مەكتەپتەس دوستارى ەكەۋىن ليرا, مۋزا دەپ اتاپتى. ءابىشتىڭ ايىرىلماستاي سىرلاس دوسى, كلارانىڭ پارتالاس سىنىپتاسى سايىن نازاربەك ۇلى وسى «روماننىڭ» جاناشىرى بولعان ەكەن. ول حات-حابار جەتكىزىپ, ەكەۋىنىڭ اراسىندا تۋعان سەزىمنىڭ نىعايۋىنا ىقپال ەتكەن. كلارادا ءابىشتىڭ سالەم حاتتارىن مۇقيات وقىپ, ونىڭ مازمۇنىن جاتتاپ الاتىن كورىنەدى. وسىلايشا, ءابىشتىڭ كلاراسىنا نەمەسە ليرانىڭ مۋزاسىنا عاشىقتىعى وتە شىنايى سەزىمگە ۇلاسادى. ءابىشتىڭ كلارا – مۋزاسىن ۇناتۋىنىڭ باستى سەبەبى ادەمى, ءساندى بويجەتكەننىڭ مىنەزى بولاتىن. ول ءوز باعاسىن جاقسى بىلەتىن, مەكتەپتە قىزدارمەن دە, ۇلدارمەن دە كوپ شۇيىركەلەسىپ, جالپىلداپ سويلەسپەيتىن, ءجۇرىس-تۇرىسى كەربەز ەرەكشە قىز بولعان. ونىڭ ىشكى دۇنيەسى ايتقان ءبىر اۋىز ءسوزى مەن كوزقاراسىنان-اق كورىنىپ تۇرسا كەرەك. ابەكەڭ ءوزىنىڭ مۋزاسىن جان دۇنيەسىنىڭ مۋزىكاسى دەپ ساناعان.
سوناۋ جىلدارى ابەكەڭ ەلورداداعى ماسكەۋ كوشەسىندەگى پرەزيدەنت ءىس باسقارماسىنا قاراستى اۋرۋحاناعا ءتۇسىپ قالىپ, جۇمىستان سوڭ ءحالىن بىلەيىن دەپ بارعان ەدىم. كەلسەم, پالاتادا كلارا اپايدان باسقا سايىن اعامىز دا وتىر ەكەن. شاي ۇستىندە كوپ اڭگىمەنىڭ باسى قوزعالىپ, قىزىقتى دا جۇرەكجاردى ەستەلىكتەردىڭ كۋاسى بولعانىم بار. سول جەردە مەن كلارا اپاي مەن سايىن اعامىزدىڭ ءبىر كلاستا وقىعاندارىن العاش رەت ەستىدىم. جوعارىدا ءسوز بولعان مۋزا مەن ليرانىڭ اراسىنداعى عاشىقتىقتىڭ كەيبىر قىرلارى مەن سىرلارى ءازىل-قالجىڭ ۇستىندە تارتىمدى اڭگىمەنىڭ ارقاۋىنا اينالىپ ەدى.
مەكتەپتى ابەكەڭنەن ءبىر جىل كەيىن ءبىتىرىپ, كلارا اپاي اقتوبەدەگى مەديتسينالىق ينستيتۋتقا وقۋعا تۇسەدى. ال ابەكەڭ بولسا الماتىداعى وقۋىندا. ولار جاز ايلارىندا اراگىدىك كورىسىپ تۇرىپتى. كلارا ينستيتۋتتى بىتىرگەندە, ونى سول كەزدەگى كەڭەس وداعىنداعى جوعارى وقۋ ورنىن اياقتاعانداردى ءبولۋ تارتىبىنە سايكەس الماتى وبلىسىنىڭ بالقاش اۋدانىنا قىزمەتكە جىبەرمەك بولادى. سول ساتتە كلارا اپاي تىزگىندى ءوز قولىنا الىپ, وسىنداي جاعداي بولىپ جاتىر, ماسەلەنى تەز شەشۋ كەرەك دەپ ابەكەڭە تەلەفون سوعادى. تەك نەكە كۋالىگى عانا ولاردىڭ بىرگە بولۋىنا كەپىلدىك بەرەتىندىگىن كلارا جاقسى ءتۇسىنىپ, بۇل ماسەلەگە ءوزى قوزعاۋ سالعان ەكەن. وسى حاباردى ەستي سالا, جاس جۋرناليست ابەكەڭ تۇندەلەتىپ ءوزىنىڭ ۇستازى ز.قابدولوۆتىڭ ۇيىنە كەلىپ: «اقتوبەگە بارۋعا ءبىر بيلەتكە, ال الماتىعا قايتارعا ەكى بيلەت الۋعا» اقشا سۇرايدى. ۇستازى كومەگىن ايامايدى. ءسويتىپ, ءابىش اقتوبەگە جالعىز بارىپ, الماتىعا ەكەۋ بولىپ ورالىپتى. مەكتەپ قابىرعاسىندا باستاۋ العان بۇل ماحاببات ونشاقتى جىل بويىنا جالعاسىپ, اقىرى ءوز شەشىمىن 1964 جىلى تاۋىپ, ليرا مەن مۋزا وتاۋ قۇرادى. بۇل ومىردە ءبىر-اق رەت عاشىق بولعان جاندارعا عانا ءتان نارسە بولار.
جالپى, ابەكەڭنىڭ وتباسى سوعىس كەزىندە قيىندىقتى كوپ كورەدى. ايساۋلە انا شاحتادا جۇمىس ىستەپ, ترەست جابىلعان سوڭ وندىدا كولحوزشى بولعان. مال باعىپ, قۇرىلىستا دا جۇمىس ىستەگەن. ءبىرتۋار دارا ۇلدىڭ اناسى ايساۋلە: «جارىعىم-اۋ!» دەپ, جالعىز ۇلىن جەتكىزەم دەگەن سەنىمىن جوعالتپاي, ءابىشىنىڭ تىلەگىن تىلەپ, «جالعىزىم, ءابىشىم» دەپ, سول ءۇشىن ءومىر سۇرگەن. سوندىقتان ايساۋلە انا ولارمەن بىرگە بولىپ, اقىلى مەن وسيەتىن ايتىپ, ءومىر سۇرۋگە ۇيرەتتى. كەلىنىن ازاماتى مەن تۋىستارىن سىيلاۋعا باۋلىدى. بالالارىن تاربيەلەدى. ول كىسى بوتەن ءسوزى جوق, «جارىعىم, شىراعىم» دەپ سويلەيتىن, بىراق ايتاتىنىن بەتكە ايتاتىن ادام بولىپتى. جالپى, كەلىن بولعان قىرىق جىلدا كلارا اپاي اق جاۋلىقتى انادان قاتتى ءسوز ەستىمەپتى. ول ايساۋلە اناسىنىڭ شاپاعاتىن سەزىنىپ, ونى اياۋلى اناسىنداي كورىپ, كوپتى ۇيرەنگەنىن ايتادى.
كلارا جۇمابايقىزىنا جازۋشىنىڭ بابىن تابۋدىڭ ءوزى دە وڭاي بولماعانى بەلگىلى. ابىزدىڭ جۇبايى رەتىندە ول ونىڭ جازۋشىلىعى مەن قىزمەتىنە قامقورلىق جاسادى, ويعا شومىلىپ, جازۋ جازىپ جاتقاندا كوڭىلىن بولمەۋگە تىرىستى. ابەكەڭنىڭ الماتىداعى تۇرعان ۇيلەرى جازۋشىلار وداعىنا جاقىن بولسا كەرەك, ەكەۋى وتاۋ قۇرعاننان كەيىن بۇكىل جولداستارى مەن ارىپتەستەرى وسى ءۇيدىڭ داستارقانىنان ءدام تاتىپ, ءتىپتى تۇسكى اسقا دا كەلىپ تۇرىپتى. ايساۋلە انانىڭ ۇيگە ادام كەلگەندە قاباعىڭدى شىتپا دەگەن اقىلىن ەسكەرىپ, جولداستارى كەلگەندە ولاردى سىيلاپ, دۇرىستاپ قارسى الا ءبىلدى. سوندىقتان كلارا اپامىز كوپ جاقسى مەن جايساڭداردى قوناق قىلىپ كۇتە بىلگەن. فۋرمانوۆ كوشەسىندەگى ۇيدە ۇلكەن-ۇلكەن جيىندار بولىپ, كەلەلى-كەلەلى سوزدەر ايتىلعان ەكەن. جاس جازۋشىلار, تالانتتى ستۋدەنتتەر, ءتىپتى نەبىر اتاقتىلار مەن ۇلىلار دا كلارا اپامىزدىڭ قولىنان ءدام تاتقان كورىنەدى. بۇل اڭگىمەلەردىڭ بارلىعىنىڭ توركىنى ەل بولۋ, باسقالاردان كەم بولماۋ, ۇرپاق قامىنا قاتىستى بولعان ەدى. ول راس. استاناعا كوشىپ كەلگەن سوڭ دا, دوستارىنىڭ كوبىسى الماتىدا قالعانىنا قاراماستان, بۇل كىسىلەردىڭ ءۇيىنىڭ ەسىگى ارقاشان اشىق بولىپ, كەلىمدى-كەتىمدى ادامداردىڭ قاراسى ازايعان ەمەس. ءبىز دە كلارا اپايدىڭ داستارقانىنان, ول كىسىنىڭ ءوز قولىنان, تالاي رەت ءدام تاتىپ, عاجايىپ اڭگىمە-دۇكەننىڭ ورتاسىندا بولعان ەدىك. سول ۇيدە قانشاما تۇلعالى ازاماتتارمەن تانىسىپ, ولاردىڭ قىزىق تا ءماندى سوزدەرىن ەستىدىك. قۋانىشتى كۇندەر مەن قايعىلى كەزەڭدەردە دە قاستارىنان تابىلۋعا تىرىستىق...
ايەل ادامعا ءۇيدى ۇستاۋ, ازاماتتى كۇتۋ دە, ارينە, وڭاي شارۋا ەمەس. ءومىرى بىتپەيتىن ءۇي شارۋاسىن, بالا تاربيەسى مەن بالا-شاعانىڭ دەنساۋلىعى, داستارقاندى جايناتىپ, قوناق كۇتۋدىڭ ءبارى كلارا اپايدىڭ موينىندا بولدى. اۋەلى كيەتىن كيىمدەرىنە دەيىن مولشەرلەپ, ابەكەڭدى ەرتىپ بارماي-اق, ءوزى الا بەرەتىن جانە ولاردىڭ بارلىعى, نەگىزىنەن, ءدال كەلەتىن. ابىزدىڭ باعىنا جۇبايى كلارا ونى ەرىنبەي كۇتەتىن, ونىڭ كەيبىر مىنەزدەرىن كوپ سىناپ, مىنەمەگەن دە. كلارا جۇمابايقىزى ۇلكەن تۇلعانىڭ قاسىندا 51 جىل بولىپتى. ول جوعارى ءبىلىمدى دارىگەر رەتىندە ەڭبەك جولىن الماتى قالاسىندا ۋچاسكەلىك دارىگەر بولىپ باستاعان. ەڭبەك كىتاپشاسىندا الماتىداعى №1 قالالىق ەمحانادا قاتارداعى دارىگەر, ءبولىم مەڭگەرۋشىسى قىزمەتتەرىن اتقارعاندىعى تۋرالى جالعىز-اق سويلەم جازىلىپتى. سونىمەن بىرگە ول كىسىنىڭ ەڭبەك كىتاپشاسىنا ەنبەي قالعان تاعى ءبىر «لاۋازىمى» بولدى, ول – ابىز ءابىشتىڭ «جەكە ەمدەۋشى دارىگەرى». كلارا اپاي – اۋلەت, ءزاۋزات, ساۋلەت, داۋلەت سياقتى ۇل-قىزدارىنىڭ اناسى. ال نەمەرەلەرى ابىل – «اققوشاقان» قولدارىندا ءوسىپ, تاربيەلەندى.
بار ءومىرىن ابىشكە ارناعان ايساۋلە انانىڭ ورنىن باسىپ, ونى ايرىقشا مەيىرمەن, ىقىلاسپەن كۇتكەن كلارا جۇمابايقىزى قيىندىققا ءتوزىپ, وتباسىنىڭ بەرەكەسىن ساقتاپ, انانىڭ دا, بالانىڭ دا بابىن تابا العان دەۋگە تولىق نەگىز بار. سوندىقتان بولار, ايساۋلە ەنەسى ومىردەن وتەرىنىڭ الدىندا وعان «ريزامىن, ريزامىن» دەگەن ەكەن. ابىشىنە الپىستان اسسا دا كىشكەنتاي بالاسىنداي قاراعان مەيرىمدى انا كەلىنى كلاراعا ء«ابىشتى رەنجىتپەڭدەر» دەپتى. اۋەلى پايعامبار جاسىنداعى ءابىشىن شوبەرەسى, ءابىشىنىڭ نەمەرەسى ابىلعا, كامەلەتكە تولماعان جاپ-جاس بالاعا دا «ابىشكە قامقور بول» دەپ اماناتتاعان كورىنەدى.
ايساۋلە انا 2001 جىلدىڭ 29 قاراشاسىندا قايتىس بولدى. ول كەزدە ءبىز مەملەكەتتىك حاتشىنىڭ حاتشىلىعىندا قىزمەت ىستەپ جۇرگەنبىز. سۋىق حاباردى ەستي سالىسىمەن حاتشىلىقتىڭ مەڭگەرۋشىسى امانگەلدى قايىرباەۆ ەكەۋمىز ابەكەڭنىڭ ۇيىنە بارىپ, كلارا اپايدىڭ ايتۋىمەن مارقۇم بولعان ايساۋلە انامىزدى جايعاستىرۋعا كومەكتەستىك. امانگەلدى قايىرباي ۇلى ماڭعىستاۋعا ابەكەڭمەن بىرگە ىلەسىپ بارىپ, جەرلەۋ راسىمىنە قاتىسىپ قايتتى. ايساۋلە انا اتا قاۋىمى قامىسباي قورىمىنا جەرلەندى. 2009 جىلى وندى اۋىلىنىڭ كىرە بەرىسىندە «اي-انا» – «ەل تىلەگىن تىلەگەن اياۋلى انالارعا بەك ريزا ۇرپاقتان» اتتى ەسكەرتكىش-ءمۇسىن ورناتىلدى. ۇلى وتان سوعىسىندا شەيىت بولعان كۇيەۋلەرىنىڭ ارتىندا قالعان ۇل-قىزدارىن امان ءوسىرىپ, تاربيەلەپ, ازامات قىلىپ جەتكىزگەن بارلىق انالارعا ارنالعانىمەن, ەسكەرتكىشتىڭ نەگىزىنە, باستى تۇلعاسىنىڭ كەسكىندەمەسىنە ءا.كەكىلباەۆتىڭ اناسى ايساۋلە جۇمابايقىزىنىڭ بەينەسى الىنعان. ماڭعىستاۋ اۋدانىنىڭ ورتالىعى شەتپەنىڭ وڭتۇستىك-شىعىسىندا ورنالاسقان وسى وندى اۋىلى – ابەكەڭنىڭ تۋعان جەرى. ونداعى ورتا مەكتەپ بۇگىندە ء«ابىش مەكتەبى» دەپ اتالادى.
2019 جىلعى ابىز ءابىشتىڭ 80 جىلدىعىنىڭ قارساڭىندا ماڭعىستاۋعا بارعانىمىزدا ايساۋلە انانىڭ بيىك تۇعىردا وتىرعان تۇلعاسىن دا كوردىك, ء«ابىش مەكتەبىنە» دە باردىق. ءبىر عاجابى, وبلىستاعى بارلىق ءىس-شارالار جوعارى ۇيىمداستىرۋشىلىق جانە مازمۇندىق دەڭگەيدە ءوتتى. ماسەلەن, اقتاۋدا اۋەجايدان قارسى الۋدان باستاپ جاپ-جاس ەرىكتىلەر اياعىمىزدى جەرگە تيگىزبەي, كوتەرىڭكى كوڭىل كۇيمەن كەلگەن قوناقتارعا قىزمەت كورسەتتى. جاستاردىڭ كوزىنەن ءابىش كەكىلباەۆ سياقتى كەمەڭگەر تۇلعاعا قۇرمەت پەن وسىنداي جەرلەستەرىنىڭ بارلىعىنا دەگەن ۇلكەن ماقتانىش سەزىمدەرىن بايقادىق. «اي-انا» ەسكەرتكىش-ءمۇسىن الدىنداعى قوناقتاردى قارسى الۋ ءراسىمىن اۋىل اكىمى مەن وقۋشىلاردىڭ وزدەرى اتقاردى. وبلىس, اۋدان اكىمدەرى قوناقتاردىڭ اراسىندا تۇردى. بۇل نە دەگەن قۇرمەت, قانداي ىقىلاس پەن سۇيىسپەنشىلىك, قانشاما شىنايى سەزىم دەسەڭىزشى! مەكتەپتە دە ءدال وسىلاي بولدى. باستاۋىش سىنىپ وقۋشىلارى مەن مۇعالىمدەر ارنايى ازىرلەگەن قويىلىمدارىن كورسەتىپ, كەزىندە اتا-انالارى ىرىمداپ بالالارىنا ء«ابىش» دەپ ات بەرىپ, ابەكەڭنىڭ باتاسىن العان اتتاستارى ءابىش اتالارىنىڭ دا, وعان ارنالعان ولەڭدەرىن دە وقىپ, قوناقتاردى ريزا قىلدى. كلارا جۇمابايقىزى وبلىستاعى اۋدان كوللەدجدەرى مەن ليتسەيلەرىنىڭ ۇزدىك ستۋدەنتتەرىنە ارنايى تاعايىندالعان ءا.كەكىلباەۆ اتىنداعى ستيپەنديالاردى تابىس ەتتى.
كلارا جۇمابايقىزى ابەكەڭنەن «الاي بۇلاي بولا قالساڭ, سەنى نە قىلامىن, مىنا كىتاپتارىڭدى نە ىستەيمىن؟» دەگەنىنە ول ونشا ءمان بەرمەگەن كورىنەدى. ابىز ءابىش دۇنيەدەن وزعان سوڭ بۇل ماسەلە قايتا كوتەرىلەدى. ول ءوزىنىڭ قۇداي قوسقان ەرىمەن بىرگە جەرلەنۋىن قالاپ, ابەكەڭدى «ۇلتتىق پانتەونعا» جەرلەيمىز دەگەندە, وسى سۇراقتى تۋراسىنان قويىپ, تىپتەن ونداعى ەرلى-زايىپتىلاردى جەرلەۋ رەتى مەن باسىنا ورناتىلاتىن قۇلپىتاستارىنىڭ پىشىنىنە دەيىن ءوز پىكىرىن ايتىپ, ءبىراز ماسەلەنىڭ باسىن اشۋعا سەپتىگىن تيگىزىپتى. ول كىسى سونىمەن قاتار ءابىش كەكىلباي ۇلىنىڭ 80 جىلدىعىن اتاپ وتۋگە, مۋزەيىن اشۋ, ەسكەرتكىشىن تۇرعىزۋ ماسەلەلەرىنە دە ۇلكەن ءمان بەرىپ, الدىن الا قامدانىپ, ول قالاي وتەر ەكەن دەپ ۋايىمداپ, ونىڭ دۇرىس وتۋىنە بار كۇش-جىگەرىن جۇمسادى دەسەك, ارتىق ايتپاعان بولار ەدىك.
2019 جىلى وڭىرلەرگە العاشقى ساپارلارىنىڭ بىرىندە مەملەكەت باسشىسى ق.توقاەۆ ماڭعىستاۋ وبلىسىنا بارىپ, ءوڭىر باسشىلارى جانە قوعام وكىلدەرىمەن كەزدەسۋى كەزىندە ءا.كەكىلباەۆتىڭ 80 جىلدىق تويىنىڭ لايىقتى دەڭگەيدە وتەتىندىگىن ايتىپ, ابەكەڭدى «قازاقتىڭ ابىزى», قازاق ادەبيەتىنىڭ كلاسسيگى, ۇلتتىق ينتەلليگەنتسيانىڭ كورنەكتى وكىلى اتاۋى جانە كلارا جۇمابايقىزىن ءوزىنىڭ سول جاعىنا وتىرعىزۋى ونىڭ كوڭىلىن ورنىنا تۇسىرەدى. سونىڭ الدىندا قاسىم-جومارت كەمەل ۇلى سەنات توراعاسى رەتىندە دە ۇلتتىق كىتاپحانادا ءا.كەكىلباەۆ اتىنداعى زالدىڭ اشىلۋىنا كەلىپ قولداۋ كورسەتكەنىن دە ايتا كەتۋ كەرەك. پرەزيدەنت سوزىندە تۇردى. اۋەلى اقتاۋداعى ءىس-شارالارعا ءوزى ارنايى ات باسىن بۇرىپ, قازاقتىڭ ابىزى – ءابىشتىڭ ەسكەرتكىشى مەن مۋزەيىن اشىپ بەردى.
مەملەكەت باسشىسىنىڭ وسىنداي شىنايى ىقىلاسى مەن قولداۋى كلارا اپايعا قانات بىتىرگەنى راس. ول شارشاپ, دەنساۋلىعىنىڭ سىر بەرگەنىنە قاراماستان, اياعىنا وتا جاساتۋدان دا باس تارتىپ, تەك اراسىندا از ۋاقىتقا اۋرۋحاناعا جاتىپ الىپ, تىنىم تاپپاي دايىندىق جۇمىستارىن باسەڭدەتپەي, بارلىق ماسەلەلەردى ۇيلەستىرىپ, ولاردى شەشۋدە ناعىز قاجىرلىلىقتىڭ ۇلگىسىن كورسەتتى. الماتى, اقتاۋ, اتىراۋ جانە نۇر-سۇلتان قالالارىنداعى ءىس-شارالاردا ءسوز سويلەۋ, باق وكىلدەرىنە سۇحبات بەرۋ جانە تاعى باسقا ماسەلەلەر سول كۇز ايلارىندا كلارا اپايدىڭ كۇندەلىكتى ىسىنە اينالىپ كەتتى. كەيدە اراسىندا «وسى ءىس-شارانى لايىقتى دەڭگەيدە وتكىزسەم بولدى...» دەگەندى دە ايتىپ قالىپ ءجۇردى... سويتسە, ول بارلىق كۇش-جىگەرىن جيناپ, ابەكەڭنىڭ ارۋاعىن اسپانداتىپ, ەسىمىن ماڭگىلىك ەتۋدى ءوزىنىڭ ءومىرىنىڭ مانىنە اينالدىرسا كەرەك. تىپتەن ونى ءومىرىنىڭ سوڭعى مەجەسى رەتىندە بەلگىلەپ تە قويعانداي... سەگىز ايداي ۋاقىتتى ارالاتىپ, 2020 جىلعى شىلدەدە ءابىشتىڭ مۋزاسى ابىز ءابىشىنىڭ ارتىنان كەتە باردى... بۇل, شىن مانىندە, ۇلكەن ماحاببات جانە ناعىز ەرلىك ەدى! ول كوزى تىرىسىندە ءوز باعاسىن الدى – پرەزيدەنت ق.توقاەۆ كلارا جۇمابايقىزىنا ءوز قولىمەن «پاراسات» وردەنىن تابىس ەتتى.
پاندەميا ىندەتىنىڭ كەسىرىنەن كوپكە دەيىن بارۋدىڭ رەتى كەلمەي, بيىل 30 قازان كۇنى ءابىش كەكىلباەۆتىڭ قازاقستاننىڭ مەملەكەتتىك حاتشىسى بولىپ تۇرعانداعى حاتشىلىعىنىڭ قىزمەتكەرلەرى – كومەكشىسى تىلەكقابىل بورانعاليەۆ, كەڭەسشىلەرى باقىتجان ورداباەۆ, جاپسارباي قۋانىشەۆ جانە ابەكەڭنىڭ نەمەرەسى ابىل ءابىش كەكىلباەۆ پەن كلارا جۇمابايقىزىنىڭ باستارىنا بارىپ, دۇعا جاساتىپ, قۇران باعىشتاپ قايتتىق. ويتكەنى 1996 جىلدىڭ ءدال وسى كۇنى ءابىش كەكىلباەۆتى مەملەكەتتىك حاتشى ەتىپ تاعايىنداۋ تۋرالى پرەزيدەنتتىڭ جارلىعى شىققان بولاتىن. سول جارلىق ءبىزدىڭ باسىمىزدى قوسىپ ەدى. 2019 جىلعى ابىز ءابىشتىڭ 80 جىلدىعىنىڭ قارساڭىندا ماڭعىستاۋ وبلىسىندا وتكەن ۇلكەن جيىنداردىڭ بىرىندە كلارا جۇمابايقىزى ۇشەۋىمىزدى ء«ابىشتىڭ بالالارى» دەپ اتاپ, ءبىزدىڭ مارتەبەمىزدى كوتەرىپ, ۇلكەن قۇرمەتكە بولەگەن ەدى. سوندىقتان ەكەۋىنىڭ, ليرا مەن مۋزانىڭ, قاتار جاتقانىن كورۋ, ولارعا تاعزىم ەتۋ ءبىز ءۇشىن وتە ماڭىزدى بولاتىن. كوڭىلىمىز ورنىنا ءتۇسىپ, ساعىنىشىمىزدى باسىپ قايتتىق... الاقانىمىزدى جايىپ وتىرعاندا ولىگە يمان, تىرىگە بەرەكەت بەرىپ, اتا-بابامىزدىڭ ارۋاعى قولداپ, قۇدىرەتى مول قۇدايدان تۋعان جەرىمىزدى بەكەم, ەلىمىزدى امان ەتە گور دەپ دۇعا تىلەدىك!
جاپسارباي قۋانىشەۆ,
قوعام قايراتكەرى
