گاز قۇبىرلارىنىڭ جالپى ۇزىندىعى 101 شاقىرىمدى قۇراپ وتىر. ولاردىڭ جۇمىسىن جاڭادان سالىنعان ءتيىستى گاز ينفراقۇرىلىمى قامتاماسىز ەتەدى. بارلىعى 1 164 ابونەنتتى گازداندىرۋ جوسپارلانۋدا. ونىڭ ىشىندە ينتەرناتسيونالنىي تۇرعىن ءۇي الابىندا – 1 182, ميچۋرينودا – 226, كۇيگەنجار تۇرعىن ءۇي الابىندا 236 ابونەنت گازعا قوسىلماق.
ينتەرناتسيونالنىي تۇرعىن ءۇي الابىنىڭ العاشقى تۇتىنۋشىلارىنا گازدى قوسۋدىڭ سالتاناتتى راسىمىنە نۇر-سۇلتان قالاسىنىڭ اكىمى التاي كولگىنوۆ جانە «قازترانسگاز ايماق» اق استانا وندىرىستىك فيليالىنىڭ ديرەكتورى داۋلەت ارىقباەۆ قاتىستى.
د.ارىقباەۆتىڭ ايتۋىنشا, ەل استاناسىنىڭ العاشقى ابونەنتتەرى گازعا وتكەن جىلدىڭ ورتاسىندا قوسىلعان. جاقىندا ولاردىڭ سانى مىڭنان استى.
– بۇگىننەن باستاپ ءبىز ينتەرناتسيونالنىي, ميچۋرينو جانە كۇيگەنجار تۇرعىن ءۇي الاپتارىنا كوگىلدىر وتىن بەرە باستايمىز. ەڭ الدىمەن گاز كۇندەلىكتى تۇرمىستا قولدانۋعا قولايلى وتىن. ەكىنشىدەن, ەكولوگيالىق تازا ءونىم سانالادى. ەڭ باستىسى, تۇرعىندار قاۋىپسىزدىك ەرەجەلەرىن قاتاڭ ساقتاسا ەكەن, – دەدى «قازترانسگاز ايماق» اق استانا فيليالىنىڭ ديرەكتورى.
قازىر نۇر-سۇلتاندا بولاشاق ابونەنتتەردەن تۇرعىن ۇيلەردى گازداندىرۋ ءۇشىن تەحنيكالىق شارتتار بەرۋگە وتىنىشتەر قابىلداۋ بەلسەندى جۇرگىزىلىپ جاتىر. بۇگىندە قالا بويىنشا 4 600-دەن استام تەحنيكالىق شارت بەرىلىپ, 15 مىڭنان استام ادام كەڭەس الدى.
بۇعان دەيىن نۇر-سۇلتان قالاسىنىڭ اكىمدىگى مەن «قازترانسگاز ايماق» اق اراسىندا جاڭا سالىنعان گاز تاراتۋ جەلىلەرىنە سەنىمگەرلىك باسقارۋ شارتى جاسالدى. بۇگىنگى تاڭدا گازدى ىسكە قوسۋدىڭ ءتورت كەشەنى پايدالانۋعا بەرىلدى. قالاىشىلىك گاز تاراتۋ جەلىلەرىن جەرگىلىكتى اتقارۋشى ورگاندار مەملەكەتتىك بيۋدجەت ەسەبىنەن سالۋدا. قازىرگى ۋاقىتتا جوسپارلانعان 486,5 شاقىرىم گاز قۇبىرىنىڭ 78 شاقىرىمى سالىندى.
نۇر-سۇلتان قالاسىندا 22 مىڭ جەكە تۇرعىن ءۇيدى, 192 جەكە قازاندىقتى, 48 شاعىن كوممۋنالدىق قازاندىقتى, 2-ءشى جەو-نى گازعا كوشىرۋ جوسپارلانۋدا. بۇدان بولەك تۇتىنۋشىلاردىڭ ورتالىق جىلۋ جۇيەسىنە قوسىلماعان كوممۋنالدىق-تۇرمىستىق جانە ونەركاسىپتىك نىساندارى گازداندىرىلادى.
وسىلايشا, ەل استاناسىنىڭ الماتى جانە سارىارقا اۋداندارى تولىقتاي گازبەن قامتاماسىز ەتىلدى.
– گازعا كوشۋدىڭ ارتىقشىلىقتارى كوپ. گاز قولدانىستا ىڭعايلى, ەكولوگيالىق تۇرعىدان تازا ءارى قاۋىپسىز. بۇگىن گازعا كوشكەن بىرقاتار ەلدى مەكەننىڭ تۇرعىندارىمەن كەزدەستىك. ورتاشا ەسەپپەن العاندا ولار وسى كۇنگە دەيىن قىس مەزگىلىندە 20-60 توننا كومىر جاعىپ كەلگەن. ۇيلەر گازعا قانشالىقتى كوپ قوسىلسا, قالا اتموسفەراسىنا زياندى زاتتاردىڭ تارالۋى سوعۇرلىم ازايادى, – دەدى التاي كولگىنوۆ.
اكىمنىڭ ايتۋىنشا, قازىر قالادا 1,5 مىڭنان استام وتباسى گازدى پايدالانۋعا كوشكەن. وسىنىڭ ەسەبىنەن كەمىندە 20 مىڭ توننا كومىر جاعىلماي وتىر. سونداي-اق بارلىق سۋ جىلىتۋ قازاندىعى گازعا اۋىستىرىلدى. بۇل شارالار قالا ەكولوگياسىنا جاعىمدى اسەر ەتەدى. بۇعان دەيىن كوكتال-1, كوكتال-2, تەمىرجولشىلار, پرومىشلەننىي, اگروقالاشىق, وڭتۇستىك-شىعىس ەلدى مەكەندەرىنىڭ تۇرعىندارى گازعا كوشۋ مۇمكىندىگىنە يە بولدى. بۇل رەتتە 650 شاقىرىمنان استام گاز تاراتۋ جەلىسى سالىندى.
– گازداندىرۋ – ەلباسىنىڭ تاريحي جوباسى. ول ءۇش كەزەڭنەن تۇرادى. جوبانى جۇزەگە اسىرا باستاعان ساتتەن باستاپ الەۋمەتتىك از قامتىلعان وتباسىلارعا گازعا كوشۋگە كومەكتەسۋ ءۇشىن قولداۋ كورسەتىلىپ كەلەدى. باستى كريتەري – باسقا تۇرعىن ءۇيدىڭ بولماۋى جانە ءتورت ەڭ تومەنگى كۇنكورىس دەڭگەيىنەن اسپايتىن جان باسىنا شاققانداعى ورتاشا تابىستىڭ بولۋى. بۇل دەگەنىمىز – 153 872 تەڭگە. بۇل ساناتتارعا 90 اەك مولشەرىندە اقشالاي كومەك بولەمىز. بۇل 260 مىڭ تەڭگەدەن استام قاراجاتتى قۇرايدى. الەۋمەتتىك كومەكتىڭ وسى ءتۇرىن الۋعا ءوتىنىمدى egov.kz ەلەكتروندىق ۇكىمەت پورتالى ارقىلى قالدىرۋعا بولادى. گازداندىرۋ پروتسەسى مەملەكەت باسشىسىنىڭ تىكەلەي باقىلاۋىندا, – دەپ جازدى استانا اكىمى ءوزىنىڭ Instagram جەلىسىندەگى رەسمي پاراقشاسىنا.
«قازترانسگاز ايماق» اق وندىرىستىك-تەحنيكالىق دەپارتامەنتىنىڭ ديرەكتورى ءۋاليحان قىمباتوۆتىڭ ايتۋىنشا, ەگەر گازدىڭ كەلۋى اقىرىنداسا نەمەسە باسقا دا جاعدايلار ورىن السا, تۇرعىندار 104 بىرىڭعاي نومىرىنە حابارلاسۋى كەرەك. بولماسا iKomek قوسىمشاسىندا ءوتىنىش قالدىرعان ءجون. مۇنداي جاعدايدا كومپانيانىڭ ەكى ءموبيلدى بريگاداسى تۇرعىندارعا جەدەل كومەك كورسەتىپ, ورىن العان پروبلەمانى دەرەۋ شەشەدى.
كوگىلدىر وتىنعا قولى جەتكەن تۇرعىنداردىڭ قۋانىشىندا شەك جوق. قالانىڭ بايىرعى تۇرعىنى ادىلبەك تولەكەنوۆ گازعا قوسىلۋ تۇرعىنداردىڭ ءومىرىن جەڭىلدەتە تۇسكەنىن جەتكىزدى.
– تۇرعىندار اۋىر جۇمىستان ارىلىپ, ەكولوگيالىق تازا وتىنعا كوشتى. ءبىز بۇل كۇندى اسىعا كۇتتىك. ەلدىڭ تۇراقتى دامۋىنىڭ ناتيجەسىندە ينتەرناتسيونالنىي تۇرعىن ءۇي الابىندا دا وركەنيەتتىڭ وڭ بەلگىلەرى بىلىنە باستادى. وسى كۇنگە دەيىن ءۇيدى كومىرمەن جىلىتىپ كەلدىك. جىلىنا 22 توننا كومىر جاعامىز. وسىلايشا, ءبىر ماۋسىمعا 400 مىڭ تەڭگەدەن استام قارجى جۇمسايمىز. بۇعان ادامدارعا ايتارلىقتاي اۋىرتپالىق اكەلەتىن دەنە جۇكتەمەسىن ءارى ەكولوگياعا تيگەن زياندى قوسىڭىز. ال گازعا قوسىلۋ ءومىرىمىزدى جاقسارتا تۇسپەك. بۇل – ۇلكەن يگىلىك. سوندىقتان يگىلىكتى ىسكە ۇيىتقى بولعان ەل باسشىلىعىنا, قالا اكىمىنە جانە ءتيىستى جۇمىستاردى تياناقتى اتقارعان «قازترانسگاز» كومپانياسىنا العىسىمىزدى بىلدىرەمىز, – دەدى ادىلبەك تولەكەنوۆ.
