بەينەباقىلاۋ كامەرالارى قۇقىق بۇزۋشىلىقتىڭ الدىن الۋعا جانە قىلمىستاردى ءىزىن سۋىتپاي اشۋعا كومەك كورسەتەدى.
قالاعا وتكەن جىلى 3 153 كامەرا, بيىل 3 177 كامەرا قويىلدى. ونىڭ ىشىندە 4 441-ءى قوعامدىق قاۋىپسىزدىكتى ساقتاۋعا, 1889-ى جول قاۋىپسىزدىگىنە باعىتتالعان. ولاردىڭ بارلىعى پوليتسيا دەپارتامەنتىنە قاراستى جەدەل باسقارۋ ورتالىعى ارقىلى باسقارىلادى. جاڭادان قويىلعان كامەرالار قىلمىس اشۋدا ءوزىنىڭ تيىمدىلىگىن كورسەتىپ ۇلگەردى.
شىمكەنت قالاسىنىڭ پوليتسيا دەپارتامەنتىنىڭ حابارلاۋىنشا, 15-21 قاراشا ارالىعىندا «102» ارناسىنا 4628 قوڭىراۋ تۇسكەن. سول ارالىقتا بەينەباقىلاۋ كامەرالارىنىڭ كومەگىمەن ۇرلىق, بۇزاقىلىق, توناۋ سەكىلدى 9 قىلمىس اشىلعان. ودان بولەك, نولدىك توزىمدىلىك قاعيداتى جانە اكىمشىلىك قۇقىق بۇزۋشىلىقتار بويىنشا 1736 جايت انىقتالعان. ونىڭ ىشىندە 1166 جاعداي جول قوزعالىسى ەرەجەلەرىن بۇزۋعا قاتىستى.
ايتا كەتسەك, شىمكەنتتە بيىل 10 ايدا 271 جول-كولىك وقيعاسى تىركەلگەن. وسى جول-كولىك وقيعاسىنىڭ سالدارىنان 48 ادام قازا تاۋىپ, 248 ادام ءارتۇرلى دەنە جاراقاتىمەن اۋرۋحاناعا ءتۇستى. جول-كولىك وقيعالارىنىڭ باستى سەبەبى – جۇرگىزۋشىلەردىڭ اۆتوكولىك جىلدامدىعىن شامادان تىس اسىرۋى. وسىعان بايلانىستى جول-كولىك وقيعالارى ءجيى ورىن الاتىن 41 تار كوشە مەن وزگە قاۋىپتى ايماقتار انىقتالدى. تۇرعىندار سۇرانىسىمەن بەينەجازبا كامەرالارىنىڭ ىشىنەن جوعارىدا اتالعان ورىندارعا 40 كم/ساعات جىلدامدىقپەن ءجۇرۋ جول بەلگىلەرى ورناتىلدى. ال قالعان جولداردا جول ءجۇرىسى قاعيدالارىنا سايكەس 60 كم/ساعات جىلدامدىقپەن ءجۇرۋ رۇقسات ەتىلگەن.
