زاڭ كومەگىن دامىتۋ جونىندەگى تىڭ تاسىلدەر

اۋقىمدى ءىس-شاراعا قۇقىق قور­­عاۋ, سوت جۇيەلەرى, اتقارۋشى جانە زاڭ شىعارۋشى بيلىك تارماق­تا­رىنىڭ وكىلدەرى, جەتەكشى حالىق­ارالىق جانە ۇلتتىق ساراپشىلار, سونداي-اق پولشا, رەسەي, گرۋزيا جانە وتاندىق ادۆوكاتۋرانىڭ وكىلدەرى قاتىستى. فورۋمدا ادۆو­كات­تىق قىزمەتتى تسيفر­لاندىرۋ, ادۆوكاتتاردىڭ تاۋەلسىزدىگى, ونلاين سوت تورەلىگى كەزىندەگى جۇمىسى جانە جاڭا تاسىلدەر, سونداي-اق ەلىمىزدە زاڭگەر كومەگىن الۋدى دامىتۋ ما­سەلەلەرى تالقىلاندى.

فورۋمدا رەسپۋبليكالىق ادۆوكاتتار القاسى توراعاسىنىڭ مىن­دەتىن اتقارۋشى اسەل توقاە­ۆا مۇنداي اۋقىمدى ءىس-شارالار­دىڭ ماڭىزدىلىعىن ءسوز ەتتى. ال نۇر-سۇلتانداعى ەقىۇ باعدار­لا­ما­لار ءوفيسىنىڭ باسشىسى فولكەر فروبارت قازىرگى تاڭدا قازاق­ستان­نىڭ ادۆوكاتۋراسى قارقىندى دامىپ كەلە جاتقانىن ايتتى.

VI قازاقستاندىق ادۆوكاتتار فورۋمىنا قاتىسقان شەتەلدىك ساراپ­شىلار بۇگىندە ادۆوكاتۋرانىڭ ال­­­دىندا تۇرعان نەگىزگى سىن-تە­گەۋ­­رىن­دەرگە توقتالدى. جيىنعا پول­­شا ەلىنەن ونلاين قوسىلعان ەۋروپالىق ادۆوكاتتار قاۋىمداس­تى­­عىنىڭ پرەزيدەنتى ماريا سلازاك ەۋروپا ەلدەرىندەگى ادۆوكاتۋرانىڭ ينستيتۋتسيونالدىق تاۋەلسىزدىگىن دامىتۋ پەرسپەكتيۆالارى تۋرالى ايتا كەلىپ: «تاۋەلسىز زاڭ ما­ماندىعى جوق ەلدە تاۋەلسىز سوت جۇيەسى, زاڭنىڭ ۇستەمدىگى, ادىلەت­تى­لىك, دەموكراتيا جانە بوستاندىق بولمايدى», دەدى.

م.سلازاك قازىرگى تاڭدا ەۋرو­پا­­لىق ادۆوكاتتار ءۇشىن كاسىبي قۇ­پيانى بۇزۋ جانە «ۇلتتىق قاۋىپ­سىزدىك» تەرمينىن قولدانۋعا بايلانىستى قاۋىپتەر بار ەكەنىن جەتكىزدى. سونداي-اق ول: «ادۆوكاتۋرا پوپۋليزمنەن جانە ادۆوكاتتاردىڭ قۇقىقتارىن شەكتەيتىن توتەنشە جاعدايدى دۇرىس پايدالانباۋ­دان زارداپ شەگىپ وتىر. وسى ما­سە­لەلەردى ادۆوكاتتار قىزمەتىنە ۇلت­تى جا­نە حالىقارالىق ۇيىم­دار مەن سوت­تاردىڭ بەلسەندى قا­تىسۋى, تسيفر­لى تاۋەلسىزدىكتى قام­­تاماسىز ەتۋ جانە حالىقارالىق ىن­تى­ماق­تاس­تىقتى كەڭەيتۋ ارقىلى شەشۋگە بولادى», دەدى.

جيىندا پاۆلودار وبلىستىق ادۆوكاتتار القاسىنىڭ ادۆوكاتى گۇلميرا سۇلتانبەكوۆا قا­زاق­ستان ادۆوكاتۋراسىنىڭ ينستي­­تۋ­تسيو­نالدىق تاۋەلسىزدىگىن سترا­­تە­­گيا­لىق دامىتۋ جانە نى­عاي­تۋ­­عا قاتىستى بايانداما جاساسا, شىم­­كەنت قالالىق ادۆوكاتتار ال­­قا­سىنىڭ ادۆوكاتى ساپار امىر­تاەۆ ەلىمىزدە زاڭ كومەگىن دا­مى­تۋ جانە ونىڭ ساپاسىن ارتتىرۋ جو­نىن­دە­گى ۇسىنىستارىن ورتاعا سالدى. س.امىر­تاەۆ ادۆوكاتۋرانىڭ مەم­لە­كەت­تىك, وكىلدى, قۇقىق قورعاۋ جانە سوت ورگاندارىنداعى وكىل­دى­گىن كۇ­شەي­تۋ قاجەتتىگىنە ەرەكشە توقتالدى.

فورۋمدا وسى سالاداعى باستى ماسە­لەلەردى ءسوز ەتكەن الماتى قا­­­لا­لىق ادۆوكاتتار القاسىنىڭ اد­ۆوكا­تى دانيار قانافين ەلىمىز­دە «مەملەكەتتىك» ادۆوكاتۋرا قۇ­رۋ مۇمكىندىگى بار ەكەنىن ايتتى.

سونىمەن قاتار ول قىلمىس­تىق پروتسەستەگى ادۆوكاتتىڭ ءرولى ونىڭ قىلمىستىق سوت تورەلىگىندەگى مارتەبەسىنە سايكەس كەلمەيتىنىن دە اشىق مالىمدەدى. ساراپشى وسى ماسەلەلەردى شەشۋ ءۇشىن اد­ۆو­كاتتىق قوعامداستىقتىڭ ءوزىن ءوزى باس­قارۋ ماسەلەلەرىنە ورىنسىز ارا­لاسۋدى بولدىرماۋدى, ولاردىڭ كاسىبي قىزمەتىنە بايلانىستى قول­سۇعىلماۋشىلىق كەپىلدىكتەرىن كۇشەيتۋدى ۇسىندى. «ادۆوكاتتى جەدەل ىز­دەس­تىرۋ قىزمەتىن جۇزەگە اسى­­را­تىن ورگاندارمەن جاسى­­رىن ىن­تى­ماقتاستىققا تارتۋعا تى­يىم سالۋ كەرەك. سونداي-اق قىل­مىس­تىق ءىس جۇرگىزۋ كودەكسىندە ادۆو­كات­­تاردىڭ مەملەكەتتىك قۇپيالارعا باي­لانىستى ىستەر بويىنشا قاتىسۋ ءتار­تىبىن رەتتەگەن ءجون», دەدى.

فورۋم بارىسىندا De Facto اد­ۆوكاتتىق كەڭسەسىنىڭ باسقارۋشى سەرىكتەسى, قازاقستان رەسپۋبليكاسى جوعارعى سوتى كەڭەسىنىڭ جانىن­دا­عى بىلىكتىلىك كوميسسياسىنىڭ مۇ­شەسى سەرگەي سيزينتسەۆ ادۆوكاتۋرا ءۇشىن جاپپاي تسيفرلاندىرۋدىڭ ارتىقشىلىقتارى مەن قاۋىپتە­رى­نە توقتالدى.

ءوز كەزەگىندە بريۋسسەل ادۆوكاتتار القاسىنىڭ مۇشەسى الەكس تاللون ادۆوكاتۋرانىڭ الدىندا تۇرعان سىن-قاتەرلەرگە تالداۋ جاساپ, الداعى بەس جىلدا زاڭ كومەگىنىڭ ساپاسىن ارتتىرۋدىڭ ءتيىمدى شەشىمدەرىن ۇسىندى. زاڭ كومەگىن تسيفرلاندىرۋ ماسەلە­لە­رىنە باسا نازار اۋدارعان ول: «تسيفرلاندىرۋ زاڭدى پلاتفورمالاردى جانە جاساندى ينتەللەكتى پايدالانۋدى كوزدەيدى. قۇقىقتىق پلاتفورمالار دەگەنىمىز – ونلاين رەجىمىندە ۇسىنىلاتىن زاڭگەرلىك قىزمەتتەر, زاڭگەرلىك فيرمالار ۇيىمداستىرعان الاڭدار جانە ءۇشىنشى تاراپتىڭ پلاتفورمالارى. ادۆوكاتتىق قىزمەتكە جا­ساندى زەردەنى ەنگىزۋ زاڭ كاسىبىنىڭ ءداستۇرلى شەڭبەرىنەن تىس زاڭ قىز­مەتتەرىن كورسەتۋگە مۇمكىندىك بە­رەدى», دەدى.

سونداي-اق فورۋمدا COVID-19 پاندەمياسى كەزىندە ادۆوكاتۋ­رانىڭ ينستيتۋتسيونالدىق تۇراق­تىلىعى تۋرالى ءسوز سويلەگەن رە­سەي فەدەرالدىق ادۆوكاتتار پا­لا­تاسىنىڭ پرەزيدەنتى يۋري پي­ليپەنكو ادۆوكاتتاردىڭ كاسىبي تاۋەلسىزدىگىن قامتاماسىز ەتۋ بو­يىنشا ءوز ەلىنىڭ تاجىريبەسىمەن ءبو­لىستى. ال گرۋزيا ادۆوكاتتار قا­ۋىمداستىعىنىڭ ەكس-پرەزيدەنتى زازا حاتياشۆيلي اتالعان ەلدەگى زاڭ قىزمەتتەرىنىڭ ساپاسىن قامتاما­سىز ەتۋ جانە زاڭ كومەگىن كورسەتۋ جونىندەگى جاڭا تاسىلدەردى تانىس­تىرىپ ءوتتى. ال باتىس قازاقستان وبلىستىق ادۆوكاتتار القاسىنىڭ مۇشەسى ابزال قۇسپان تسيفرلى تەحنولوگيانىڭ زاڭ قىزمەتى سالاسىنا تيگىزگەن اسەرى جانە بولاشاقتا ءسوزسىز بولاتىن وزگەرىستەر تۋرالى ايتتى.

ءىس-شارا سوڭىندا قاتىسۋشىلار وسىنداي فورۋمنىڭ ماڭىزدى ەكە­نىنە نازار اۋدارىپ, جيىن بارىسىندا ايتىلعان ۇسىنىس-پىكىرلەر ادۆوكات قىزمەتىن جەتىلدىرۋگە تىڭ سەرپىن بەرەتىنىنە سەنىم ءبىلدىردى.