ورتالىقتاندىرىلعان گاز جەلىسىنە العاشقى بولىپ قاراعاندى مەن تەمىرتاۋ قالالارى قوسىلدى. مەتاللۋرگتەر قالاسىنىڭ تۇرعىنى ۆياچەسلاۆ براجنيكوۆ ءوزىنىڭ قۋانىشىندا شەك جوق ەكەنىن ايتادى.
– كومىر تاسۋ, كۇل شىعارۋدىڭ ازابى قانداي ەكەنىن كوپ ادام بىلە بەرمەيدى. قازىر اۋىر جۇمىسقا شامام دا كەلمەيدى. ەندى كومىر تاسىپ, ازاپتانۋدىڭ قاجەتى جوق. قوسىپ قويىپ, اراسىندا باقىلاپ تۇرامىن. «قازترانسگاز» قىزمەتكەرلەرىنە العىسىم شەكسىز, – دەيدى ول قۋانىشىن جاسىرا الماي.
ۆياچەسلاۆ براجنيكوۆتىڭ ۇيىنە گاز ارقىلى جىلىتۋعا قاجەتتى بارلىق تەحنيكا ورناتىلعان. ءتىپتى ءيىس ءتيۋدىڭ الدىن الاتىن قاۋىپسىزدىك قۇرىلعىسى دا بار.
قازىرگى تاڭدا تەمىرتاۋ قالاسى بويىنشا 500-گە جۋىق ءۇي گازعا قوسىلۋعا دايىن. 2025 جىلعا قاراي قالاداعى بەس مىڭعا تارتا تۇرعىن ۇيگە ورتالىقتاندىرىلعان گاز تارتىلادى. سونداي-اق, الداعى ۋاقىتتا وڭىردەگى ءىرى كاسىپورىنداردى دا بىرتىندەپ گازعا قوسۋ جۇمىستارى جۇرگىزىلەدى. بۇل اۋاعا جىبەرىلەتىن زياندى قالدىقتاردىڭ كولەمىن ازايتىپ, ەكولوگيالىق ماسەلەلەردى وڭتايلى شەشۋگە مۇمكىندىك بەرەدى.
جالپى قاراعاندى قالاسىندا ەكى قوسۋ كەشەنى سالىنىپ, 64 شاقىرىمنان استام گاز قۇبىرى تارتىلدى. جوبانىڭ ءبىرىنشى كەزەڭىندە ءۇش مىڭعا جۋىق ءۇيدى گازداندىرۋعا مۇمكىندىك بەرسە, الداعى ۋاقىتتا تاعى 13 مىڭعا جۋىق تۇتىنۋشى كوگىلدىر وتىنعا قول جەتكىزەدى.
قاراعاندى وبلىسىنىڭ اكىمى جەڭىس قاسىمبەك تاۋەلسىزدىكتىڭ 30 جىلدىعى مەن تۇڭعىش پرەزيدەنت كۇنى قارساڭىندا وتكەن ءىس-شارانى ۇلكەن جەتىستىك دەپ سانايتىنىن مالىمدەدى.
– ءۇش جىل بۇرىن «سارىارقا» گاز قۇبىرىن سالۋ جوباسى باستالعان بولاتىن. ماگيسترالدىق جەلىلەردى تارتۋ وتكەن جىلى اياقتالدى. بيىل ۇيلەرگە تاراتۋ جەلىلەرى جۇرگىزىلىپ, جۇمىستار ءساتتى اياقتالدى. بۇل حالىقتىڭ تۇرمىس جاعدايىن جاقسارتۋعا جانە كوپتەگەن ەكولوگيالىق ماسەلەلەردى وڭتايلى شەشۋگە مۇمكىندىك بەرەدى,– دەدى وبلىس باسشىسى.
قاراعاندىداعى گازدىڭ كەلۋىن قالا تۇرعىندارى زور قۋانىشپەن قارسى الدى. اسىرەسە, ميحايلوۆ شاعىن اۋدانىندا تۇراتىن جەڭىسبەك سۇيىندىك ۇلى ەسىمدى قاريانىڭ قۋانىشى ەرەكشە بولدى.
– ءبىز ءۇشىن بۇگىن ارمانداردىڭ ورىندالعان كۇنى. ءوزىم جەر ۇيدە تۇرعاندىقتان وت جاعۋدىڭ قيىندىعىن ءبىر كىسىدەي بىلەمىن. گاز بەن كومىر اراسىنداعى ايىرماشىلىقتى دا بىلەسىزدەر. كومىردىڭ شاڭىمەن ۇنەمى دەم الۋ اعزاعا زياندى. بارلىق قالا تۇرعىندارىن بۇگىنگى قۋانىشتارىمەن قۇتتىقتايمىن. وسى ىسكە باستاماشىل بولعان ادامدارعا العىسىم شەكسىز, – دەيدى قالا تۇرعىنى.
قاراعاندى وبلىسىنىڭ ءىرى ءۇش قالاسىندا گاز قۇبىرلارىن تارتۋ جوباسىنىڭ ءبىرىنشى كەزەڭى اياقتالدى. نىساندار «قازترانسگاز ايماق» اق باسقارۋىنا بەرىلدى. ونىڭ مىندەتتەرىنە گازدى تاراتۋ ,تاسىمالداۋ كىرەدى. الداعى كۇندەرى جەزقازعان قالاسىنداعى ۇيلەر گازعا قوسىلادى دەپ جوسپارلانۋدا.
سونىمەن قاتار, بۇگىن ەلباسىنىڭ ەڭبەك جولى باستالعان – تەمىرتاۋ قالاسىندا تۇڭعىش پرەزيدەنت كۇنى ەرەكشە اتاپ ءوتىلدى. وسىعان وراي مەتاللۋرگتەر قالاسىندا كوپتەگەن ۇلت پەن ۇلىستىڭ باسىن بىرىكتىرەتىن دوستىق ءۇيى اشىلدى.
جاڭا الەۋمەتتىك نىساندى قاراعاندى وبلىسىنىڭ اكىمى جەڭىس قاسىمبەك ارالاپ, قوعام بەلسەندىلەرىن قونىس تويىمەن قۇتتىقتادى.
كاسىپتىك-تەحنيكالىق ۋچيليششەنىڭ بوس تۇرعان عيماراتى قايتا تۇلەپ, «دوستىق ۇيىنە» اينالدى. عيماراتتا ەتنومادەني بىرلەستىكتەر, ۇەۇ, جاستار جانە ەرىكتىلەر ۇيىمدارىنا ارنالعان 57 كابينەت جابدىقتالعان. ءتىپتى شىعارماشىلىق جاستار ءۇشىن ارنايى مەديا ستۋدياسى دا بار.
سونداي-اق, مۇندا ءتۇرلى ۇلت وكىلدەرى مەملەكەتتىك ءتىلدى ۇيرەنىپ, جەتىلدىرە الاتىن ءتىل كلۋبى جۇمىس ىستەيدى. الداعى ۋاقىتتا «رۋحاني جاڭعىرۋ» باعدارلاماسى اياسىندا مەدياتسيا كابينەتتەرىن اشۋ جوسپارلانعان.
يگى ءىس-شارالاردىڭ سوڭى تەمىرتاۋداعى تۇڭعىش پرەزيدەنتتىڭ تاريحي-مادەني ورتالىعىندا سالتاناتتى ءىس-شاراعا ۇلاستى. وعان ەلباسىنىڭ ەڭبەك جولىنداعى ارىپتەستەرى مەن تاۋەلسىزدىكتىڭ قۇرداستارى قاتىستى.
ورتالىقتا ءسوز سويلەگەن جەڭىس قاسىمبەك تاۋەلسىزدىك جىلدارى قول جەتكىزىلگەن تابىستارعا قىسقاشا شولۋ جاسادى.
– بيىل تاۋەلسىزدىكتىڭ 30 جىلدىعىن قورىتىندىلاي كەلە, ءبىزدىڭ ەلىمىز تۇڭعىش پرەزيدەنتتىڭ باسشىلىعىمەن جاھاندىق تاريح ءۇشىن قىسقا مەرزىم ىشىندە كونوميكالىق, ساياسي جانە مادەني سەرپىلىس جاساعانىن ايقىن كورۋگە بولادى. جوسپارلى قۇرىلعان قولايلى ينۆەستيتسيالىق احۋالدىڭ ارقاسىندا ايماعىمىزدا جاڭا تەحنولوگيالاردى قولدانا وتىرىپ, 100-گە جۋىق ءىرى جاڭا كاسىپورىندار پايدا بولدى. شيكىزات وڭىرىنەن ءبىز دامىعان كاسىپكەرلىك كلاستەرگە دەيىن وستىك. بۇگىندە وبلىستىڭ ءاربىر ءۇشىنشى تۇرعىنى شاعىن جانە ورتا بيزنەسكە تارتىلعان, – دەپ اتاپ ءوتتى ول ءوز سوزىندە.
وبلىس باسشىسى شاراعا قاتىسقان ەلباسىنىڭ ەڭبەك جولىنداعى سەرىكتەستەرىنە العىس سەزىمىن جەتكىزدى. ال نۇرسۇلتان ءابىش ۇلى نازارباەۆپەن بىرگە جۇمىس ىستەگەن ارداگەرلەر تۇڭعىش پرەزيدەنتتىڭ جاستىق شاعى مەن تەمىرتاۋعا ساپارلارى تۋرالى ەستەلىكتەرىمەن ءبولىستى. سونىمەن بىرگە تاۋەلسىزدىك قۇرداستارى وزدەرىنىڭ ءارتۇرلى سالالارداعى جەتىستىكتەرى تۋرالى ايتىپ بەردى.
