وسى بايقاۋعا قاتىسقان اقتوعاي اۋدانىنداعى تاسارال اۋىلىنىڭ اكىمى نۇرجان سەيىتوۆ «ۇزدىك شارۋاشىل اكىم» اتالىمى بويىنشا جەڭىمپاز اتاندى.
اقتوعايلىق اكىمنىڭ جاسى وتىزدان ەندى اسقان. مەملەكەتتىك قىزمەتتە 2015 جىلدان بەرى ەڭبەك ەتەدى. تاسارال اۋىلدىق وكرۋگىنىڭ اكىمى قىزمەتىندە جۇرگەنىنە بيىل ءتورت جىل بولىپتى.
نۇرجان سەيىتوۆ ءتورت بالانى تاربيەلەپ وتىرعان ۇلگىلى وتباسىنىڭ وتاعاسى. زايىبى تاسارالداعى مەكتەپتە مۇعالىم بولىپ جۇمىس ىستەيدى.
تاسارال اۋىلىنىڭ تاريحى تەرەڭنەن سىر تارتادى: ونىڭ ىرگەسى 1929 جىلى قالانعان. بۇگىندە اۋىلدا 423 ادام تۇرادى.
كوكشە تەڭىزدىڭ جاعاسىنداعى اياداي اۋىلدا 13 شارۋا قوجالىعى جانە ءۇش جەكەمەنشىك كاسىپورىن جۇمىس ىستەيدى, ولاردىڭ ەكەۋى بالىق اۋلاۋمەن اينالىسادى. بۇدان بولەك, تاسارالدا ناۋبايحانا, شاشتاراز بار.
تاسارالدىڭ جاس اكىمنىڭ الداعى ۋاقىتتاعى جوسپارىندا مەكتەپتە قوسالقى سىنىپتارعا ارنالعان ءۇي-جايلار سالۋ بار. سەبەبى بالا سانى جىلدان-جىلعا ءوسىپ كەلەدى. ال بالاباقشا كەلەسى جىلى ايقارا ەسىك اشپاقشى. اۋىلدا بالا سانى عانا ەمەس, تۇرعىندار قاتارى دا كوبەيىپ كەلەدى. ياعني جاڭا ادامدار كوشىپ كەلۋدە. مۇنىڭ ءوزى تاسارالدا تىرشىلىكتىڭ قازانى قايناپ جاتقانىن اڭداتسا كەرەك.
سونداي-اق اۋىل اكىمى الداعى ۋاقىتتا جىلۋ قازاندىعىن قايتا جاڭارتۋدى جانە ءبىرىنشى كەزەكتە كوپبالالى وتباسىلاردىڭ ءۇيىن جىلۋعا قوسۋدى قولعا الماقشى. «باستى ماقسات – اۋىل تۇرعىندارىنىڭ ءومىرىن جاقسارتۋ», دەيدى جاس اكىم.
قاراعاندى وبلىسى,
اقتوعاي اۋدانى,
تاسارال اۋىلى
