تىعىرىققا تىرەلگەن توقسانىنشى جىلداردىڭ توقىراۋىن تاريحتىڭ تەرەڭ تامىرىمەن تۇڭعيىققا باتىرعان العاشقى ونجىلدىقتى – «قالىپتاسۋ كەزەڭى» دەپ الايىق. ەلەڭ-الاڭداعى ەل ءۇمىتى ۇزىلەر الدىنداعى شاق بۇل. تاۋەلسىزدىك تاڭى اتىپ, ساياساتتىڭ سالماعىن ەڭسەرە الاتىن ساڭلاقتى سارالاپ, تاۋەكەلگە ءتاۋ ەتەتىن تۇس. بۇل – ازاتتىعىن اڭساعان الاشتىڭ تۇڭعىش پرەزيدەنتى سايلانعان 1991 جىلدىڭ 1 جەلتوقسانى. قازاقستاندىق سايلاۋشىلاردىڭ 98,7 پايىزى دەموكراتيالى تۇردە نۇرسۇلتان نازارباەۆتى جاقتاپ داۋىس بەرگەن ساياسي وقيعا. وسى جىلى ەل ەگەمەندىگىن جاريالاپ, ەڭسە كوتەرۋگە تالپىندى. تۇرالاعان تىرلىك, بولاشاعى بەيمالىم بۇقارا تەك قازاقستاننىڭ تۇڭعىش پرەزيدەنتى نۇرسۇلتان ءابىش ۇلىنا عانا سەنىم ارتتى. ەلباسىنىڭ الدىندا شەكارانى شەگەندەۋ, ۇلتتىق ۆاليۋتامىزدى ەنگىزۋ, ەل ەكونوميكاسىن قالىپتاستىرۋ, قانداستاردى ەلگە شوعىرلاندىرۋ سىندى كۇردەلى مىندەتتەر تۇردى. 1993 جىلعى 5 قاراشادا «اقشا جۇيەسىن تۇراقتاندىرۋ جونىندەگى شۇعىل شارالار تۋرالى» پرەزيدەنت جارلىعى شىعىپ, 1993 جىلى 15 قاراشا «ۇلتتىق ۆاليۋتا كۇنى» دەپ بەلگىلەندى.
بۇۇ مەن وزگە دە حالىقارالىق ءىرى ۇيىمدارعا مۇشەلىك قازاقستاننىڭ الەمگە تانىلۋىنا جول اشتى. ەكونوميكالىق داعدارىسپەن كۇرەستە ەلباسىنىڭ توككەن تەرى تەككە كەتكەن جوق. دۇكەن سورەلەرىنىڭ بوس قالىپ, جالاقىنىڭ كەشىكتىرىلۋى, ەلەكتر ەنەرگياسىنىڭ جەتكىلىكسىزدىگى ۇكىمەتتى سارساڭعا سالعانىن بىلەمىز. وتپەلى كەزەڭنىڭ وتكەلدەرىنەن ەلدى امان الىپ شىعۋ ءۇشىن مەملەكەت بيلىگى ايانباي ەڭبەك ەتتى. كونستيتۋتسيامىز بەن كەزەك كۇتتىرمەيتىن زاڭدار قابىلداندى. ەلدىڭ بەيبىتشىلىگى مەن ۇلتتار دوستىعىنىڭ ايشىقتى كورىنىسى رەتىندە قحا ءوز جۇمىسىن باستادى. قازاقستاننىڭ ەكونوميكالىق-قارجىلىق تاۋەلسىزدىگى ايقىندالىپ, مۇناي ونەركاسىبى سالتانات قۇردى. وسى جىلدار ەلباسىنىڭ پارمەنىمەن ەلدىڭ الەۋمەتتىك-ەكونوميكالىق دامۋىنىڭ ستراتەگيالىق جوسپارى قابىلدانىپ, قارجى ينستيتۋتتارى قارقىندى تۇردە العا جىلجىدى.
تاۋەلسىز قازاقستاننىڭ ەكىنشى ونجىلدىعىن «دامۋ كەزەڭى» دەپ قاراستىرساق. توقسانىنشى جىلداردىڭ سوڭى مەن 2000 جىلداردىڭ باسىندا ەكونوميكانى ودان ءارى دامىتۋمەن قاتار «مادەنيەتتى قولداۋ جىلى», «دەنساۋلىق جىلى», «اۋىلداردى دامىتۋ جىلى», «ۇرپاقتار ساباقتاستىعى جىلى» سەكىلدى ەكپىن بەرىلۋگە ءتيىس سالالاردىڭ تامىرىنا قان جۇگىرتۋگە تۋرا كەلدى. 2001 جىل بۇگىندە ەل يگىلىگىن كورىپ وتىرعان «باتىس قىتاي – باتىس ەۋروپا» جوباسى قولعا الىندى. ساياسي پارتيالار مەن ۇكىمەتتىك ەمەس ۇيىمدار بەلسەندىلىگى جوعارىلاپ, دەموكراتيالىق قوعام قالىپتاستىرۋعا اتسالىستى. حالىقتىڭ جاعدايىنا باسا نازار اۋدارىلىپ, قازاقستاندىقتاردى قولداۋدىڭ جاڭا مەحانيزمدەرى ەنگىزىلدى.
ەلباسىنىڭ جولداۋلارى دامۋدىڭ تولقۇجاتى رەتىندە قابىلداندى. ۇكىمەت پەن مەملەكەتتىك قۇرىلىمدار جولداۋ جۇكتەگەن مىندەتتەردى تۇبەگەيلى ىسكە اسىرۋ ارقىلى ناتيجەلى مەجەلەرگە قول جەتكىزۋدى جولعا قويدى. ەكىنشى ونجىلدىق ەلباسىمىز باس ساۋلەتشىسى بولعان ەلوردانى دامىتۋمەن قاتار, شاعىن جانە ورتا بيزنەستى ىلگەرىلەتۋگە, مونوقالالاردى جاڭعىرتۋعا, جاستارعا قولداۋ كورسەتۋگە ارنالدى.
مەن «سامعاۋ كەزەڭى» دەپ ايدار تاققان ءۇشىنشى ونجىلدىقتى وتكەنىمىزدى سارالاپ, كەمەل كەلەشەگىمىزگە ساپار شەككەن تولىسۋ ءداۋىرى دەگەن بولار ەدىم. قازاقستاننىڭ تۇراقتى دامۋى, قازاق ەلىنىڭ تورتكۇل دۇنيەنىڭ ءتورت بۇرىشىنداعى بەدەلى جىل وتكەن سايىن پارىقتالىپ, تۇڭعىش پرەزيدەنتتىڭ پاراساتى تانىم تۇعىرىندا تۇراقتالدى. بۇگىندە دۇنيەجۇزى قازاقستاندى ەلباسىنىڭ ەسىمىمەن ساباقتاستىرادى. بۇل جەتىستىك – نۇرسۇلتان نازارباەۆتىڭ ۇتقىر قادامدارىنىڭ ايقىن كورىنىسى.
تۇڭعىش پرەزيدەنتىمىزدىڭ الەمدى دوستىققا ۇندەيتىن باستامالارى – ۇلى دالانىڭ دارحاندىعىن, قازاق حالقىنىڭ كەڭ پەيىلىن بەينەلەيتىن بىرەگەي بەلەس. الەمدىك جانە ءداستۇرلى دىندەر كوشباسشىلارىنىڭ ەلوردامىزدا باسقوسۋى داستۇرگە اينالدى. ەكسپو-2017 حالىقارالىق كورمەسى كەزىندە ميلليونداعان ءتۋريستىڭ قازاق جەرىنە اعىلۋى ەگەمەن ەلدىڭ ەڭسەسىن ودان ءارى تىكتەي ءتۇستى.
ەلباسى ن.نازارباەۆتىڭ ەل باسقارۋ تىزگىنىن ق.توقاەۆقا تابىستاۋى كورەگەندىك پەن كەمەڭگەرلىگىن كورسەتسە كەرەك. تۇڭعىش پرەزيدەنت كۇنىن تاۋەلسىزدىگىمىزدىڭ باستى سيمۆولدارىنىڭ ءبىرى رەتىندە كوشباسشىعا كورسەتىلگەن ەرەكشە قۇرمەت دەپ بىلەمىن. سولاي بولۋى دا ءتيىس. ەلىمىز تىنىش, جۇرتىمىز امان بولعاي!
گۇلنار ەسقاليەۆا,
قىزىلوردا وبلىستىق
ءماسليحاتىنىڭ دەپۋتاتى
