پرەزيدەنت • 03 جەلتوقسان، 2021

مەملەكەت باسشىسى حالىقارالىق كومپانيالاردىڭ وكىلدەرىمەن كەزدەستى

44 رەت كورسەتىلدى

قازاقستان پرەزيدەنتى قاسىم-جومارت توقاەۆ اقوردا رەزيدەنتسياسىندا شەت مەملەكەتتەردىڭ ءىرى ينۆەستيتسيالىق كومپانيالارى وكىلدەرىمەن كەزدەستى، دەپ حابارلايدى Egemen.kz اقورداعا سىلتەمە جاساپ.

جيىندا مەملەكەت باسشىسى شەتەلدىك ينۆەستيتسيالار قازاقستان دامۋىنىڭ نەگىزگى فاكتورلارىنىڭ بىرىنە اينالعانىن، سوندىقتان ەلىمىز ينۆەستيتسيالىق احۋالدى جاقسارتۋعا ەرەكشە كوڭىل بولەتىنىن اتاپ ءوتتى.

– بۇل سالاداعى جۇيەلى ءارى جان-جاقتى جۇمىستار ءبىزدى ورتالىق ازياداعى ەڭ ءىرى، پوستكەڭەستىك كەڭىستىكتە جىلدام دامىپ كەلە جاتقان ەكونوميكالاردىڭ بىرىنە اينالدىردى. تاۋەلسىزدىك جىلدارى شەتەلدەن 370 ميلليارد دوللاردان استام تىكەلەي ينۆەستيتسيا تارتتىق. مەملەكەت ينۆەستورلاردى بارلىق جاعىنان قولداۋعا باسىمدىق بەرەدى. ءبىز ءاربىر ينۆەستوردى جەكە ءارى كەشەندى قولداۋ قاعيداتىن ەنگىزدىك، – دەدى قاسىم-جومارت توقاەۆ.

پرەزيدەنت تىكەلەي ءوزى توراعالىق ەتەتىن شەتەلدىك ينۆەستورلار كەڭەسىنىڭ ينۆەستورلارمەن ءوزارا ىقپالداسۋ ءۇشىن نەگىزگى الاڭ ەكەنىن اتاپ ءوتتى. ناقتى سەكتورعا تىكەلەي ينۆەستيتسيا تارتۋدان بولەك قۇندى قاعازدار نارىعىن دامىتۋ مەن شەتەلدىك پورتفەلدى ينۆەستورلاردى ەلگە اكەلۋگە ەرەكشە كوڭىل ءبولىنىپ كەلەدى. مەملەكەت باسشىسى قازاقستاننىڭ ايماقتاعى ءىرى كاپيتال نارىعىن قۇراپ وتىرعانىن جەتكىزدى.

– ۇلتتىق بانك نەگىزگى قارجىلىق رەتتەۋشى رەتىندە قور نارىقتارىن ودان ءارى دامىتۋ جولىندا بەلسەندى جۇمىس ىستەپ جاتىر. قازاقستاندا بۇل سالانىڭ قۇقىقتىق جانە ينفراقۇرىلىمدىق باعىتى جەتىلدىرىلگەن. ەلىمىزدە ەكى قور بيرجاسى – الماتىداعى KASE جانە استانا حالىقارالىق قارجى ورتالىعى تابىستى قىزمەت اتقارىپ كەلەدى، – دەدى مەملەكەت باسشىسى.

پرەزيدەنتتىڭ ايتۋىنشا، الەمدەگى جەتەكشى ۋران ءوندىرۋشى «قازاتومونەركاسىپ» كاسىپورىنى مەن قارجى تەحنولوگياسى بويىنشا ايماقتاعى كوشباسشى Kaspi.kz IPO-لارى كاپيتال نارىعىنىڭ ديناميكاسىن ارتتىرىپ، ىلگەرىلەۋىنە ۇلەس قوستى.

قاسىم-جومارت توقاەۆ قازىر ەلىمىزدە جەكەشەلەندىرۋ بويىنشا اۋقىمدى جۇمىستار اتقارىلىپ جاتقانىن ايتتى.

– قازىرگى ۋاقىتتا قازاقستان ەكونوميكاسىنىڭ ءتۇرلى سالاسىندا، اتاپ ايتقاندا مۇناي-گاز، ەنەرگەتيكا، ينفراقۇرىلىمدا 700-دەن استام مەملەكەتتىك كاسىپورىندى جەكەشەلەندىرۋ ءۇشىن اۋقىمدى جۇمىستار جۇرگىزىلۋدە. ءبىز ءىرى كومپانيالاردىڭ اكتسيالارىنىڭ ۇلتتىق قور بيرجالارىندا تىركەلگەنىن قۇپ كورەمىز، – دەدى مەملەكەت باسشىسى.

پرەزيدەنت بۇگىنگى كەزدەسۋ قازاقستاندىق كاپيتال نارىقتارىنا شەتەلدىك ينۆەستيتسيالاردى كوپتەپ تارتۋ تۋرالى پىكىر الماسۋعا تاماشا مۇمكىندىك بەرەتىنىن ايتتى. سونىمەن قاتار قاسىم-جومارت توقاەۆ وسىنداي كەلەلى جيىندى تۇراقتى تۇردە وتكىزۋدىڭ ماڭىزدى ەكەنىن اتاپ ءوتتى.

جيىندا «Blackrock»، «Luxor Capital»، «Lugard Road Capital»، «Aberdeen Asset Management»، «Capital Group»، «Sands Capital»، «Alameda Research & FTX»، «Kingsway Capital» كومپانيالارىنىڭ جەتەكشىلەرى ءسوز سويلەدى.

سوڭعى جاڭالىقتار

نگاننۋ ءجۋرناليستىڭ اۋزىن جاپتى

جەكپە-جەك • بۇگىن، 18:00

ۇقساس جاڭالىقتار