ەل تاۋەلسىزدىگىنىڭ 30 جىلدىعىنا وراي «رۋحاني جاڭعىرۋ» باعدارلاماسى اياسىندا ۇيىمداستىرىلعان بۇل كونكۋرسقا بارلىعى 40-قا جۋىق ۇمىتكەر ءوز جۇمىستارىن ۇسىنىپتى. جالپى, وسىمەن التىنشى رەت وتكىزىلىپ وتىرعان بايقاۋدا ءار جىلدى قوسا العاندا 16 مەن 35 جاس ارالىعىنداعى بارلىعى 300-دەن استام جاس قالامگەر باق سىناعان ەكەن.
ماراپاتتاۋ ءراسىمىنىڭ شىمىلدىعىن قاراعاندى وبلىسى اكىمىنىڭ ورىنباسارى ابزال نۇكەن قۇتتىقتاۋ سوزبەن اشقاننان كەيىن, جەڭىمپازدار مەن جۇلدەگەرلەردىڭ ەسىمدەرى كەزەك-كەزەگىمەن اتالدى.
اكادەميك ە.بوكەتوۆ اتىنداعى قاراعاندى ۋنيۆەرسيتەتىنىڭ پروفەسسورى, فيلولوگيا عىلىمدارىنىڭ دوكتورى جانسايا جارىلعاپوۆ توراعالىق ەتكەن قازىلار القاسىنىڭ شەشىمىمەن اقسەلەۋ سەيدىمبەك اتىنداعى باس جۇلدەگە اقىن, جۋرناليست, Arda Media Group ورتالىعىنىڭ ديرەكتورى, جەكە كاسىپكەر اسحات قاجىتاي لايىقتى دەپ تانىلدى.
جاس جازۋشىلار اراسىنداعى سىندا جەزقازعان قالاسىنداعى «قوڭىر سامال» جشس اتقارۋشى ديرەكتورى باقتيار تۇرسىنوۆقا ءبىرىنشى جۇلدە بۇيىردى. قاراعاندىداعى Bolashaq اكادەمياسىنىڭ ستۋدەنتى كۇننۇر قاباي ەكىنشى, ال وبلىس ورتالىعىنداعى №10 جببم-ءنىڭ قازاق ءتىلى مەن ادەبيەتى ءپانىنىڭ مۇعالىمى بەكزات التىنبەك ءۇشىنشى ورىنعا يە بولدى.
جاس كوسەمسوز شەبەرلەرى اراسىنداعى سايىستا «بالقاش ءوڭىرى» گازەتىنىڭ ءتىلشىسى ماقسات كۇزەمحان توپ جاردى. وبلىستىق Ortalyq Qazaqstan گازەتىنىڭ ءتىلشىسى ەربول ەربولات ەكىنشى جۇلدە يەگەرى اتانسا, شاحتينسك قالاسىنداعى ءاليحان بوكەيحان اتىنداعى مەكتەپ-ليتسەيىنىڭ وقۋشىسى يسلام باحاتبەك ءۇشىنشى جۇلدەنى مىسە تۇتتى.
قاراعاندى وبلىسىنىڭ تىلدەردى دامىتۋ جونىندەگى باسقارماسى ۇيىمداستىرعان بايقاۋدىڭ ماراپاتتاۋ كەشى ارنايى كونتسەرتتىك باعدارلاماعا ۇلاسىپ, وندا وبلىستىڭ ونەرپازدارى اقسەلەۋ سەيدىمبەكتىڭ «سارىارقا», «داۋرەن-اي!» اندەرىن شىرقاپ, «قوسباسار» كۇيىن ورىندادى.
قاراعاندى
