«باستاۋدا» قانداي كارتينالاردىڭ باعى جاندى؟

«Bastau Debuts» بايقاۋ باعدارلاماسىندا امين نايفەنىڭ «200 مەتر» اتتى كارتيناسى باستى جۇلدەگە لايىق دەپ تانىلدى. «ۇزدىك فيلم»  اتالعان كارتينا بىرنەشە ەلدىڭ (پالەستينا، يوردانيا، كاتار، يتاليا جانە شۆەتسيا) قاتىسۋىمەن تۇسىرىلگەن جانە تاياۋ شىعىستاعى وتباسىنىڭ وقيعاسىن باياندايدى. مۇستافا مەن ونىڭ ايەلى سالۆا ەكى اۋىلدا تۇرادى. ەلدى مەكەندەر 200 مەتر قاشىقتىقتا ورنالاسقانىنا قاراماستان، قابىرعامەن بولىنگەن. بىردە تەلەفون قوڭىراۋى ەستىلەدى، ەندى وتباسى ءۇشىن بارىنە دايىن اكەسى قابىرعانىڭ ارعى بەتىنە ءوتۋى كەرەك. ول ءۇشىن 200 مەتر 200 شاقىرىم قاشىقتىققا اينالادى.

يۋري بىكوۆ باستاعان حالىقارالىق قازىلار القاسى بۇل فيلمگە «ۇزدىك رەجيسسۋرا» سىيلىعىن دا بەردى. سونىمەن بىرگە كونكۋرستىق باعدارلامادا «ۇزدىك اكتەر» سىيلىعىن «بەلىي كيت» فيلمىندەگى داينيۋس گاۆەنونيس (رەسەي)، «ۇزدىك اكتريسا» ماراپاتىن «كتو سپيت ۆ سەرەبريستو-سەروم» فيلمىندە ويناعان اكتريسا ينين ما (قىتاي) جەڭىپ الدى. «قازىلار القاسىنىڭ ارنايى جۇلدەسى» قازاقستاندىق الىشەر جادىگەروۆتىڭ «وتاۋ» كارتيناسىنا بۇيىردى.

«كەز كەلگەن فەستيۆال لوتەرەيا سياقتى. سوندىقتان بۇگىن جۇلدەدەن تىس قالعان ازاماتتارعا ءوز قابىلەتتەرىڭىزگە، كينو تۇسىرۋگە دەگەن تالپىنىستارىڭىزعا ەشقاشان كۇماندانباڭىزدار دەگىم كەلەدى. ەڭ باستىسى كينو سىيلىق ءۇشىن تۇسىرىلمەيدى. وسىنى ءاردايىم ەستە ساقتاڭىزدار»، دەدى قازىلار القاسىنىڭ توراعاسى يۋري بىكوۆ جابىلۋ سالتاناتىندا سويلەگەن سوزىندە.

فەستيۆالدىڭ ەڭ ۇزدىك قىسقامەتراجدى فيلمىنە تيەسىلى سىيلىق تاجىكستاننان كەلگەن رەجيسسەر مانزارالي شەراليدىڭ «وبۋزا» كارتيناسى بەرىلدى. رەسەيلىك تاتيانا فەدوروۆسكايانىڭ توراعالىعىمەن وتكەن Bastau Shorts باعدارلاماسىندا قازىلار القاسى كەلەسى نوميناتسيالار بويىنشا جەڭىمپازداردى انىقتادى.

 «ۇزدىك قىسقا مەتراجدى انيماتسيالىق فيلم» - شوكير حوليكوۆتىڭ (وزبەكستان) «قىز بەن بۇلت» ءفيلمى;

«قازىلار القاسىنىڭ ارنايى جۇلدەسى» - قازاقستاندىق رەجيسسەر نۇربول ەربول ۇلىنىڭ  «تۇيمە» كارتيناسى;

«ەرەكشە اتاپ ءوتۋ» نوميناتسياسى - رەسەيلىك اندرەي ناتوتسيننىڭ «كاتيا» ءفيلمى;

«ەرەكشە اتاپ ءوتۋ» نوميناتسياسى - بەلارۋس رەجيسسەرى يۋري سەماشكونىڭ «كوگدا يا بىل گەنەرال» كارتيناسى.

 دەرەكتى فيلمدەر سەكتسياسىندا «ۇزدىك تولىقمەتراجدى دەرەكتى فيلم» نوميناتسياسى بويىنشا ۋكراينادان كەلگەن اندرەي ليسەتسكيدىڭ «يۆان جەرى» اتتى جۇمىسى جەڭىسكە جەتتى. ۋكراينالىق ماريا شەۆچەنكونىڭ «روديموە پياتنو» كارتيناسى «ۇزدىك قىسقا مەتراجدى دەرەكتى فيلم» نوميناتسياسىن ۇتىپ الدى. ال قازىلار القاسىنىڭ ارنايى جۇلدەسى قازاقستاندىق رەجيسسەر تىلەك ىرىسبەكتىڭ «جۇماگۇلدىڭ الەمى» كارتيناسىنا بۇيىردى.

حالىقارالىق ستۋدەنتتىك قازىلار القاسى وزبەكستاندىق رەجيسسەر شەرزود نازاروۆتىڭ «جىبەك جولىندا» كارتيناسىنا فەستيۆالدىڭ «ۇزدىك قىسقامەتراجدى ءفيلمى» ماراپاتىن تاپسىردى. سونداي-اق، ستۋدەنتتىك قازىلار القاسىنىڭ ارنايى سىيلىعىن رەجيسسەر ەلزا گاۋدجدىڭ (لاتۆيا) «لوكداۋن» ءفيلمى جەڭىپ الدى. ال قازاقستاندىق رەجيسسەرلەر ءدىلشات ءراحماتۋلليننىڭ «بەسىك جىرى» جانە ايدانا باۋىرجانقىزىنىڭ «اكە، ءان ايتىپ بەرەيىك پە؟» جۇمىستارى قازىلار القاسى تاراپىنان ەرەكشە اتالىپ ءوتىلدى.

بيىل كينوفەستيۆال قاتىسۋشىلارى مەن قوناقتارى بەس كۇن ىشىندە الەمنىڭ وتىزدان استام ەلىنىڭ رەجيسسەرلەرى تۇسىرگەن 80 ءفيلمدى تاماشالادى.

ءداستۇرلى تۇردە وتەتىن كينو مەرەكەسىن قر مادەنيەت جانە سپورت مينيسترلىگىنىڭ، الماتى قالاسى اكىمدىگىنىڭ، ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ، تۇران ۋنيۆەرسيتەتىنىڭ، ءال-فارابي اتىنداعى قازاق ۇلتتىق ۋنيۆەرستيتەتىنىڭ، ۇلتتىق كينونى قولداۋ مەملەكەتتىك ورتالىعىنىڭ جانە ش.ايمانوۆ اتىنداعى «قازاقفيلم» كينوستۋدياسىنىڭ قولداۋىمەن «Tanaris Production» جانە A Team كينوكومپانيالارى ۇيىمداستىردى.