بيزنەس • 07 جەلتوقسان، 2021

بيزنەستى بەرەكەلى ەتكەن بەس جىل

123 رەت كورسەتىلدى

بۇرىن بيزنەس سالاسىنا ەكىنىڭ ءبىرى بارا بەرمەيتىن. ويتكەنى كوپشىلىكتىڭ تۇسىنىگىندە كاسىپكەرلىكپەن قالتالىلار عانا اينالىسادى جانە بۇل قارا حالىققا قول ەمەس. ساناعا ءسىڭىپ قالعان وسى ءبىر قاساڭ قاعيدانى «اتامەكەن» ۇلتتىق كاسىپكەرلەر پالاتاسى جەتەكشىلىك ەتەتىن «باستاۋ بيزنەس» جوباسى ءبىرجولا بۇزىپ، حالىقتىڭ تۇسىنىگىنە سىلكىنىس اكەلدى. قازىر جاعداي مۇلدەم وزگەرگەن. شاعىن جانە ورتا بيزنەسپەن جاس تا، جاسامىس تا، جارلى دا، مالدى دا اينالىسا الادى. باستىسى نيەت بولسا بولعانى. قولداۋ تۇرلەرى دە كوپ. سوندىقتان بولار، وسى كۇنى ەل ىشىندە جەكە بيزنەسىن اشىپ، بەرەكەلى ىسپەن اينالىسۋعا بەل بۋعان وتانداستارىمىزدىڭ قاتارى قالىڭ. ال نيەتتىلەردىڭ ءنوپىرى ءالى دە تولاستار ەمەس.

سۋرەتتە: جاس كاسىپكەر نازگۇل اقجولتاەۆا

ارماندى اقيقاتقا اينالدىرادى

راس، قازىر قالاداعى، اۋىلداعى اعايىن­نىڭ دەنى رەتى كەلسە كاسىپ اشۋعا تى­رى­­سادى. ياعني ولار كاسىپكەرلىكپەن اينا­لىسۋ ءۇشىن ەلىمىزدە قولايلى جاع­داي جاسالعانىن جاقسى بىلەدى. وسى ورايدا تالاي جاننىڭ اسقاق ارمانىن اقيقاتقا اينالدىرعان «باستاۋ بيزنەس» جوباسىنىڭ ورنى ەرەكشە. ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان مەملەكەتتىك «ەڭبەك» باعدارلاماسىنىڭ ەكىنشى باعىتى شەڭبەرىندە «اتامەكەن» ۇلتتىق كاسىپكەرلەر پالاتاسى قولعا العان بۇل جوبا سوڭعى 5 جىلدا حالىقتى كاسىپكەرلىك داعدىلارىنا باۋلىپ، جاستاردىڭ بيزنەسكە دەگەن قىزىعۋشىلىعىن وياتتى. سون­داي-اق اۋىلدىق جەرلەردە بيزنەس-ورتا قالىپتاستىردى. تۇرعىنداردىڭ بيزنەس-جوبالارىن سۇيەمەلدەپ، بارىنشا قولداۋ كورسەتتى. بۇدان بولەك بيزنەس-جوسپارلاردى ازىرلەۋگە كومەك كورسەتىلەدى. كرەديتتىك جانە گرانت­تىق باع­­دار­لامالارعا قول جەتكىزۋ مۇم­كىن­­­دىگى جو­عارى. كەڭەس بەرۋ تەتىگى دە قاراستىرىلعان.

قىسقاسى، «باستاۋ بيزنەستىڭ» ءتيىم­دى تۇسى كوپ. سونى ۇتىمدى پايدا­لان­عان­داردىڭ ءبىرى – نازگۇل اقجولتاەۆا. قاپشاعاي قالالىق اكىمدىگىنە قاراستى شەڭگەلدى اۋىلىنىڭ تۇرعىنى «باستاۋ بيزنەس» جوباسى ارقىلى بيزنەس الىپپە­سىن مەڭگەرىپ، مەملەكەتتەن گرانت العان. وسىلايشا، جارتىلاي دايىن ونىمدەر شىعاراتىن شاعىن تسەح اشتى. بۇگىندە جاس كاسىپكەر 5 مىڭ تۇرعىنى بار شەڭگەلدىنى ءوز ونىمىمەن قامتاماسىز ەتىپ وتىر.

– ماماندىعىم – پەداگوگ. جەكە تسەحىمدى اشقانعا دەيىن ونلاين-بيزنەسپەن اينالىستىم. دۇكەنىم بولسا دەپ ارماندادىم. جەكە ءوندىرىس اشسام دەگەن ماقسات قويدىم. وسىلايشا، تورت، ءبالىش پىسىرە باستادىم. جەمىس-جيدەكتەن سىيلىققا ارنالعان «گۇل شوقتارىن» جيناپ، ساتتىم. يدەيامدى ءوندىرىس تۇرعىسىنان دامىتۋعا «اتامەكەن» ۇلتتىق كاسىپكەر­لەر پالاتاسى قاپشاعاي قالالىق فيليا­لىنىڭ ماماندارى كومەكتەستى. «باستاۋ بيزنەس» ارقىلى ارنايى كۋرستان ءوتىپ، قايتارىمسىز گرانت الۋعا ءوتىنىم بەر­دىم. العان ءبىلىمىم ارقىلى تۇرىپ جاتقان وڭىرگە تالداۋ جۇرگىزدىم. ءسويتىپ حالىق تاراپىنان كونسەرۆانتسىز، جاڭا مۇزداتىلعان جارتىلاي دايىن ونىمدەرگە سۇرانىس بارىن انىقتادىم. مەملەكەتتىك قولداۋ ارقىلى شاعىن تسەح اشتىم. ەندى ءوز دۇكەنىمدى اشۋ ءۇشىن جۇمىس ىستەپ جاتىرمىن، – دەيدى نازگۇل اقجولتاەۆا.

كاسىپكەرگە «ەڭبەك» باعدارلاماسى اياسىندا 200 ايلىق ەسەپتىك كورسەتكىش كولەمىندە گرانت بۇيىرىپ، جارتىلاي دايىن ونىمدەر شىعاراتىن تسەحقا قاجەتتى جابدىقتاردى ساتىپ العان. تسەحتا تۇشپارانىڭ ءۇش ءتۇرى، ۆارەنيكتىڭ ءۇش ءتۇرى، كوتلەتتەر، قىرىققابات ورامى، مانتى، حينكالي، سامسا، فارشتالعان بۇرىش شىعارىلادى. ول اي سايىن Damdi Alem برەندىمەن 120 كيلوگرامم ءونىم ۇسىنىپ وتىر.

– تۇشپارالاردى قولدان تۇيەمىز. قامىر مەن ەتتىڭ ساپاسىن ساقتاۋعا تىرىسامىز. حيميالىق قوسپالاردى قولدانبايمىز. كليەنتتەرگە ساقتاۋ مەرزىمى قىسقا، جاڭادان مۇزداتىلعان ونىمدەردى ۇسىنامىز. كوكونىستەردىڭ شىرىنىن پايدالانىپ، ءتۇرلى-ءتۇستى تۇشپارا ساتامىز. قازىر وزىممەن بىرگە ەكى ادام جۇمىس ىستەيدى. كەلەر جىلى ءونىم اسسورتيمەنتىن ۇلعايتىپ، دۇكەن اشۋدى جوسپارلاپ وتىرمىن، – دەيدى كاسىپكەر.

 

جوباعا كىمدەر قاتىسا الادى؟

«باستاۋ بيزنەس» جوباسىنىڭ نەگىزگى ماقساتى – كاسىپكەرلىك قىزمەتكە تارتا وتىرىپ حالىقتىڭ ەكونوميكالىق بەلسەندىلىگىن ارتتىرۋ. ال حالىقتىڭ دەنى ەكونوميكالىق بەلسەندى تۇرعىنعا اينالاتىن بولسا، ەل ەكونوميكاسى دا جاڭا دەڭگەيگە كوتەرىلەدى.

«اتامەكەن» ۇلتتىق كاسىپكەرلەر پالاتاسى حابارلاعانداي، «باستاۋ بيزنەس» جوباسىنا جۇمىسسىز ادامدار، جاستار، ونىڭ ىشىندە NEET ساناتىنا جاتاتىن قىز-جىگىتتەر، جاس وتباسىلار، از قام­تىلعان جانە كوپبالالى وتباسىلار، ەڭبەككە قابىلەتتى مۇگەدەكتەر قاتىسا الادى. بىلتىر ەلدەگى ەپيدەميا­لىق جاعدايعا بايلانىستى جوبا قىسقا مەرزىمدە ونلاين فورماتقا اۋىستىرىلدى. ونلاين وقىتۋ كۋرستارى ارنايى ازىرلەنگەن Atameken Academy پلاتفورماسىندا جۇرگىزىلەدى.

وقىتۋ پروتسەسى قاتىسۋشىلاردىڭ وزىندىك جۇمىسىنا، تەستتەردى ورىنداۋعا جانە بيزنەس-ترەنەرلەرمەن بىرلەسىپ بيزنەس-جوسپار دايىنداۋعا ارنالعان. تولىق وقۋ كۋرسى 21 كۇنتىزبەلىك كۇننەن اسپايدى جانە 12 مودۋلدەن تۇرادى. مۇندا قاتىسۋشىلارعا بەينەساباقتار، كونسپەكتىلەر، پرەزەنتاتسيالىق ماتەريالدار، تەستتەر جانە بيزنەس-جوسپار قۇرۋ ۇسىنىلادى. وقىتۋ ۇدەرىسى كەزىندە قاتىسۋشىعا بيزنەس-ترەنەر بەكىتىلىپ، ولارعا بيزنەس-جوسپارلاردى جازۋعا كەڭەس بەرىلەدى. وقۋ اياقتالعاننان كەيىن قاتىسۋشىلارعا ەكى ءتۇرلى سەرتيفيكات بەرىلەدى. ءبىرىنشىسى – وقۋعا قاتىسقانى تۋرالى سەرتيفيكات، ەكىنشىسى – وقۋدى اياقتاعانى تۋرالى سەرتيفيكات. سوڭعىسى ۇلكەن مۇمكىندىكتەرگە جول اشادى. دالى­رەك ايتساق، وقۋدى اياقتاعانى تۋرالى سەرتيفيكات (جىلدىق 6 پايىزبەن) جەڭىلدەتىلگەن ميكروكرەديت الۋعا نەمەسە 200 ايلىق ەسەپتىك كورسەتكىش كولەمىندە (583 400 تەڭگە) گرانتتىق قارجىلاندىرۋ الۋعا قۇقىق بەرەدى.

«باستاۋ بيزنەس» جوباسى اۋىلدىق جەرلەردە جانە شاعىن قالالاردا ءىسىن جاڭا باستاعان كاسىپكەرلەردى قولداۋ بويىنشا شارالار كەشەنىن قامتيدى. بۇل – بيزنەس نەگىزدەرىن وقىتۋدى، بيزنەس-جوسپارلاردى ازىرلەۋگە كومەك كورسەتۋدى، نەسيەلىك جانە گرانتتىق باعدارلامالارمەن تىعىز بايلانىس ورناتا وتىرىپ كەڭەس بەرۋدى قامتاماسىز ەتەتىن ەڭ ءتيىمدى قۇرالداردىڭ ءبىرى. سون­داي-اق جوبا شەڭبەرىندە ىسكە اسىرىلعان جوبالاردى 12 اي ىشىندە، ال كوپبالالى جانە از قامتىلعان وتباسىلار ءۇشىن 18 اي بويى سۇيەمەلدەۋ كوزدەلگەن.

ۆ

جوبانىڭ نىسانالى كورسەتكىشى – وقىتۋدان وتكەندەردىڭ كەمىندە 30 پايى­زى بيزنەسىن كەڭەيتۋى جانە جاڭا كاسىپ اشۋى ءتيىس. جوبا قولعا الىنعان 5 جىلدىڭ ىشىندە «باستاۋ بيزنەس» بويىنشا 184 902 ادام وقىتىلدى. ونىڭ 122 247-ءسى نەمەسە 66 پايىزى – جۇمىسسىزدار، 56 957-ءسى نەمەسە 31 پايىزى – ءوزىن ءوزى جۇمىسپەن قامتىعاندار، 5 698-ءى نەمەسە 3 پايىزى – ءىسىن جاڭا باستاعان كاسىپكەرلەر. وقىتۋ كۋرستارىنىڭ ناتيجەسىندە 59 684 جوبا ىسكە قوسىلدى. ونىڭ ىشىندە 39 923 ادام نەمەسە 67 پايىزى گرانت العان. 19 761 ادام نەمەسە 33 پايىزى جوبالارىن ميك­روكرەديتتەر ەسەبىنەن جۇزەگە اسىرعان. شامامەن 70 مىڭ جۇمىس ورنى قۇرىلىپ، 1،6 ملرد تەڭگەگە سالىق تولەنگەن.

2021 جىلى جوسپار بويىنشا 30 مىڭ ادام كۋرستان ءوتۋى كەرەك ەدى. بىراق بيىل وقۋدى 33 374 قاتىسۋشى اياقتادى. ياعني جوسپار ارتىعىمەن ورىندالدى. ونىڭ 64 پايىزى نەمەسە 21 283-ءى – جۇمىسسىزدار، 29 پايىزى نەمەسە 9 563-ءى – ءوزىن ءوزى جۇمىسپەن قامتىعاندار، 7 پايىزى نەمەسە 2 528-ءى – ءىسىن جاڭا باستاعان كاسىپكەرلەر. بيىل جوبا اياسىندا 15 280 جوبا جۇزەگە اسىرىلعان. ونىڭ 3 692-ءسى وقۋدى وتكەن جىلدارى تامامداعان قاتىسۋشىلارعا تيەسىلى. جوبا­سىن اشقانداردىڭ 11 440-ى نەمەسە 75 پايىزى گرانتتىق قارجىلاندىرۋعا يە بولعان. 3 840-ى نەمەسە 25 پايىزى بيزنە­سىن اشۋ ءۇشىن ميكروكرەديتتەر­دىڭ كومەگىنە سۇيەنگەن. جۇزەگە اسىرىل­عان جوبالاردىڭ 9 015-ءى نەمەسە 59 پايى­زى – اۋىل شارۋاشىلىعى سالاسىنا، 6 265-ءى نە­مەسە 41 پايىزى سەرۆيس، ساۋدا جانە قىزمەت كورسەتۋ سالالارىنا تيەسىلى.

 

ميكروكرەديت الۋدىڭ  جولى قانداي؟

جوعارىدا ايتىپ وتكەنىمىزدەي، «باس­تاۋ بيزنەس» تۇلەكتەرىنە جەڭىلدەتىل­گەن ميكروكرەديت پەن گرانتتىق قارجى­لاندىرۋ ۇسىنىلادى. وسى ورايدا ميكروكرەديتتىك ۇيىمداردان نەسيە الۋ­دىڭ جولدارىن ەگجەي-تەگجەيلى ءتۇسىن­دىرىپ وتكەن ابزال.

2021 جىلى جوبانى جۇزەگە اسىرۋ بىرىڭعاي ەكوجۇيەگە بىرىكتىرىلدى. ول وقىتۋ، ميكروقارجىلاندىرۋ جانە جوبالاردى سۇيەمەلدەۋدەن تۇرادى. ەل ۇكىمەتى قولداۋىنىڭ ناتيجەسىندە جەرگىلىكتى اتقارۋشى ورگاندارمەن بىرلەسىپ، 15 «اتامەكەن» ميكروقارجى ۇيىمدار جەلىسى قۇرىلدى.

كۋرستى اياقتاعانى تۋرالى سەرتيفيكاتى بار جانە ءوزىنىڭ بيزنەس-جوسپارىن قورعاعان «باستاۋ بيزنەس» تۇلەگى ۇلتتىق كاسىپكەرلەر پالاتاسى مەن جەرگىلىكتى ات­قارۋشى ورگاندار بىرلەسىپ قۇرعان ميكرو­قارجى ۇيىمدارى ارقىلى 6 پايىز­­­دىق مو­ل­شەرلەمەمەن نەسيە الۋعا ءوتى­نىم بە­رە الادى. بۇل رەتتە ولار جىل­جىماي­­تىن م ۇلىكتى جانە جەر تەلىمىن (اۋىل شارۋا­شىلىعى ماقساتىندا قول­دانىلا­تىن جەر تەلىمدەرىن ەمەس) كەپىل­گە قويۋى كەرەك. ول ءۇشىن ءاربىر اۋدان ورتا­لىعىندا ورنالاسقان وڭىرلىك پالا­تالار­دىڭ فيليالدارىنا جۇگىنۋ قاجەت. جوبا تۇلەگى ءتيىستى قۇجاتتار پاكەتىن تولىق ۇسىنۋى شارت.

وڭىرلىك پالاتالار جانىنداعى كا­سىپ­­كەرلەرگە قىزمەت كورسەتۋ ورتالى­عىنا قۇجاتتاردىڭ تولىق پاكەتىن تاپ­سىرعاننان كەيىن مەنەدجەر كونسۋلتانت بارلىق قۇجاتتار پاكەتىن ارنايى جۇيەگە جۇكتەيدى. وسىلايشا، ميكروقارجى ۇيىمدارىنىڭ ىشكى قىزمەتتەرى ءوتىنىمدى ودان ءارى قاراستى­رادى. ءوتىنىمدى قاراس­تىرۋ مەرزىمى 15-20 جۇمىس كۇنىنە تەڭ.

شاعىن نەسيەنى 5 جىلعا، ال مال شارۋا­شىلىعى سالاسىندا 7 جىلعا دەيىن­گى مەرزىمگە راسىمدەۋگە بولادى. 2021 جىلى اۋىلدىق ەلدى مەكەندەر مەن شا­عىن قالالار ءۇشىن قارىزدىڭ ەڭ جوعارى سوماسى – 7،2 ملن تەڭگەگە (2،5 مىڭ ايلىق ەسەپتىك كورسەتكىش)، قالالار مەن مونوقالالار ءۇشىن – 18،9 ملن تەڭگەگە (6،5 مىڭ ايلىق ەسەپتىك كورسەتكىش)، شىمكەنت، اقتاۋ، اتىراۋ قالالارى ءۇشىن 23،3 ملن تەڭگەگە (8 مىڭ ايلىق ەسەپتىك كورسەتكىشكە دەيىن) تەڭ.

ەسكە سالا كەتەيىك، مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس، مەملەكەتتىك «ەڭبەك» باعدارلاماسىنىڭ قۇرالدارىن قايتا قاراۋ جانە ميكروقارجىلاندىرۋدى دامىتۋ ماقساتىندا «اتامەكەن» ۇلتتىق كاسىپكەرلەر پالاتاسى مەملەكەتتىك ورگان­دارمەن، مۇددەلى ۇيىمدارمەن بىرلەسىپ جۇمىس جۇرگىزدى. بۇگىندە «ەڭبەك» جۇمىسپەن قامتۋ جول كارتاسىنا سايكەس، نەسيەلەۋ شارتتارى انىقتالىپ، شاعىن كاسىپكەرلىكتى دامىتۋعا 22،5 ملرد تەڭگە ءبولىندى. جوسپار بويىنشا 2022 جىلدىڭ ناۋرىز ايىنا دەيىن 5 مىڭ جوبانى قارجىلاندىرۋ جوسپاردا بار.

سونداي-اق ميكروقارجى ۇيىمدارى­نىڭ كەپىلدىك ساياساتى ءبىرشاما جەڭىلدە­تىل­دى. ماسەلەن، ەكىنشى دەڭگەيلى بانك­تەر قاراستىرمايتىن كەپىل زاتتارىن ميكروقارجى ۇيىمدارى الا الادى. ياعني شالعاي اۋىلدارداعى ساماننان، قامىستى كاركاستان سوعىلعان ءۇي-جايلار مەن قورالاردى كەپىلزات رەتىندە پايدالانۋعا مۇمكىندىك بار.

سونىمەن قاتار اۋىلداعى نىساندار­دىڭ نارىقتىق باعاسىنىڭ 60-70 پا­يىزىنا دەيىن، ال قالادا ورنالاسقان نىسانداردىڭ نارىقتىق باعاسىنىڭ 80 پايىزىنا دەيىن نەسيە بەرۋ مۇمكىندىگى قاراستىرىلعان. وسىدان-اق جوبا ۇسىن­عان كەپىلدىك ساياساتىنىڭ بىرەگەي ەكەنىن اڭعارۋعا بولادى. قوسىمشا كەپىل­زات رەتىندە جالعا الىنعان جەر تەلى­مىن، اۆتو­كولىك قۇرالىن جانە اۋىل شارۋا­شىلىعى تەحنيكاسىن قويۋعا مۇمكىندىك بار.

2021 جىلعى 3 جەلتوقسانداعى جاعداي بويىنشا ميكروقارجى ۇيىمدارى جالپى سوماسى 14،8 ملرد تەڭگەگە 2 175 ءوتىنىم قابىلداعان. ونىڭ ىشىندە جالپى سوماسى 6،5 ملرد تەڭگە بولاتىن 1 194 ءوتىنىم ميكروقارجى ۇيىمدارىنىڭ كرەديتتىك كوميتەتى ارقىلى ماقۇلدانعان. 989 ءوتىنىم اگرارلىق نەسيە كورپوراتسياسىنا جولدانىپ، 2،7 ملرد تەڭگەگە 479 ميكروكرەديت بەرىلدى.

 

قارجىلىق ەمەس قولداۋ دەگەنىمىز نە؟

بيزنەس ءۇشىن قارجىلىق قولداۋدان بولەك، قارجىلىق ەمەس قولداۋ تۇرلە­رى دە ماڭىزعا يە. ويتكەنى كاسىبىن اشقان­­داردىڭ بارلىعى بىردەي قۇقىق­تىق، قار­جى­لىق نورمالاردى جەتىك بىلە بەر­مەي­دى. مىنە، وسىنداي كەزدە «اتامەكەن» ۇلت­تىق كاسىپكەرلەر پالاتاسى ۇسىناتىن قار­جى­لىق ەمەس قولداۋدىڭ تيگىزەر سەپتىگى زور.

ەسكە سالا كەتەيىك، ۇلتتىق پالاتا 2015 جىل­دان باستاپ بيزنەستى قولداۋ مەن دا­مىتۋعا ارنالعان «بيزنەستىڭ جول كار­تاسى-2025» مەملەكەتتىك باعدار­لا­ما­­سىنىڭ ءتورتىنشى باعىتى شەڭبە­رىن­­دە قارجىلىق ەمەس قولداۋ وپەراتو­رى سانالادى. بۇل رەتتە «اتامەكەن» كاسىپ­كەرلەرگە قىزمەت كورسەتۋ ورتالى­عى ارقىلى قارجىلاي ەمەس قولداۋ­دىڭ بىر­نەشە ءتۇرىن ۇسىنادى. اتاپ ايتقان­دا، كاسىپكەرلىك قىزمەتتى جۇرگىزۋگە سەر­ۆيس­تىك قولداۋ كورسەتەدى، كاسىپكەرلەر مەن كاسىپ اشۋعا نيەتتى حالىقتى اقپا­رات­­تىق-تال­دامالىق دۇنيەلەرمەن قامتا­ماسىز ەتەدى.

بۇدان بولەك ەكونوميكانىڭ بارلىق سەكتورىنداعى شاعىن جانە ورتا بيزنەس سۋبەكتىلەرىنە كورسەتىلەتىن سەرۆيستىك قولداۋ شەڭبەرىندە مامانداندىرىلعان قىزمەتتەردىڭ بىرقاتار ءتۇرى ۇسىنىلادى. ياعني بۋحگالتەرلىك جانە سالىقتىق ەسەپ­­كە الۋدى جۇرگىزۋگە، سونداي-اق ستا­تيس­تيكالىق ەسەپتىلىكتى جاساۋعا قاتىس­­تى قىزمەتتەر كورسەتىلەدى. سىرت­قى ەكونوميكالىق قىزمەتكە قاتىس­تى كونسۋلتاتسيالىق كومەك بەرىلە­دى. ينتەرنەت-ماركەتينگكە قاتىستى كونسۋلتاتسيالىق قىزمەتتەر كورسەتىلە­دى. زاڭ قىزمەتتەرى ۇسىنىلادى. ماركە­­تينگ ماسەلەلەرىنە، اقپاراتتىق تەحنولوگيالارعا قاتىستى قىزمەتتەر دە وسى تىزىمدە. مەملەكەتتىك ساتىپ الۋعا، ۇلتتىق كومپانيالار مەن جەر قويناۋىن پايدالانۋشىلاردىڭ ساتىپ الۋلارىنا بايلانىستى قىزمەتتەر كورسەتىلەدى. وتاندىق تاۋار وندىرۋشىگە وندىرىلەتىن ءونىمدى وتكىزۋگە جاردەمدەسۋ تۇرعىسىنان كونسۋلتاتسيالىق قىزمەت ۇسىنىلادى.

«سەرۆيستىك قولداۋ» قۇرالى اياسىندا 2015 جىلدىڭ باسىنان بۇگىنگە دەيىن 363 589 سەرۆيستىك قىزمەت، شاعىن جانە ورتا بيزنەس سۋبەكتىلەرىنە 264 237 قىزمەت كورسەتىلگەن.

«حالىقتى جانە كاسىپكەرلەردى اقپاراتتىق قامتاماسىز ەتۋ» قۇرالى ەكونوميكانىڭ بارلىق سەكتورىنداعى شاعىن جانە ورتا بيزنەس سۋبەكتىلەرىنە، حالىقتىڭ كاسىپكەرلىكتى باستاۋعا نيەتتى توبىنا وتەۋسىز نەگىزدە ۇسىنىلاتىن اقپاراتتىق-كونسۋلتاتسيالىق قىزمەتتەر كەشەنىن قامتيدى.

اقپاراتتىق-تالدامالىق قامتاماسىز ەتۋ قىزمەتتەرى اۋداندىق دەڭگەيدەگى كاسىپكەرلەرگە قىزمەت كورسەتەتىن 189 ورتالىق بازاسىندا وفلاين رەجىمدە جانە قارجىلىق ەمەس قولداۋ وپەراتورىنىڭ G4B.kz ۆەب-پورتالى ارقىلى ونلاين رەجىمدە ۇسىنىلادى. وندا كەلەسىدەي قىزمەت تۇرلەرى بار: مەملەكەتتىك قولداۋ شارالارى تۋرالى اقپاراتتاندىرۋ جانە كونسۋلتاتسيالار بەرۋ قىزمەتتەرى; كاسىپكەرلەر مەن حالىقتىڭ كاسىپكەرلىكتى باستاۋعا نيەتتى توبىنىڭ وتىنىشتەرىن سۇيەمەلدەۋ قىزمەتتەرى.

«اقپاراتتىق قامتاماسىز ەتۋ» قۇرا­لى اياسىندا 2015 جىلدىڭ باسىنان بۇگىنگە دەيىن 585 751 كليەنتكە 1 215 348 كەڭەس بەرىلگەن.

 

 

سوڭعى جاڭالىقتار

نگاننۋ ءجۋرناليستىڭ اۋزىن جاپتى

جەكپە-جەك • بۇگىن، 18:00

ۇقساس جاڭالىقتار