الدىمەن kun.uz. سايتى وزبەكستان پرەزيدەنتىنىڭ قازاق باسىلىمىنا جاريالانعان سۇبەلى سۇحباتى تۋرالى اقپاراتپەن ءبولىستى.
«وزبەكستان پرەزيدەنتى شاۆكات ميرزيوەۆ «كازاحستانسكايا پراۆدا», «Egemen Qazaqstan» گازەتتەرىنە سۇحبات بەردى.
«Egemen Qazaqstan» گازەتىنىڭ باسشىسى شاۆكات ميرزيوەۆتەن سۇحبات الدى. گازەتتىڭ باسشىسى دارحان قىدىرالىگە بەرگەن سۇحباتىندا شاۆكات ميرزيوەۆ ەكى مەملەكەتتىڭ بولاشاقتاعى بىرلەسىپ اتقارار جۇمىسى تۋرالى ايتتى. مەملەكەت باسشىسى وزبەكستان مەن قازاقستان اراسىنداعى حالىقارالىق قاتىناستاردى دا جوعارى باعالادى. اڭگىمە ەكى ەل اراسىنداعى ىنتىماقتاستىقتىڭ بولاشاق جوسپارلارىنا بايلانىستى ەگجەي-تەگجەيلى قوزعالدى», دەلىنگەن اگەنتتىك جاريالاعان ماقالادا. سونداي-اق ولار قازاقستاننىڭ باس باسىلىمى ەلدە ەڭ كوپ تيراجبەن تارايتىنىن دا اتاپ وتكەن.
قازاقستاننىڭ باس باسىلىمدارىنا جاريالانعان شاۆكات ميرزيوەۆتىڭ سۇحباتى uza.uz پورتالىنىڭ دا نازارىنان تىس قالماعان. اقپاراتتىق اگەنتتىك باسشىلىعى ماتەريالدى «شاۆكات ميرزيوەۆتىڭ سۇحباتى قازاقستاندىق گازەتتەردە جاريالاندى» دەگەن تاقارىپپەن بەرۋدى ءجون كورگەن.
«قازاق تىلىندە جارىق كورەتىن «ەگەمەن قازاقستان» جانە ورىس تىلىندە كۇندەلىكتى شىعاتىن «كازاحستانسكايا پراۆدا» گازەتىندە وزبەكستان پرەزيدەنتىنىڭ سۇحباتى جاريالاندى. وندا جاڭا وزبەكستاننىڭ دامۋ ستراتەگياسى, قازاقستانمەن قارىم-قاتىناستاردىڭ جاي-كۇيى, الداعى ساپارلاردان كۇتىلەتىن ناتيجەلەر تۋرالى اقپارات ۇسىنىلعان.
مەملەكەت باسشىسى سونداي-اق ورتالىق ازيانىڭ بولاشاعى, وڭىرلىك جانە حالىقارالىق قۇرىلىمدار اياسىنداعى ىنتىماقتاستىقتىڭ پەرسپەكتيۆالارى تۋرالى ءوز پىكىرىن ءبىلدىردى», دەلىنگەن uza.uz سايتى تاراتقان اقپاراتتا.
ەل پرەزيدەنتىنىڭ قازاقستاندىق باسىلىم باسشىسىنا بەرگەن سۇحباتى m.aniq.uz سايتى جۋرناليستەرىنىڭ دە نازارىن اۋدارعان.
«پرەزيدەنت شاۆكات ميرزيوەۆپەن بولعان اڭگىمە قازاقستاننىڭ «كازاحستانسكايا پراۆدا» جانە «ەگەمەن قازاقستان» گازەتتەرىندە جاريالاندى. باسىلىم باسشىسى دارحان قىدىرالىگە بەرگەن سۇحباتىندا پرەزيدەنت ەكى مەملەكەتتىڭ بىرلەسىپ تىندىرار كوپتەگەن جوبالارى جايلى ءسوز قوزعاعان» دەپتى m.aniq.uz سايتىنىڭ ءتىلشىسى.
بۇدان بولەك وزبەكستاننىڭ بىرنەشە اقپارات اگەنتتىكتەرى مەن سايتتارى پرەزيدەنت سۇحباتىن وزبەك تىلىنە اۋدارىپ باسقان. تاعى بىرنەشە سايت kun.uz. اقپارات اگەنتتىگىنىڭ جاريالاعان حابارىن كوشىرىپ باسقان.
ەستەرىڭىزگە سالا كەتەيىك, باس باسىلىمنىڭ سەنبى كۇنى شىققان سانىندا جاريالانعان سۇحباتتا وزبەكستان پرەزيدەنتى جاقىندا عانا قۇرىلعان تۇركى مەملەكەتتەرى ۇيىمىنىڭ اتقارار جۇمىسى مەن ماقساتى جايلى ويىمەن ءبولىسىپ, ارال تەڭىزىنىڭ پروبلەماسىنا توقتالىپ, قازاقستاننىڭ تاۋەلسىزدىك جىلدارىندا قول جەتكىزگەن تابىسى تۋرالى تولعانعان بولاتىن. سونداي-اق كورشى ەلدىڭ كوشباسشىسى ەلباسى نۇرسۇلتان نازارباەۆتىڭ تاۋەلسىز قازاقستاننىڭ دامۋىنداعى ايرىقشا ءرولىن دە تىلىنە تيەك ەتكەن ەدى.
