ءماجىلىس توراعاسى نۇرلان نىعماتۋلين اقتوبە وبلىسىنىڭ تۇرعىندارىن ەل ەگەمەندىگىنىڭ مەرەيتويلىق مەرەكەسىمەن قۇتتىقتادى.
وندا ءماجىلىس سپيكەرى قازاقستان تاۋەلسىزدىگىنىڭ 30 جىلدىعى بولاشاققا سەنىممەن قاراۋعا مۇمكىندىك بەرەتىن, ەل تاريحىنداعى ماڭىزدى كەزەڭ ەكەنىن اتاپ ءوتتى. بۇگىن اقتوبەدە ەل مەن ءوڭىردىڭ دامۋىنا ەلەۋلى ۇلەس قوسقان ايماق تۇرعىندارىنا مەملەكەتتىك ناگرادالاردى تاپسىرۋعا ارنالعان سالتاناتتى ءراسىم ءوتتى. قازاقستان پرەزيدەنتىنىڭ تاپسىرماسىمەن ءماجىلىس سپيكەرى نۇرلان نىعماتۋلين اقتوبەلىكتەرگە مەملەكەتتىك ناگرادالاردى تابىس ەتتى.
پالاتا توراعاسى تاۋەلسىزدىك جىلدارىندا اقتوبە ەل ەكونوميكاسىنا ىقپال ەتكەن ءىرى جوبالاردى قولعا العان, الدىڭعى قاتارلى ونەركاسىپتىك ايماققا اينالعانىن, وبلىستان وتەتىن «باتىس ەۋروپا – باتىس قىتاي» حالىقارالىق جولدارى بۇگىندە ەل ەكونوميكاسىنا ەرەكشە سەرپىن بەرگەنىن اتاپ ءوتتى.
«اقتوبە وبلىسى ەلباسى نۇرسۇلتان ءابىش ۇلى نازارباەۆتىڭ قولداۋىمەن, 30 جىلدىڭ ىشىندە تەك ايماقتىڭ عانا ەمەس, جالپى ەلىمىزدىڭ دامۋىنا زور ۇلەس قوسقان نەگىزگى يندۋستريالدىق ولكەگە اينالدى. بۇگىنگى كۇنى مەملەكەت باسشىسى قاسىم-جومارت كەمەل ۇلى توقاەۆتىڭ باستاماسىمەن ەلىمىزدە, سونىڭ ىشىندە, وسى اقتوبەدە جاڭا الەۋمەتتىك-ەكونوميكالىق باعدارلامالار جۇزەگە اسىرىلىپ جاتىر. وسى تاۋەلسىزدىكتىڭ ارقاسىندا كەلگەن تابىستارىمىز الداعى ۋاقىتتا دا ەلىمىزدى, وبلىستاردى جاڭا بيىكتەرگە جەتكىزەتىنى ءسوزسىز», دەدى نۇرلان نىعماتۋلين.
سونىمەن قاتار, ءماجىلىس سپيكەرى اقتوبە وبلىسىندا تاۋەلسىزدىك جىلدارى جالپى ونداعان ماڭىزدى جوبالار جۇزەگە اسىرىلعانىن ايتىپ, «جاسىل» تەحنولوگيالار بەلسەندى جۇرگىزىلىپ جاتقانىن, جىل سايىن اگرارلىق سالادا 1000-عا جۋىق جاڭا شارۋاشىلىق اشىلاتىنىن اتاپ ءوتتى.
ەل مەن وبلىستىڭ الەۋمەتتىك-ەكونوميكالىق جانە مادەني دامۋىنا قوسقان ەلەۋلى ۇلەسى ءۇشىن اقتوبەلىكتەر جوعارى مەملەكەتتىك ناگرادالارعا يە بولدى.
II دارەجەلى «بارىس» وردەنىمەن بەلگىلى قازاقستاندىق عالىم-فيلوسوف, ق. جۇبانوۆ اتىنداعى اقتوبە مەملەكەتتىك ۋنيۆەرسيتەتىنىڭ پروفەسسورى امانگەلدى ايتالى ماراپاتتالدى. «پاراسات» وردەنىمەن-وبلىستىڭ قوعامدىق كەڭەسىنىڭ توراعاسى مارات قويلىباەۆ ماراپاتتالدى. ەڭبەك ارداگەرى بەكارىستان مىرزاباي, وقىتۋشى حالەل قۇسايىنوۆ «قۇرمەت» وردەنىنىڭ يەگەرى اتاندى, ال III دارەجەلى «ەڭبەك داڭقى» وردەنىمەن – تەمىرجولشى قانتورە اۋاش, ۇستا بايعالي ماتاعۇلوۆ, اقتوبە فەرروقورىتپا زاۋىتىنىڭ كرانشىسى گالينا ۋتەشوۆا ماراپاتتالدى.
«ەرەن ەڭبەگى ءۇشىن» مەدالىمەن ماراپاتتالعانداردىڭ قاتارىندا دارىگەرلەر قۋانىشقۇل دۇيسەمبەكوۆا, نۇرلان قاۋقاقوۆ جانە امەت نابيەۆ, جۋرناليستەر ەلەنا اكچۋرينا مەن باياندى سارسەمبينا, وبلىستىق فيلارمونيانىڭ باس ديريجەرى ءمادينا قابيجانوۆا-بيسەنعاليەۆا بار.
«شاپاعات» مەدالىمەن مەدبيكەلەر گۇلبادا بيمانوۆا مەن ولگا كەفەر ماراپاتتالدى. قازاقستان رەسپۋبليكاسىنىڭ «قۇرمەت گراموتاسىمەن» ماراپاتتالعانداردىڭ ىشىندە مۇعالىمدەر باقتىعۇل قويشىعۇلوۆا مەن جاننا حابيبۋللينا, سونداي-اق اقتوبە وبلىستىق فيلارمونياسىنىڭ قازاق كامەرالىق حورى بار.
