قازاقستان تەننيس فەدەراتسياسىنىڭ ءباسپاسوز قىزمەتى تاراتقان مالىمەت بويىنشا, جەرلەستەرىمىز فينالدىق كەزەڭگە جولداما الۋ ءۇشىن نورۆەگيامەن كۇش سىناساتىن بولدى. ماتچ كەلەسى جىلدىڭ 4-5 ناۋرىز كۇندەرى نورۆەگيادا وتەدى. دەۆيس كۋبوگىنىڭ ىرىكتەۋ ماتچتارى ءتورت جەكەلەي جانە ءبىر جۇپتىق باسەكەدەن تۇرادى جانە ءۇش سەتتىك فورماتتا ۇيىمداستىرىلادى دەپ جوسپارلانعان.
ىرىكتەۋ كەزەڭىندە ۇزدىك شىققان 12 كوماندا فينالدىق سايىسقا جولداما الادى. ولارعا بيىلعى دەۆيس كۋبوگىندا جەڭىمپاز اتانعان رەسەي قۇراماسى مەن فينالدا ونەر كورسەتكەن حورۆاتيا تەننيسشىلەرى قوسىلادى. سونداي-اق ۇلىبريتانيا مەن سەربيا قۇرامالارى ارنايى شاقىرتۋمەن بارادى.
كۇنى كەشە مادريدتە مارەسىنە جەتكەن بيىلعى دەۆيس كۋبوگىنىڭ فينالدىق سايىسىندا قازاقستان قۇراماسى شيرەك فينالعا دەيىن جەتكەن بولاتىن. جەرلەستەرىمىز توپتىق كەزەڭدە شۆەتسيا جانە كانادا قۇراماسىن جەڭگەنىمەن, 1/4 فينالدا سەربيادان جەڭىلىپ قالدى. ءبىر ايتا كەتەرلىگى, ءبىزدىڭ جىگىتتەر وسىمەن التىنشى مارتە وسى جارىستىڭ شيرەك فينالىندا باق سىنادى.
