ونەر • 08 جەلتوقسان، 2021

«قازاقفيلم» ماسكەۋدەگى كينو نارىعىنا قاتىسىپ جاتىر

67 رەت كورسەتىلدى

ماسكەۋ حالىقارالىق «رەسەي كينوبيزنەسى» كينو نارىعى جانە فورۋمىنىڭ نەگىزگى ىسكەرلىك باعدارلاماسىنىڭ جۇمىستارىنا قاتىسىپ جاتقان ش.ايمانوۆ اتىنداعى «قازاقفيلم» اق ءوندىرىس جونىندەگى ۆيتسە-پرەزيدەنتى ايدار باتالوۆ ورتالىق ازيا ەلدەرىنىڭ جوبالارىن تانىستىرۋ شەڭبەرىندە كوپشىلىككە ەلىمىزدىڭ باستى كينو الاڭى – «قازاقفيلمدى» تانىستىرىپ، كينوستۋديانىڭ قىزمەتتەرى مەن جاڭا جوبالارى تۋرالى ەگجەي-تەگجەيلى بايانداپ بەردى، دەپ حابارلايدى Egemen.kz.

ايدار باتالوۆ ءوزىنىڭ العى سوزىندە ماسكەۋدەگى كينو نارىقتىڭ ۇيىمداستىرۋشىلارىنا شاقىرعاندارى ءۇشىن العىسىن ايتىپ، بۇگىنگى كۇنى Covid-19 پاندەميا سالدارىنان زارداپ شەككەن كينو ءوندىرىسى ءۇشىن وسىنداي ءىس-شارالاردى وتكىزۋدىڭ ماڭىزدىلىعىن اتاپ ءوتتى.   

سونىمەن قاتار كينوستۋديانىڭ ۆيتسە-پرەزيدەنتى قازاقستان مەن رەسەيدىڭ بىرلەسىپ فيلمدەر شىعارۋ تۋرالى (كو-پرودۋكتسيا)، سونداي-اق رەسەي فەدەراتسياسى اۋماعىندا قازاقستاندىق فيلمدەردىڭ ديستريبۋتسياسى تۋرالى ايتتى.

«قازاقفيلمنىڭ» تاريحى تۋرالى بايانداعان ايدار باتالوۆ، تاۋەلسىزدىك جىلدار ىشىندە كينوستۋديادا 200-دەن استام كوركەم، 300 دەرەكتى، 100 قىسقامەتراجدى جانە 70 انيماتسيالىق فيلم تۇسىرىلگەنى تۋرالى ايتتى. ودان بولەك، ا.باتالوۆ سوڭعى جىلدارى ەكرانعا شىققان «قازاقفيلمنىڭ» جاڭا تۋىندىلارى تۋرالى ءسوز قوزعاپ، كينوستۋديانىڭ الداعى جىلدارعا جوسپارلانعان تۇساۋكەسەرلەر تۋرالى ايتىپ بەردى. پرەزەنتاتسيانىڭ سوڭىندا ايدار باتالوۆ جينالعاندارعا وندىرىستەگى فيلمدەردىڭ ۇزىندىلەرىن كورسەتىپ، رەجيسسەر دانيار قامشىباەۆتىڭ «زەرە» ءفيلمىن تاماشالاۋعا شاقىردى.

«جوعارى دەڭگەيدە تۇسىرىلگەن ءتۇرلى جانرداعى فيلمدەردى كوردىك. رەسەيدە، اسىرەسە قازاق كومەديالارىن ۇناتادى. پاندەميا كەزىندە ۇيدە وتىرعاندا ءبارىمىز تاماشالادىق. ارينە قازاقستاندىق كينو اۋقىمدى تاريحي قويىلىمدارىمەن دە ايگىلى. ماسەلەن ءبارىمىز «توميريس» ءفيلمىنىڭ رەسەيدە شىعۋىن كۇتىپ،  كارتينانى ينتەرنەت پلاتفورمالاردا كوردىك»، دەدى «رەسەي كينوبيزنەسى» فورۋمىنىڭ باس ديرەكتورى ەكاتەرينا بورداچيوۆا.

ايتا كەتسەك، حالىقارالىق «رەسەي كينوبيزنەسى» كينو نارىعى جانە فورۋمى ماسكەۋ قالاسىنىڭ كاسىپكەرلىك جانە يننوۆاتسيالىق دامۋ دەپارتامەنتى، سونداي-اق ماسكەۋ قالاسىنىڭ مادەنيەت دەپارتامەنتى قولداۋىمەن العاش رەت وتكىزىلىپ وتىر. جالپى كينونارىق شەڭبەرىندە 200-دەن استام كينوجوبا ۇسىنىلىپ، 10 ءفيلمنىڭ جابىق كورسەتىلىمى وتەدى.

جەلتوقساننىڭ 9-نا دەيىن جالعاساتىن ماسكەۋدەگى فورۋمعا قاتىسىپ جاتقان «قازاقفيلم» كينوستۋدياسىنىڭ، «ۇلتتىق كينونى قولداۋ مەملەكەتتىك ورتالىعى» كەاق وكىلدەرى، تاۋەلسىز پروديۋسەرلەر مەن رەجيسسەرلەردىڭ قاتىسۋى كورەيا رەسپۋبليكاسى ۇكىمەتىنىڭ قولداۋىمەن ۇيىمداستىرىلعان «ورتالىق ازياداعى كينويندۋستريانى نىعايتۋ» جوباسى شەڭبەرىندە الماتى قالاسىنداعى بىرىككەن ۇلتتار ۇيىمىنىڭ ءبىلىم، عىلىم جانە مادەنيەت ماسەلەلەرى جونىندەگى كلاستەرلىك بيۋروسىنىڭ (يۋنەسكو) قولداۋىنىڭ ارقاسىندا مۇمكىن بولىپ وتىر.

 

سوڭعى جاڭالىقتار

اۋەزوۆ جانە تۇركى الەمى

رۋحانيات • كەشە

يدەولوگيا

رۋحانيات • كەشە

مەيىرىم مەن قاتىگەزدىك

رۋحانيات • كەشە

ەسكى مەن جاڭا اراسى

رۋحانيات • كەشە

بي پاديشاسى

رۋحانيات • كەشە

ساپا قايتسە جاقسارادى؟

قازاقستان • كەشە

قايىرىمدىلىقتىڭ ۇلگىسى

قازاقستان • كەشە

ساق ءداۋىرىنىڭ تاسى

تانىم • كەشە

ۇقساس جاڭالىقتار