«سۇيىتىلعان گاز ءوندىرۋدى ارتتىرۋ ماقساتىندا 3 جوبانى ىسكە اسىرۋ جوسپارلانىپ وتىر. ءبىرىنشى جوبا – اقتاۋ قالاسىندا تومەن قۋاتتى گاز وڭدەۋ زاۋىتى. ونىڭ قۋاتى جىلىنا 60 مىڭ توننانى, ال ينۆەستيتسيالار كولەمى 1,5 ملرد تەڭگەنى قۇرايتىن بولادى. جوبانىڭ اياقتالۋى وسى جىلدىڭ سوڭىنا جوسپارلانعان. ەكىنشى جوبا - جاڭاوزەن قالاسىندا جۇمىس ىستەپ تۇرعان قازاق گاز وڭدەۋ زاۋىتىنىڭ ورنىنا جاڭا گاز وڭدەۋ زاۋىتىن سالۋ. ونىڭ قۋاتى 900 ملن تەكشە مەتردى قۇرايدى دەپ جوسپارلانۋدا. جوبانىڭ قۇنى – 147 ملرد تەڭگە. قۇرىلىستىڭ اياقتالۋ مەرزىمى - 2023 جىل», دەدى وڭدەۋ ونەركاسىبىن دامىتۋ تۋرالى بايانداعان مينيستر.
ونىڭ اتاپ وتۋىنشە, اتالعان زاۋىت شامامەن 760 ملن تەكشە مەتر تاۋارلىق گاز, 232 مىڭ توننا سۇيىتىلعان مۇناي گازىن جانە 82 مىڭ توننا كولەمىندە پەنتان-گەكسان فراكتسياسىن وندىرەتىن بولادى.
ء«ۇشىنشى جوباعا كەلەتىن بولساق, وسى جىلى قاشاعان كەن ورنىندا قۋاتى 1 ملرد تەكشە مەتردى قۇرايتىن گاز وڭدەۋ زاۋىتىنىڭ قۇرىلىسى باستالدى. جوبانىڭ قۇنى 380,8 ملرد تەڭگەگە تەڭ. قۇرىلىستىڭ جوسپارلانعان اياقتالۋ مەرزىمى - 2023 جىل», دەدى ول.
ماعزۇم مىرزاعاليەۆتىڭ ايتۋىنشا, زاۋىت 800 ملن تەكشە مەتر تاۋارلىق گاز, 119 مىڭ توننا سۇيىتىلعان گاز, 35 مىڭ توننا كوندەنسات جانە 212 مىڭ توننا كۇكىرت وندىرەدى.
«اتالعان جوبالاردى ىسكە اسىرۋدىڭ ارقاسىندا 2025 جىلعا قاراي سۇيىتىلعان گاز ءوندىرىسىنىڭ كولەمى 300 مىڭ تونناعا ارتىپ, 3,5 ملن توننانى قۇرايتىن بولادى. ال تارتىلاتىن ينۆەستيتسيالاردىڭ كولەمى 530 ملرد تەڭگە بولادى دەپ جوسپارلانۋدا», دەدى مينيستر.
