كوگەرشىن ءوسىرۋدى ءحوببيى سانايتىننىڭ ءبىرى – تالاپ جارىلعاسىنوۆ. قۇرساي ەلدى مەكەنىندە تۇراتىن 56 جاستاعى ازامات كوگەرشىن ءوسىرۋدى وقۋشى كەزىندە باستاعان.
– ءالى كۇنگە دەيىن كوگەرشىندى جان راقاتى ءۇشىن وسىرەمىن. بىراق بۇدان ەشقانداي پايدا كورمەيمىن. قازىر مەنىڭ 50-دەن استام كوگەرشىنىم بار. بالالارىمنىڭ كوگەرشىن اسىراۋمەن اينالىسقانىن قالايمىن. كورمەگە نەمىس, چەح كوگەرشىندەرىن اكەلدىم. مەنىڭ كوگەرشىندەرىم 2019 جىلى وسىنداي كورمەدە ءبىرىنشى ورىن العان ەدى, – دەيدى تالاپ جارىلعاسىنوۆ.
اتىراۋلىقتار كورمەگە اكەلىنگەن ءتۇرلى ءتۇستى كوگەرشىندەرمەن سۋرەتكە تۇسۋگە مۇمكىندىك الدى. بيىل التىنشى مۇشەلىنە تولعان الەكسەي حاندوكين كوگەرشىن وسىرۋشىلەر اۋلەتىنەن شىققان. ءوزى دە كوگەرشىن وسىرەدى. كوگەرشىندەرىن سەرۋەنگە شىعارىپ, اۋەدە بيلەگەنىن قىزىقتاعاندى ءتاۋىر كورەدى. كورمەگە وزگەلەردىڭ كوگەرشىنىن كورۋ ءۇشىن كەلىپتى.
ال وبلىستىق كوگەرشىن وسىرۋشىلەر فەدەراتسياسىنىڭ پرەزيدەنتى جانىبەك قالەكەنوۆتىڭ ءوزى 60-قا جۋىق كوگەرشىن اسىرايدى ەكەن. بۇل كورمەگە 150-دەن استام ادام وزدەرى اسىرايتىن كوگەرشىندەردىڭ ءتۇر-ءتۇرىن اكەلىپتى.
– ءبىز قازاقستان مەن رەسەيدىڭ كوگەرشىن اسىراۋشىلارى ءۇشىن كورمە وتەتىنىن حابارلاعان ەدىك. بۇل كورمەگە اقتوبە مەن قىزىلوردا وبلىسىنىڭ قازالى اۋدانىنان كوگەرشىن وسىرۋشىلەر قاتىسىپ وتىر. بىراق رەسەيلىكتەر قاتىسا المادى. وعان رەسەيدەگى كوروناۆيرۋس ينفەكتسياسىنىڭ ءورشۋى اسەر ەتىپ وتىر. ەندى الداعى ناۋرىز ايىندا تاعى دا كورمە وتكىزەمىز دەپ ۇمىتتەنەمىز. ويتكەنى اتىراۋدا كوگەرشىن وسىرۋشىلەر سانى ارتىپ كەلەدى. دەمەك ءبىزدىڭ ءىزباسارلارىمىز بار, – دەپ كۇلەدى جانىبەك قالەكەنوۆ.
كورمەنىڭ سوڭىندا سپورتتىق كوگەرشىندەر جارىسى ءوتتى. ونىڭ قورىتىندىسىندا كوگەرشىن وسىرۋشىلەر ەستەلىك سىيلىقتارمەن ماراپاتتالدى.
اتىراۋ وبلىسى
