ەكولوگيا • 25 قاراشا، 2021

ەكولوگيا مينيسترلىگى «بىرىڭعاي ەكولوگيالىق پورتالىن» تانىستىردى

34 رەت كورسەتىلدى

قر ەكولوگيا، گەولوگيا جانە تابيعي رەسۋرستار مينيسترلىگىندە ەكولوگيالىق رەتتەۋ جانە باقىلاۋ كوميتەتىنىڭ توراعاسى ز.جولداسوۆتىڭ توراعالىعىمەن قوعام وكىلدەرى مەن بۇقارالىق اقپارات قۇرالدارى ءۇشىن «بىرىڭعاي ەكولوگيالىق پورتالدىڭ» تانىستىرىلىمى ءوتتى، دەپ جازادى Egemen.kz.

2021 جىلعى 1 شىلدەدەن باستاپ كۇشىنە ەنگەن قر جاڭا ەكولوگيالىق كودەكسىندە قورشاعان ورتانى قورعاۋ ماسەلەلەرى كەزىندە شەشىمدەر قابىلداۋدا حالىقتىڭ دا پىكىرى ەسكەرىلۋى كوزدەلگەن.

دەگەنمەن، قورشاعان ورتاعا اسەردى باعالاۋعا (قواب) قاتىستى قولدانىستاعى نورماتيۆتىك-قۇقىقتىق تالاپتار ورحۋس كونۆەنتسياسى جانە ەسپو كونۆەنتسياسى سياقتى حالىقارالىق مىندەتتەمەلەرگە تولىق سايكەس كەلمەيدى.

وسىعان بايلانىستى مينيسترلىك ءبىرىنشى ساناتتاعى ءىرى كاسىپورىندارعا قاتىستى قواب ءوتۋىن جانە جوبانى باعالاۋدىڭ بارلىق كەزەڭدەرىندە حالىقتىڭ قاتىسۋىن كوزدەيتىن بىرقاتار جاڭاشىلدىقتاردى ۇسىندى.

«ەگەر بۇرىن جوبانى ازىرلەۋ ساتىسىندا قوعامدىق تىڭداۋلار جەر ۋچاسكەسى بولىنگەننەن كەيىن وتكىزىلسە، جاڭا كودەكستە جەر ۋچاسكەسى بولىنگەنگە دەيىن قىزمەتتى جوسپارلاۋدىڭ ەڭ ەرتە ساتىسىندا تىڭداۋلار وتكىزۋ كوزدەلگەن، بۇل كاسىپكەرلەردىڭ تاۋەكەلدەرىن بولدىرماۋعا جانە قوعام وكىلدەرىنىڭ پىكىرىن ەسكەرە وتىرىپ شەشىم قابىلداۋعا مۇمكىندىك بەرەدى»، دەدى ز.جولداسوۆ.

«بىرىڭعاي ەكولوگيالىق پورتال» ءاربىر نيەت بىلدىرۋشىگە جوبامەن تانىسۋعا، ءوز ۇسىنىستارى مەن ەسكەرتۋلەرىن قالدىرۋعا، سونداي-اق ازىرلەۋشىدەن مىندەتتى تۇردە جاۋاپ الۋعا مۇمكىندىك بەرەدى. پورتالعا كىرۋ شەكتەلمەيدى.

سونىمەن قاتار قوعامدىق تىڭداۋلاردى وتكىزۋ ەرەجەلەرى ازىرلەندى جانە بەكىتىلدى، وندا جۇرتشىلىقتىڭ پىكىرىن ەسكەرۋ قاجەت وبەكتىلەردىڭ، ونىڭ ىشىندە ۇساق قۇرىلىس جۇمىستارىنىڭ كەڭ تىزبەسى قامتىلدى.

«قوعام وكىلدەرىنىڭ قاتىسۋى الەۋمەتتىك ماڭىزى بار نىسانداردى سالۋ كەزىندە دە دۇرىس جانە نەگىزدەلگەن شەشىم قابىلداۋعا مۇمكىندىك بەرەدى»، دەدى كوميتەت توراعاسى.

سوڭعى جاڭالىقتار

ۇقساس جاڭالىقتار