ءىس ماتەريالدارىنا سايكەس, وقيعا بيىل تامىزدا بولعان. روزوۆكا اۋىلىندا وتباسىلىق جانجال كەزىندە ەر ادام توڭازىتقىشتان ىشىمدىك الىپ, ايەلىنىڭ ۇستىنە شاشىپ, وتتىقپەن ورتەپ جىبەرگەن. ەرلى-زايىپتى اراسىنداعى كيكىلجىڭ ايەلى كۇيەۋىنە ماس كۇيدە كولىك جۇرگىزۋگە تىيىم سالعان سوڭ تۋىنداعان. 34 جاستاعى جابىرلەنۋشى جانساقتاۋ بولىمىنە ءتۇسىپ, كەيىن قايتىس بولدى.
«سوتتالۋشى ادام ولىمىنە اكەپ سوقتىرعان دەنساۋلىققا قاساقانا اۋىر زيان كەلتىرگەنى ءۇشىن كىنالى دەپ تانىلدى. ول 8 جىلعا باس بوستاندىعىنان ايىرىلدى», دەدى پاۆلودار وبلىستىق سوتىنىڭ ءباسپاسوز قىزمەتى وكىلدەرى.
سوت وتىرىسىندا ەر ادام ءوز كىناسىن تولىق مويىنداپ, وقيعاعا قاتىستى ءوز نۇسقاسىن ايتتى. ونىڭ ايتۋىنشا, ايەلىمەن جانجالداسىپ قالعاننان كەيىن تاتۋلاسىپ, اس ۇيدە سالاتتار دايىنداۋعا كىرىسكەن. بانكالاردى زارارسىزداندىرۋ ءۇشىن سپيرتپەن ءسۇرتۋدى ۇسىنىپ, ول ءۇشىن توڭازىتقىشتان ءبىر بوتەلكە الكوگولدى الىپ, ۇستەلدىڭ ۇستىنە اشىق قالدىرعان. بوتەلكە كەيىنىرەك قۇلاپ, ونىڭ جانە جۇبايىنىڭ ۇستىنە توگىلگەن. ەر ادامنىڭ ايتۋىنشا, كەيىن ول ايەلىنەن ادام قالاي جاناتىنىن كورگىسى كەلە مە دەپ سۇراپ, ازىلدەپ ءوزىن ورتەپ جىبەرگەن. قولىنداعى وتتى سوندىرە باستاعاندا, ۇشقىندار ەدەنگە ءتۇسىپ, كەيىن جالىن ايەلىنە تاراعان. ول ايەلىنىڭ ۇستىنە سۋ قۇيىپ, جەدەل جاردەم شاقىرعان.
سوت ايىپتالۋشىنىڭ بەرگەن جاۋابىنا كۇدىكپەن قارادى.
ايتا كەتەيىك, جابىرلەنۋشى تاراپ ايىپتالۋشىعا ەڭ تومەنگى مەرزىم بەرۋدى تالاپ ەتكەن.
«سوت جازانى جەڭىلدەتەتىن ءمان-جاي رەتىندە كىناسىن مويىنداۋ, شىن جۇرەكتەن وكىنۋ, تەرگەۋگە بەلسەندى كومەك كورسەتۋ, سوتتىلىعىنىڭ جوقتىعى جانە ەكى كىشكەنتاي بالانىڭ بولۋىن ەسكەردى», دەدى سوتتىڭ ءباسپاسوز قىزمەتى.
ەسكە سالايىق, وقيعادان كەيىن بىردەن پوليتسيا قىزمەتكەرلەرى دەنساۋلىققا قاساقانا زيان كەلتىرۋ دەرەگى بويىنشا سوتالدى تەرگەۋدى باستاپ, كەيىن ءىس اسا اۋىر باپقا اۋىستىرىلىپ, كۇدىكتى قاماۋعا الىنعان بولاتىن.
