقتاۋ سوزدەرىن ايتىپ، بالعىن بالۋاندارعا ساتتىلىك تىلەدى. قۇرمەتتى قوناقتار قاتارىندا ەركىننىڭ اتا-اناسى مۇقاش سايداقوۆ پەن گۇلسارا مۇقانوۆا جانە اۋىر اتلەتيكادان الەم چەمپيونى جاسۇلان قىدىرباەۆ تا بولىپ، بارشا سپورتشىلارعا ىزگى تىلەكتەرىن ءبىلدىردى.

ەكى كۇنگە سوزىلعان جارىس بارىسىندا بالۋاندار 10 سالماق دارەجەسى بويىنشا ءتۇرلى-ءتۇستى مەدالداردى ساراپقا سالدى. جالپى كوماندالىق ەسەپتە شىمكەنت قالاسىنىڭ وكىلدەرى ءبىرىنشى ورىن السا، ەكىنشى ورىنعا قىزىلوردا وبلىسىنىڭ سپورتشىلارى تابان تىرەدى. ال ۇزدىك ۇشتىكتى الماتى قالاسى قورىتىندىلادى. جارىس جەڭىمپازدارى ارنايى ديپلومدار، كۋبوكتار  جانە باعالى سىيلىقتارمەن ماراپاتتالدى.

جارىستىڭ باس تورەشىسى ەرلان يمانعاليەۆتىڭ ايتۋىنشا، مۇنداي ءدۇبىرلى دودالار ءجيى ۇيىمداستىرىلىپ تۇرسا يگى. ويتكەنى، وسىنداي جارىستار ارقىلى جاس بالۋانداردىڭ شەبەرلىگى ارتىپ، پسيحولوگيالىق تۇرعىدان دا شىڭدالا تۇسەدى.

سوڭعى جاڭالىقتار

اينالما جولدىڭ ازابى

ايماقتار • كەشە

ۇقساس جاڭالىقتار