ەلباسى «بولاشاق» تۇلەكتەرى وتانىنىڭ قامقورلىعىن سەزىنىپ, ەلگە قىزمەت ەتىپ, ءۇمىت اقتايتىنىنا سەنىم ءبىلدىردى. «بولاشاق» حالىقارالىق ستيپەندياسى ەل تاۋەلسىزدىگى ارقاسىندا جاستارعا جاسالعان زور قولداۋى, ۇلكەن مۇمكىندىگى دەپ بىلەمىن. ەگەمەندىك العان ەلەڭ-الاڭ تۇستا, حالىق ىشەرگە تاماق, كيەرگە كيىم تاپپاي قينالىپ جۇرگەن ۋاقىتتا قاراجات ءبولىپ, جاستاردى شەتەلگە ءبىلىم الۋعا جىبەرۋى – ۇزاق مەرزىمگە جاسالعان ينۆەستيتسيا ەكەنى انىق. ويتكەنى قازىرگىدەي داۋىردە ءبىلىم مەن عىلىمسىز مەملەكەت دامۋدىڭ داڭعىل جولىنا تۇسە المايدى. وسىلايشا, «بولاشاق» باعدارلاماسى ارقىلى الەمنىڭ ماڭدايالدى جوعارى وقۋ ورىندارىندا ءبىلىم العان جاستار كەيىنىرەك قازاقستاننىڭ حالىقارالىق ارەنادا مويىندالۋىنا مول ۇلەس قوستى. بۇل – بىرىنشىدەن.
ەكىنشىدەن, باعدارلاما بىرەگەي الەۋمەتتىك ليفتكە اينالدى. «بولاشاق» قاراپايىم وتباسىنان ۇزدىكتەردىڭ ءىلىمىن شىڭداۋعا مول مۇمكىندىك بەردى. وسىناۋ شيرەك عاسىردا كوپتەگەن جاس مامان الەمدەگى ەڭ رەيتينگى جوعارى وقۋ ورىندارىندا ءبىلىم الۋعا قول جەتكىزدى. اسىرەسە, شالعاي اۋىلداردان شىققان ءبىلىمدى جاستار شارتاراپتىڭ ۇزدىك ۋنيۆەرسيتەتتەرىندە عىلىمنىڭ قىر-سىرىن ۇيرەنىپ قايتتى.
وسى ورايدا, «بولاشاقپەن» ءبىلىم العاندار اراسىندا بۇقارالىق اقپارات قۇرالدارى وكىلدەرى دە بار ەكەنى ۇلكەن قۋانىش. ەلباسى ايتقانىنداي-اق, شىن مانىندە «بۇل – ناعىز ادام كاپيتالى». سولاردىڭ قاتارىندا ۇلىبريتانيادا ءبىلىم العانىمدى ماقتان تۇتامىن.
وسى ورايدا, اقش-تىڭ نەگىزىن قالاعانداردىڭ ءبىرى, مەملەكەت قايراتكەرى بەنجامين فرانكليننىڭ ءسوزى ەسكە تۇسەدى. «بىلىمگە سالىنعان ينۆەستيتسيانىڭ قايتارىمى (ۇستەمەاقىسى) ءاردايىم جوعارى بولادى», دەيدى امەريكالىق ديپلومات.
جالپى, «بولاشاقتىڭ» ەل دامۋىنا اكەلگەن پايداسى ۇشان-تەڭىز. جاستارعا سالىنعان ينۆەستيتسيانىڭ قايتارىمى مولىنان بولعانى, بولاشاقتىقتاردىڭ ەكونوميكانىڭ نەگىزگى سەكتورلارىن ىلگەرىلەتۋگە قوماقتى ۇلەس قوسقانى انىق. سوندىقتان اتالعان باعدارلاما – تاۋەلسىز قازاقستان اكەلگەن ۇتىمدى شەشىمدەردىڭ ءبىرى.
قانات اۋەسباي,
«بولاشاق» باعدارلاماسىنىڭ تۇلەگى, جۋرناليست,
قر پرەزيدەنتىنىڭ حالىقارالىق «بولاشاق» ستيپەندياسى ستيپەندياتتارى قاۋىمداستىعىنىڭ كەڭەس مۇشەسى
