قارجى پيراميدالارى سالىمشىلاردى تارتۋ ءۇشىن كوبىنەسە وزدەرىن جوعارى تابىستى ينۆەستيتسيالار سالاسىنداعى ۇيىمدار رەتىندە كورسەتەدى.
مۇنداي كومپانيالار ميكروقارجى ۇيىمدارى, تۇتىنۋ كووپەراتيۆتەرى, نوۋ-حاۋ جوبالار, زەرگەرلىك جانە وزگە دە كومپانيالار رەتىندە زاڭدى تۇردە تىركەلەدى.
قر قارجىلىق مونيتورينگ اگەنتتىگىنىڭ ءباسپاسوز قىزمەتىنەن ءمالىم ەتكەندەي, جەدەل-ىزدەستىرۋ شارالارى بارىسىندا نۇر-سۇلتان قالاسىنىڭ اۋماعىندا سالىمشىلاردىڭ قاراجاتىن تارتا وتىرىپ, ولارعا كەمىندە ءۇش جاڭا سالىمشىنى قوسقان جاعدايدا سالىم سوماسىنىڭ 100% قايتارۋعا ۋادە ەتىپ كەلگەن «Best Road Investment» جشس قىزمەتى انىقتالدى.
«قازىرگى ۋاقىتتا زارداپ شەككەن ادامدار مەن كەلتىرىلگەن زالالدىڭ سوماسى انىقتالۋدا. قپك-ءنىڭ 201-بابىنا سايكەس وزگە مالىمەتتەر تەرگەۋ مۇددەسىنە وراي جاريا ەتۋگە جاتپايدى. قۇرمەتتى ازاماتتار! ەگەر ءسىز نەمەسە ءسىزدىڭ جاقىندارىڭىز «Best Road Investment» جشس سالىمشىلارى بولساڭىز, نۇر-سۇلتان قالاسى بويىنشا ەتد سەنىم تەلەفونىنا +7 7172 31 61 45 حابارلاسۋدى سۇرايمىز», دەدى اگەنتتىكتىڭ ءباسپاسوز قىزمەتى.
