اتىراۋلىق ازاماتقا لاڭكەستىك ۇيىمدى قارجىلاندىردى دەگەن ايىپ تاعىلدى

اتىراۋ وبلىسىنداعى ءبىر ازاماتقا لاڭكەستىك ۇيىمدى قارجىلاندىردى دەگەن كۇدىك كەلتىرىلدى. بۇل تۋرالى «استانا» تەلەارناسى حابارلادى. وبلىستىق قارجى پوليتسياسىنىڭ دەرەگىنە جۇگىنسەك, الگى ايىپكەر  «يسلام دجيحات وداعى» ۇيىمىنا الدىمەن 2 مىڭ, كەيىن 3 مىڭ دوللار اۋدارعان كورىنەدى. شەتەلگە اتالعان سومانى «بتا بانكى» اتىراۋ فيليالىنىڭ «Western Union» بانكتىك اۋدارىم قىزمەتى ارقىلى جىبەرىپتى. قارجى Aزيزۋللاح دەگەن ازاماتقا جولدانعان ەكەن. وسىعان بايلانىستى, كۇدىكتىگە تەرروريزمدى جانە ەكسترەميزمدى ناسيحاتتاۋ بابى بويىنشا قىلمىستىق ءىس قوزعالدى. «اتىراۋلىق ازاماتقا بانكتىك اۋدارىم ارقىلى دوللاردى شەتەلگە جىبەرۋ جولىمەن حالىقارالىق تەرروريستىك ۇيىمدى قارجىلاندىردى دەگەن كۇدىك كەلتىرىلدى. قازىر وسىعان قاتىستى قىلمىستىق ءىس تەرگەلۋدە. ال وزگە اقپارات تەرگەۋ مۇددەسىنە بايلانىستى جاريالانبايدى», - دەدى اتىراۋ وبلىسى بويىنشا ەكونوميكالىق قىلمىسقا جانە سىبايلاس جەمقورلىققا قارسى كۇرەس دەپارتامەنتىنىڭ اعا تەرگەۋشىسى دۋلات مادياروۆ. ءامىرحان الماعانبەتوۆ. دەرەككوز: «استانا» تەلەارناسى. فوتو: Ria.ru.