قارجى • 06 جەلتوقسان، 2021

بىزگە – ساقتىق، ساقتاندىرۋشىعا – اقشا

1141 رەت كورسەتىلدى

جىلدىڭ باسىنان بەرى قىركۇيەككە دەيىنگى ارالىقتا ساقتاندىرۋ سىياقىسىنىڭ كولەمى 47 پايىزعا ءوسىپ، 604،95 ملرد تەڭگەگە جەتتى. ۇلتتىق بانكتىڭ حابارلاۋىنشا، ءوسىم ساقتاندىرۋ نارىعىنىڭ بارلىق سەگمەنتىندە بايقالادى. اسىرەسە، ءومىرىن ساقتاندىرعىسى كەلەتىن ازاماتتار سانى ەسەلەپ وسكەن. قارجى نارىعىن رەتتەۋ جانە دامىتۋ اگەنتتىگىنىڭ مالىمەتى بويىنشا 9 ايدا ساقتاندىرۋ كومپانيالارىمەن كەلىسىم جاساۋشىلار سانى 2020 جىل كورسەتكىشىنەن 34،4 پايىزعا اسىپ تۇسكەن.

كوللاجدى جاساعان قونىسباي شەجىمباي، «EQ»

پاندەميانىڭ پايداسى

ءۇش توقساندا ازاماتتارعا 90،75 ملرد تەڭگە تولەنگەن. بۇل 2020 جىلدىڭ ءۇش توقسانىنداعى تولەمنەن 22،08 پايىزعا از. ۇلتتىق بانكتىڭ دەرەگىنشە، تولەم تەك قانا تاۋەكەلدى ساقتاندىرۋ سەگمەنتىن­دە عانا تومەندەگەن، ال ءومىردى ساقتاندىرۋ سەگمەنتىندە كەرىسىنشە تولەم كولەمى 14 پايىزعا وسكەن. «حالىك-Life» ءومىردى ساقتاندىرۋ كومپانياسىنىڭ باسقارما تور­اعاسى جانار جۇبانيازوۆا پاندەميا ساقتاندىرۋ سالاسىندا تسيفر­لى تەحنولوگيالاردى دامىتۋعا سەرپىن بەرگەنىن ايتادى.

«سەكتوردا ساقتاندىرۋ ونىم­دەرى ونلاينعا كوشىرىلىپ، ءموبيل­دى قوسىمشالار پايدا بولدى. قۇ­جات اينالىمىنىڭ كەيبىر بو­لىگى قاشىقتان باسقارۋ رەجىمىنە اۋىس­تى. كليەنتكە اقپاراتتى تەز جەتكىزۋ ءۇشىن چات-بوتتار ەنگىزىلدى. كومپانيالار الەۋمەتتىك جەلىنى كەڭ كولەمدە پايدالانا باستا­دى. وسىنىڭ ءبارى كليەنت پەن كوم­پا­نيا اراسىنداعى وففلاين قا­تىناستى ازايتتى، سول ارقىلى كليەنت­تەردىڭ ۋاقىتى ۇنەمدەلدى. قازىر قاراپايىم ونىمدەردى كوم­پانيا سايتى ارقىلى 5 مينۋت­تا ساتىپ الۋعا بولادى. سە­رىك­­تەس­تەرمەن، مەملەكەتتىك بازا­مەن ينتەگ­راتسيا جاساۋ ارقىلى قىز­مەت­تەردى تۇتىنۋ ءبىرشاما جەڭىلدەدى» دەيدى ج.جۇبانيازوۆا.

ماركەتپلەيس، ءموبيلدى قو­سىم­شا سايت سەكىلدى ساتىلىم­نىڭ جاڭا كانالدارىنىڭ دامۋى; جەكەلەگەن ساقتاندىرۋ ونىمدە­رى بويىنشا دەلدال قىزمەتى­نەن باس تارتۋ; كليەنتتەرگە قىزمەت كورسەتۋدىڭ جەدەلدەۋى – بيزنەستىڭ جاڭا مودەلىن قالىپتاستىرىپ، تىڭ ترەندكە اينالدى.

«Big-data تەحنولوگيالارىن پايدالانۋ مالىمەتتەردىڭ قو­سىمشا كولەمىن تالداۋعا جانە پايدالانۋعا، سودان كەيىن ولاردىڭ نەگىزىندە تاۋەكەلدەردى باعالاۋ، باعا بەلگىلەۋ، نارىقتى سەگمەنتتەۋ، ماركەتينگ سالاسىندا مودەلدەر مەن شەشىمدەردى جانە جاڭا ونىمدەردى ازىرلەۋگە مۇمكىندىك بە­رەدى. ساقتاندىرۋ بيزنەسىن تسيفر­لاندىرۋ ناتيجەسىندە ونىمدەر تۇسىنىكتى ءارى ارزان بولا تۇسەدى» دەي­دى «حالىك-Life» توراعاسى.

«كوممەسك-ءومىر» ساقتاندى­رۋ كومپانياسىنىڭ باسقارما تور­اعاسى ولەگ حانين سەكتوردىڭ كەلەشەگى InsureTech-كە بايلانىس­تى ەكەنى تولىق ايقىندالعانىن جەتكىزدى.

«ونى قاراپايىم مىسالدان دا تۇسىنۋگە بولادى. كەز كەلگەن ادام ءۇشىن دەنساۋلىق، ءۇي جانە كولىك ماڭىزدى. جاقىن كەلەشەكتە وسى باعىتتار ءۇشىن جاڭا ساقتاندىرۋ ونىمدەرى جاسالادى. مىسالى، كاسكو-داعى تەلەماتيكا (جۇرگىزۋشىنى باقىلاۋ جۇيەسى – رەد). بۇل جۇيە كولىك اپاتىن ازايتادى. قازىر الەمدە جۇرگىزۋشىسىز كولىكتەر سىناقتان وتكىزىلىپ جاتىر. ەگەر ول قولدانىسقا ەنگىزىلەر بولسا، اۆتوكاسكو بويىنشا بارلىق ساقتاندىرۋ ونىمدەرى وزگەرىسكە ۇشىرايدى»، دەيدى ولەگ حانين.

مىسالى، Smart Health Insu­rance ءوز دەنساۋلىعىڭدى باسقا­رۋعا ارنالعان قۇرالدارمەن ين­تەگ­راتسيالانسا، كەلەشەكتە اقىل­دى ۇيلەر قوجايىنىن وياتادى، اۆتو­كولىكتى قىزدىرادى، كوفە دا­يىندايدى. ءحانيننىڭ سوزىنە قا­راعاندا، بولاشاقتا وسىنداي جاي­لى جاعدايعا يە، دەنساۋلىعىن كۇتەتىن جانە زياندى ادەتتەن اۋلاق ازاماتتار ساقتاندىرۋ قۇ­نىن ازىراق تولەيدى.

 

پروبلەما دا بار

ارينە، ساقتاندىرۋ قىزمەتىن تۇتىنۋ ءۇشىن حالىقتىڭ ءال-اۋقا­تى دا جوعارى بولۋعا ءتيىس. جا­قىندا وتكەن قارجىگەرلەردىڭ IX كونگرەسىندە ماماندار باتىستا ساقتاندىرۋ قىزمەتىمەن حالىقتىڭ 90-95 پايىزى قام­تىلسا، بىزدە 37 پايىز توڭىرەگىندە ەكەنىن جانە حالىق تابىسىنىڭ ازدىعى دا سەكتور اياسىن تارىل­تىپ تۇرعا­نىن مالىمدەدى. ساقتاندىرۋ مادەنيەتىن ارتتىرۋ ءۇشىن نە ىستەۋ كەرەك؟

«حالىقتىڭ قارجىلىق سا­ۋاتتىلىعىن، قارجىلىق اقپا­رات­تارعا قولجەتىمدىلىگىن ارتتىرۋ كەرەك. كوپ كليەنت اراجىگىن اجىراتىپ جاتپاي ءتۇرلى ونىمدەر­دى ساتىپ الا سالادى. نەگىزىنەن مىن­دەتتى سانالاتىن اۆتوكولىك، كەپىلدى م ۇلىك نەمەسە قارىز الۋ­شىنى ساقتاندىرۋ سياقتى قىز­مەتتەر عانا سۇرانىسقا يە. كوبى تۇتىنۋشىنىڭ قانداي قۇقى­عى بار ەكەنىن، ول بۇزىلسا نە ىستەۋ كەرەگىن بىلە بەرمەيدى. ول ءۇشىن حالىقتىڭ قارجىلىق ساۋات­تى­لى­عىن ارتتىرۋعا كۇش سا­لىپ، ساق­تان­دىرۋ ونىمدەرىنىڭ ءمانى مەن ماڭى­زىن ءتۇسىندىرۋ قا­جەت»، دەيدى ج.جۇبانيازوۆا.

– وسىعان قاراماستان سەكتور­دا پوزيتيۆ تەندەنتسيالار بار، – دەيدى قارجى نارىعىن رەتتەۋ جانە دامىتۋ اگەنتتىگىنىڭ ءتور-
­­اعاسى ءمادينا ابىلقاسىموۆا. – سوڭ­عى ءۇش جىلدا نارىق اكتيۆ­تەرى 64 پايىزعا ءوسىپ، 1،7 ترلن تەڭگەنى قۇراعان. مىندەتتى ساقتان­دىرۋدىڭ بارلىق ءتۇرى ەلەكتروندى فورماتقا كوشىرىلگەن.

«ساقتاندىرۋ ۇيىمدارى­نىڭ ينۆەستيتسيالىق مۇمكىندىكتە­رى كەڭەيتىلدى جانە 2020 جىلى Unit-linked-ءتىڭ ينۆەستيتسيالارعا قاتىسۋىمەن العاشقى ساقتاندى­رۋ شارتتارى جاسالدى. جيناق­تاۋ­­شى ساقتاندىرۋدا 2021 جىل­­­عى قاڭتاردان باستاپ ۇزاقمەر­­­زىم­­­­دى ساقتاندىرۋ ونىمدەرى بو­يىن­­­­شا سالىق جەڭىلدىكتەرى ەنگى­زىل­دى. زەي­­نەتاقى اننۋيتەتتەرى­نىڭ قول­­جەتىمدىلىگىن ارتتىرۋ ءۇشىن ونىڭ ەڭ تومەنگى قۇنى 40%-عا دە­يىن تومەندەتىلدى جانە كە­يىن­گە قالدىرىلعان اننۋيتەت ەن­گى­زىلدى. ناتيجەسىندە، ساقتان­دى­رۋ سىي­لىقاقىلارىنىڭ جال­پى كو­لە­مىندە ەرىكتى جەكە ساق­تان­دى­رۋ­دىڭ ۇلەسى 43%-عا دەيىن ۇل­عاي­­دى. وسىلايشا، ءبىز جي­ناق قۇ­رالى رەتىندە ءومىردى جيناق­تاۋ­شى ساقتاندىرۋدىڭ ءوسۋىن بايقاي­مىز» دەيدى اگەنتتىك توراعاسى.

قازىر بىزدە 27 ساقتاندىرۋ ۇيى­مى جۇمىس ىستەسە، سونىڭ 9-ى ءومىردى ساقتاندىرۋمەن اينالىسادى. ساقتاندىرۋ مادەنيەتى قا­لىپتاسپاسا ولاردىڭ تولايىم تابىستان قاعىلعانى قاعىلعان. ەندى وعان تسيفرلاندىرۋ ءۇردىسى كەلىپ قوسىلىپ، سەكتور جۇمىسىن ءتىپتى قىم-قيعاش ەتىپ جىبەردى. McKinsey ساراپشىلارىنىڭ بول­­جاۋىنشا، 2025 جىلعا تامان كورپوراتيۆتى تابىستىڭ 30 پايىزىن تسيفرلى بيزنەس-ەكوجۇيەلەر بەرەتىن بولادى. مىنە، وسىعان قاراپ «الاعان قولىم بەرەگەن» دەيتىن كومپانيالاردىڭ جان شىرىلىن تۇسىنەمىز. بىزگە – ساق­تىق، ال ساقتاندىرۋشىعا اقشا كەرەك.

 

 

سوڭعى جاڭالىقتار

نگاننۋ ءجۋرناليستىڭ اۋزىن جاپتى

جەكپە-جەك • بۇگىن، 18:00

ۇقساس جاڭالىقتار