رۋحانيات • 04 جەلتوقسان، 2021

ۇلى جامبىل مۇراسى ۇلىقتالدى

109 رەت كورسەتىلدى

جىر الىبى جامبىل جاباەۆتىڭ مەرەيتويىن اتاپ وتۋگە قاتىستى بيىلعى ءىس-شارالار مارەسىنە جەتىپ قالدى. بۇل باعىتتا ۇلى جىراۋدىڭ ۇلاعاتتى مۇراسىن ۇلىقتاۋعا جەتىسۋ جۇرتى جۇدىرىقتاي جۇمىلىپ، اۋىز تولتىرىپ ايتارلىقتاي ىستەردى جۇزەگە اسىردى. يگى جۇمىستىڭ ءبىر پاراسى جامبىل اۋدانىندا اتقارىلدى.

 

كەشە اقىن مۇراجايىندا قازاقستان رەسپۋبليكاسىنىڭ مەملەكەتتىك حاتشىسى قىرىمبەك كوشەرباەۆتىڭ قاتىسۋىمەن جىر الىبى جامبىل جاباەۆتىڭ «جامبىل الەمى» 30 تومدىق شىعارمالار جيناعىنىڭ تۇساۋى كەسىلدى. اقىن مۋزەيىندەگى بۇل شارادا شىعارماشىل جاستارمەن كەزدەسۋ ۇيىمداستىرىلىپ، رۋحانيات تاقىرىبىندا ءوزارا پىكىر الماسۋ ءوتتى. جامبىل جاباەۆتىڭ 175 جىلدىعى مەن ەل تاۋەلسىزدىگىنىڭ 30 جىلدىعى ۇيلەستىرىلگەن جيىنعا پرەمەر-ءمينيستردىڭ ورىنباسارى ەرالى توعجانوۆ، الماتى وبلىسىنىڭ اكىمى قانات بوزىمباەۆ، مادەنيەت جانە سپورت ءمينيسترى اقتوتى رايىمقۇلوۆا، قىرعىز ەلىنىڭ دەلەگاتسياسىن باستاپ كەلگەن قىرعىزستاننىڭ مەملەكەتتىك حاتشىسى سۇيۇمبەك كاسمامبەتوۆ قاتىستى.

الدىمەن رەسمي قوناقتار جامبىل جاباەۆ پەن نۇرعيسا تىلەنديەۆتىڭ ەسكەرتكىشتەرىنە گۇل شوقتارىن قويىپ تاعزىم ەتتى. مۇنان سوڭ اقىن مۋزەيىندە الماتى وبلىسى اكىمدىگىنىڭ قازاقستان جازۋشىلار وداعىمەن بىرلەسىپ شىعارعان 30 تومدىق «جامبىل الەمى» كىتاپتارىنىڭ تۇساۋى كەسىلدى.

مەملەكەتتىك حاتشى قىرىمبەك كوشەرباەۆ ەلىمىزدەگى «رۋحاني جاڭ­عىرۋ» باعدارلاماسى ءوزىنىڭ زاڭدى جال­عاسىن «ۇلتتىق رۋحاني جاڭعىرۋ» جوباسىنان تاۋىپ جاتقانىن، ەلىمىزدىڭ ادەبي-مادەني ومىرىندەگى ەلەۋلى باستامالار، جاستاردى قولداۋ شارالارى تۋرالى ايتا كەلە، جامبىل بابانىڭ قازاق پەن قىرعىزعا تەڭ تۇلعا ەكەنىن تىلگە تيەك ەتىپ، كورشى ەلدەن ارنايى كەلگەن رەسمي قوناقتاردىڭ قادامىنا قۇت تىلەدى. سودان سوڭ جاستارعا قاراتا:

– شىعارماشىل جاستار جام­بىل اقىننىڭ رۋحىنا ءتاۋ ەتسىن، وز­دەرى­ڭىز­دى بابا رۋحى قولداپ ءجۇرسىن دەپ بۇ­گىن وسى شارانى ارنايى جىر الى­بى­نىڭ مۋزەيىندە وتكىزىپ وتىرمىز. سىزدەر تاۋەلسىزدىك جىلدارىندا قازاق­ستاننىڭ ءار تۇكپىرىندە شىعارماشى­لىق­تارىڭىزدى شىڭ­داپ، كوپتەگەن تابىس­قا قول جەت­كىزدىڭىزدەر. ءبىز سىزدەرگە زور ۇمىت­پەن قارايمىز. جامبىل بابامىز تۋىن كوتەرگەن قازاق پەن قىرعىزعا تەڭ ونەر ايتىس – ناعىز تاۋەلسىزدىكتىڭ، ازات رۋحتىڭ سيمۆولى. سوندىقتان رۋحاني ىشكى تاۋەلسىزدىگىمىز ۇلكەن جەتىستىكتەرگە جول باستايدى. پرەزيدەنتىمىز ايت­قان كرەاتيۆتى يندۋستريا باعىتىن دامىتۋعا، زاماناۋي تەحنولوگيالاردى قولدانا وتىرىپ، جاڭا جوبالاردى ىسكە اسىرۋعا سىزدەردىڭ مۇمكىندىكتەرىڭىز مول. وعان مەملەكەت تاراپىنان بارلىق قاجەتتى قولداۋلار بار، – دەدى ق.كوشەرباەۆ.

قىرعىز رەسپۋبليكاسىنىڭ مەم­­لە­كەتتىك حاتشىسى س.كاس­مام­بەتوۆ كورشى ەلدەگى جامبىل جاباەۆ مۇراسىنىڭ ناسيحاتىن، جاس ۇرپاقتىڭ تاربيەسىندەگى، ەكى ەل اراسىنداعى رۋحاني بايلانىستى نىعايتۋداعى اقىن تۇلعاسىنىڭ رولىنە توقتالدى.

سول سياقتى قازاقستان رەسپۋب­ليكاسى پرەمەر-ءمينيسترىنىڭ ورىنباسارى ەرالى توعجانوۆ، مادەنيەت جانە سپورت ءمينيسترى اقتوتى رايىمقۇلوۆا جا­نە باسقا دا لاۋازىمدى تۇلعالار اقىن­نىڭ مەرەيتويلىق شاراسىنىڭ ونەرلى جاستارعا بەرەر تاعىلىمىن سوزدەرىنە ارقاۋ ەتتى.

ءوز كەزەگىندە الماتى وبلى­سى­نىڭ اكى­مى قانات بوزىمباەۆ وڭىردە جامبىل جا­باەۆتىڭ مەرەيتويىنا باعىتتالىپ وتكىزىلگەن شارالارعا قىسقاشا توقتالىپ ءوتتى.

– مىنە، وزدەرىڭىزبەن بىرگە جام­بىل جاباەۆ ادەبي-مەموريالدى مۋزەيىندە ەلىمىزدىڭ كەلەشەگىن كەمەل ەتەتىن رەس­پۋبليكامىزعا بەل­گىلى جاس اقىن-جا­زۋ­شىلارمەن كەزدەسىپ، قازاقستان جا­زۋشىلار وداعى باسقارماسىمەن بىر­لە­سىپ شىعارعان «جامبىل الەمى» 30 توم­دىعىنىڭ تۇساۋكەسەر ءراسىمىن سال­تا­ناتتى تۇردە وتكىزىپ وتىرمىز. بۇل عاسىردان-عاسىرعا مۇرا بولىپ قالا­تىن ادەبي التىن قور دەپ سانايمىن. ۇلىلارىمىزدى ۇلىقتايتىن يگى ىستەرىمىز كوپ بولسىن! – دەدى ق.بوزىمباەۆ.

كەزدەسۋدە بەلگىلى ايتىس اقىنى جانداربەك بۇلعاقوۆ، اقىن، «Egemen Qazaqstan» گازەتىنىڭ ءبولىم مەڭگەرۋشىسى ميراس اسان، تانىمال ونەرپاز، Made in KZ توبىنىڭ جەتەكشىسى باۋىرجان يتيكەەۆ، سولتۇستىك قازاقستان وبلىسى ع.مۇسىرەپوۆ اۋدانىنداعى اۋىلدىق كىتاپحانانىڭ كىتاپ­حانا­شىسى نيكولاي ۆەربوۆسكي جانە باسقا دا ءبىر توپ تالانتتى جاس ءوز ويلارىن ورتاعا سالدى. سولاردىڭ قاتارىندا رەسپۋبليكالىق تەلەارنالاردا جاس قالامگەرلەردىڭ شىعارماشىلىعىن ناسيحاتتايتىن ارنايى حابار بولسا، جاس كىتاپحاناشىلاردىڭ كىتاپ وقۋ مادەنيەتىن قالىپتاستىرۋعا ىقپال ەتەتىن جو­با­لارعا مەملەكەتتىك گرانتتار بەرىلسە، مەكتەپتە 1-7 سىنىپتارعا قازاق كۇيلەرى­نىڭ تاريحى وقىتىلسا، ەلىمىزدە «ازيا داۋى­سى» سياقتى حالىقارالىق ونەر باي­قاۋىن وتكىزۋدى قولعا السا دەگەن ءتارىز­دى كوپتەگەن ۇسىنىس-پىكىر ايتىلدى. ولار­دىڭ ارقايسىسىنا قىرىمبەك ەلەۋ­ ۇلى وي قوسىپ، حالىقتىڭ رۋحاني جاڭ­عى­رۋىنا ىقپال ەتەتىن بۇل ۇسىنىستاردىڭ بارلىعى دا ءتيىستى سالالارمەن بىرلەسىپ تالقىلانىپ، ەسكەرىلەتىنىن جەتكىزدى.

كەزدەسۋ سوڭىندا ەل تاۋەل­سىز­دىگىنىڭ 30 جىلدىعىنا وراي كەزدەسۋگە كەلگەن ءار ونەرلى جاسقا جامبىل بابا رۋحى دارىسىن دەگەن نيەتپەن دومبىرا سىيعا تارتىلدى.

جالپى، وسى جيىندا تانىس­تى­رىلعان «جامبىل جولى» 30 توم­دىعىن الماتى وبلىسىنىڭ اكىم­دىگى جازۋشىلار وداعىمەن بىر­لەسىپ شىعاردى. وعان وبلىستىق بيۋد­جەتتەن 114 ملن تەڭگە ءبولىن­دى. وندا اقىننىڭ ءومىر تاريحى، شەت تىلدەن اۋدارىلعان شىعار­مالارى، مۋزىكالىق مۇراسى، جام­بىل جاباەۆ تۋرالى زەرتتەۋ­لەر، ەستەلىكتەر، اقىننىڭ ۇستاز­دارى ءسۇيىنباي، قابان جىراۋ، مايلىقوجا، زامانداستارى، شاكىرتتەرى تۋرالى دەرەكتەر مەن شىعارمالارى، ج.جاباەۆ تۋرالى كوركەم شىعارمالار، جامبىلدىڭ تالانتتى ۇرپاقتارى جايلى جانە باسقا دا دەرەكتەر ەنگىزىلگەن.

سوڭعى جاڭالىقتار

دوللار ارزاندادى

ەكونوميكا • بۇگىن، 16:42

ۇقساس جاڭالىقتار