قازاقستان چەمپيوناتىنا قاراعاندا, كۋبوك جولىنداعى جارىستاردا ءتاۋىر ناتيجەگە قول جەتكىزىپ جۇرگەن «قايرات» ماتچ الدىندا بۇل باسەكەنىڭ ايقىن ءفاۆوريتى ەدى. ويتكەنى الماتىنىڭ ۇجىمى قازاقستان كۋبوگىنىڭ فينالىنا 12 مارتە شىعىپ, ونىڭ توعىزىندا جەڭىمپاز اتانعان بولسا, «شاحتەر» كۋبوك فينالىنا ءۇش مارتە شىعىپ, تەك بىرەۋىندە عانا كۋبوكتى باسىنان اسىرا كوتەرگەن. بىراق بۇل جولعى فينالدا «شاحتەردىڭ» جەڭىسكە جەتۋگە دەگەن قۇلشىنىسى زور بولدى. سەبەبى «كەنشىلەر» ۇجىمى ءۇشىن بۇل ماتچتا قازاقستان كۋبوگى جۇلدەسى عانا ەمەس, كەلەسى جىلعى ەۋروكۋبوك باسەكەسىنىڭ جولداماسى دا ساراپقا سالىنعان ەدى.
«قايراتتىڭ» دا وزىندىك موتيۆاتسياسى بولدى. بۇل ماتچ كلۋبتىڭ برازيليالىق سۇرمەرگەنى ۆاگنەر لاۆتىڭ «قايرات» ساپىنداعى سوڭعى رەسمي كەزدەسۋى ەدى. ورتالىق ستاديونداعى كونفەرەنتسيا ليگاسىنىڭ كەزەكتى تۋر ويىنىندا جەڭىسكە جەتە الماعان سوڭ, ارىپتەستەرى كۋبوك جولىنداعى باسەكەدە قۋانتۋدى كوزدەگەن ەدى.
«استانا ارەناعا» جينالعان جانكۇيەرلەر ويىننىڭ نەگىزگى ۋاقىتىندا ەكى ءتۇرلى تايمنىڭ كۋاسى بولدى. ماتچتىڭ ءبىرىنشى ءبولىمى «قايرات» فۋتبولشىلارىنىڭ باسىمدىعىمەن ءوتتى. انىعىن ايتقاندا, العاشقى 45 مينۋت ۆاگنەر لاۆتىڭ بەنەفيسىنە اينالدى. برازيليالىق ساڭلاق كەزدەسۋدىڭ نەبارى 6-مينۋتىندا ماتچتىڭ ەسەبىن اشسا, 40-مينۋتتا ريكاردۋ الۆەشتىڭ بۇرىشتامادان اسىرعان پاسى الدىمەن قاقپا باعانىنا ءتيىپ, كەيىن ۆاگنەردىڭ اياعىنا ءدوپ كەلدى. ال برازيليالىق شابۋىلشى اشىق قاقپانى كوزدەۋدە ەش قاتەلەسكەن جوق. وسىلايشا, «قايرات» ءبىرىنشى تايمدا لاۆتىڭ ءدۋبلى ارقاسىندا 2:0 ەسەبىمەن جەڭىسكە جاقىنداي تۇسكەن ەدى.
كەزدەسۋدىڭ ەكىنشى بولىگىندە ماگومەد اديەۆ شاكىرتتەرى نامىسقا تىرىسىپ, ەلىمىزدىڭ ۇزدىك كلۋبتارىنىڭ بىرىنە قارسى تەگەۋرىندى ويىن كورسەتتى. ماتچتىڭ 47-مينۋتىندا ميحايل گابىشەۆ ستاس پوكاتيلوۆ قورعاعان قاقپادان ساڭلاۋ تاۋىپ, ەسەپ ايىرماسىن قىسقارتتى. ال ماتچتىڭ اياقتالۋىنا 15 مينۋت قالعاندا مارتين توشەۆ ارىپتەسى ۆلاديمير ءحوزيننىڭ اۋەلەتە اسىرعان پاسىنا ءبىرىنشى جەتىپ, باسپەن تاماشا گول سوقتى – 2:2. مىنە, وسىنداي تەكە-تىرەسپەن وتكەن ماتچتىڭ سوڭىنا دەيىن وسى ەسەپ ساقتالىپ قالدى.
نەگىزگى ۋاقىت تەڭ اياقتالعان سوڭ ماتچ قوسىمشا ەكسترا-تايمعا ۇلاستى. 30 مينۋتقا جالعاسقان وۆەرتايم دا 1:1 ەسەبىمەن تەڭ اياقتالدى. 97-مينۋتتا ايدوس تاتتىباەۆ 11 مەترلىك ايىپ دوبىن ءساتتى ورىنداسا, 110-مينۋتتا ارتۋر شۋشەناچەۆ تارازى باسىن قايتا تەڭەستىردى.
پەنالتي سەرياسىندا الماتىلىق ۇجىم مىقتىلىق تانىتىپ, 9:8 ەسەبىمەن جەڭىسكە جەتتى. «قايرات» ساپىنان شەشۋشى ون ءبىر مەترلىك دوپتى كامو وگانەسيان سوقتى. وسىلايشا, الماتىلىق كلۋب ءوز تاريحىندا 10-مارتە قازاقستان كۋبوگىن يەلەندى.
ال كۋبوكتان قۇر قالعان «شاحتەر» ەۋروكۋبوك ويىندارىنىڭ جولداماسىنان دا قاعىلدى. قازاقستان كۋبوگىن «قايرات» يەلەنگەن سوڭ, ەۋرودودا ويىندارىنىڭ ءتورتىنشى جولداماسى ەل بىرىنشىلىگىندە 4-ورىنعا تۇراقتاعان پەتروپاۆلدىڭ «قىزىلجارىنا» بۇيىردى.
ءبىر سوزبەن ايتقاندا, فۋتبولدان بيىلعى قازاقستان كۋبوگىنىڭ فينالى نامىس پەن جىگەرگە قامشى باسقان ناعىز كۋبوكتىق ويىن بولدى. جانكۇيەرلەر 3 ساعاتقا سوزىلعان كەزدەسۋدە 4 تايمنىڭ جانە 19 پەنالتيدىڭ كۋاگەرىنە اينالدى. ءسويتىپ, 2021 جىلعى فۋتبول ماۋسىمى جوعارى نوتادا اياقتالدى.
