ءوزىنىڭ قازاقستان رەسپۋبليكاسىنا ءىسساپارى اياسىندا اكادەمياعا ارنايى كەلگەن مەحمەت سۇرەيا ەر ۇيىمنىڭ جاڭا عيماراتىمەن تانىسىپ, تۇركى مۋزەيىن ارالاپ كوردى.
مارتەبەلى مەيمانمەن كەزدەسكەن تۇركى اكادەمياسىنىڭ باسشىسى دارحان قىدىرالى تۇركپا باس حاتشىسىن جاڭا قىزمەتىنە كىرىسۋىمەن قۇتتىقتاپ, الداعى جۇمىستارىنا ساتتىلىك تىلەدى. سونىمەن قاتار, ول ءوز سوزىندە بۇگىندەرى تۇركى اكادەمياسى مەن تۇركپا اراسىنداعى ىنتىماقتاستىق جوعارى دەڭگەيدە جولعا قويىلعانىنا, كوپتەگەن تابىستى جوبالار ىسكە اسىرىلعانىنا توقتالدى. ەكى قۇرىلىمنىڭ ارىپتەستىك بايلانىسى ناتيجەسىندە تۇركى ەلدەرىنىڭ ماتەريالدىق ەمەس مۇراسىن قورعايتىن مودەلدىك زاڭ جوباسى ازىرلەنگەنىن ايتتى.
ءوز كەزەگىندە تۇركپا-نىڭ باس حاتشىسى مەحمەت سۋرەيا حالىقارالىق تۇركى اكادەمياسىنىڭ تۇركى حالىقتارىن ودان ءارى جاقىنداستىرۋ مەن ىقپالداستىرۋ, ينتەگراتسيانىڭ تۇجىرىمدامالىق نەگىزدەرىن دايىنداۋ, عىلىم مەن ءبىلىم سالاسىنداعى ىنتىماقتاستىقتى جولعا قويۋ باعىتتارىندا ماڭىزى زور ۇيىم ەكەنىن اتاپ ءوتتى.
ەكى جاقتى كەزدەسۋدە تاراپتار سەرىكتەس ۇيىمداردىڭ اتقارىپ جاتقان جۇمىستارى مەن باستامالارى تۋرالى پىكىرلەسىپ, تۇركى اكادەمياسى مەن تۇركپا حاتشىلىعى اراسىنداعى ىنتىماقتاستىقتى ودان ءارى نىعايتا ءتۇسۋ جولدارىن تالقىلادى.
سونىمەن قاتار ۇيىم باسشىلارى باۋىرلاس ەلدەر اراسىنداعى عىلىمي ىقپالداستىقتى دامىتا تۇسۋگە باعىتتالعان بىرلەسكەن ءىس-شارالار وتكىزۋگە ۋاعدالاستى.
كەزدەسۋ سوڭىندا دارحان قىدىرالى تۇركپا باس حاتشىسىنا تۇركى اكادەمياسى شىعارعان باعالى باسىلىمداردى تارتۋ ەتتى.
