ايماقتار • 01 جەلتوقسان، 2021

تاۋەلسىزدىك جىلدارىندا اتىراۋ وبلىسىندا 100 مىڭ وتباسى باسپانالى بولدى

610 رەت كورسەتىلدى

اتىراۋدا تۇڭعىش پرەزيدەنت كۇنىنە وراي سالتاناتتى شارا ءوتتى، دەپ جازادى Egemen.kz.

«سان عاسىردان بەرى سارىلا كۇتكەن ساناداعى مۇرات جاڭا داۋىردە جاسامپاز قۋاتقا اينالدى. تۇڭعىش پرەزيدەنت نۇرسۇلتان نازارباەۆ ايتقانداي: «تاۋەلسىزدىك ءداۋىرى دەگەنىمىز – ۇلتتىڭ بۇرىن ءوتۋى مۇمكىن ەمەستەي كورىنەتىن شىڭىراۋدىڭ شەتىندەگى تاۋدىڭ قاتەرلى سوقپاعىمەن جۇرگەنمەن بىردەي قۇبىلىس. الايدا، ءبىز ونى دا باعىندىرا الدىق». ەلباسى باستاعان بۋىن الەمگە جانە بولاشاق ۇرپاققا تاۋەلسىز قازاقستان اتتى جاسامپازدىقتىڭ ۇلى جەمىسىن ۇسىندى» دەدى وبلىس اكىمى ماحامبەت دوسمۇحامبەتوۆ.

اكىمنىڭ ايتۋىنشا، تاۋەلسىزدىك جىلدارىندا اتىراۋ وبلىسى تولاعاي تابىسقا قول جەتكىزگەن.

«حالىقتىڭ تۇرمىس ساپاسىن جاقسارتۋ ەڭ باستى مىندەتىمىز بولدى. وسى جىلداردا وڭىردەگى جۇمىسسىزدىق دەڭگەيى 15،5%-دان 4،9%-عا دەيىن تومەندەدى. 1994 جىلى وڭىردە بەلسەندى جۇمىس كۇشى 175 مىڭ ادام بولعان. ال، بيىل 334 مىڭعا دەيىن جەتتى. تۇرعىنداردىڭ تابيعي گازبەن قامتىلۋى 12-دەن 99،7 پروتسەنتكە دەيىن، ال، ورتالىقتاندىرىلعان سۋمەن قامتۋ كورسەتكىشى 35-تەن 99 پروتسەنتكە دەيىن ارتتى» دەدى وبلىس اكىمى.

سونداي-اق، 100 مىڭنان استام وتباسى باسپانالى بولىپ، 12 ملن شارشى مەتر تۇرعىن ءۇي پايدالانۋعا بەرىلگەن. 

«ەگەمەندىك الۋىمىزبەن بىرگە ەلىمىزدىڭ التىن ءداۋىرى باستالدى. وسى كەزەڭ ىشىندە ءبىز تالاي تاريحي بەلەستى باعىندىردىق. بۇعان ءار ايماقتىڭ قوسقان ۇلەسى زور. ونىڭ ىشىندە اتىراۋ وبلىسىنىڭ ورنى بولەك ەكەنىن ماقتانىشپەن ايتۋىمىز كەرەك. مۇنى ەلباسى نۇرسۇلتان نازارباەۆتىڭ: «اتىراۋ قازاقستاننىڭ ءوز تاۋەلسىزدىگىن العاننان بەرى قالاي دامىعانىنىڭ سيمۆولى بولىپ سانالادى» دەگەن ءسوزى قۋاتتاي تۇسەدى» دەپ ءمالىم ەتتى ماحامبەت دوسمۇحامبەتوۆ.

سوڭعى جاڭالىقتار

ۇقساس جاڭالىقتار