قالاداعى №1 وتباسىلىق دەنساۋلىق ورتالىعىنا ءبىرىنشى كۇنى Comirnaty ۆاكتسيناسىنىڭ ءبىرىنشى جانە ەكىنشى كومپونەنتىنىڭ 60 دوزاسى جەتكىزىلگەن بولاتىن. ونىڭ ءبىر قۇتىسى التى ادامعا ارنالعان. مەديتسينالىق مەكەمە بارلىق قاجەتتى ستاتسيونارلىق جانە جىلجىمالى توڭازىتقىش قۇرالدارىمەن جابدىقتالعان جانە ولار مەكتەپتەرگە بارىپ جۇمىسقا كىرىسۋگە دايىن. اتالعان مەديتسينالىق مەكەمەنىڭ ديرەكتورى تاتيانا باشيروۆا العاشقى مەديتسينالىق-سانيتارلىق كومەك كورسەتۋ ورتالىعىنا 82 مىڭنان استام ادام تىركەلگەنىن, ونىڭ ىشىندە 4 500 ءجاسوسپىرىم جانە 500-دەن استام جۇكتى ايەل بار ەكەنىن ايتادى.
– ۆاكتسينالاۋ پۋنكتى ماۋسىم-شىلدە ايلارىندا حالىقتى بەلسەندى يممۋنداۋ كەزەڭىندە كۇنىنە 500 ادامعا دەيىن قىزمەت كورسەتتى. بىزدە بۇل ءۇشىن قاجەتتىنىڭ ءبارى بار. مەن اتا-انالاردى ۆاكتسينا الۋ تۋرالى اقپاراتتى مۇقيات قاراپ, دۇرىس تاڭداۋ جاساۋعا شاقىرامىن. بۇل ۆاكتسينا اقش, كانادا, فرانتسيا, گەرمانيا, بەلگيا, ارمەنيا جانە باسقا ەلدەردە بالالاردى يممۋنداۋ ءۇشىن بەلسەندى قولدانىلادى. جالپى, ۆاكتسينالاۋ ءبىزدى اۋرۋدان قورعاۋعا كومەكتەسەدى, – دەيدى مەكەمە باسشىسى.
قاراعاندىداعى ۆاكتسينالاۋ بەكەتتەرى قالا ەمحانالارى مەن وتباسىلىق دەنساۋلىق ورتالىقتارىندا بەلسەندى جۇمىسىن قايتا باستادى, سونداي-اق ولار مەكتەپتەردە دە ورنالاستىرىلاتىن بولادى. ەكپەنى العاش العان جاستاردىڭ ىشىندە قاراعاندى ماشينا جاساۋ كوللەدجىنىڭ ءۇشىنشى كۋرس ستۋدەنتى الەكساندر مارياحين دە بولدى. ون جەتىدەگى ورەن نەلىكتەن ۆاكتسينا الۋعا شەشىم قابىلداعانى جايلى بىلايشا ايتىپ بەردى:
– باقىتىمىزعا وراي, مەنىڭ جاقىندارىمنىڭ ەشقايسىسى كوروناۆيرۋس ينفەكتسياسىمەن اۋىرمادى. ءبىزدىڭ وتباسىمىزدا ءبارى ەگىلدى. مەن ءوزىمدى جانە تۋىستارىمدى قورعاۋ ءۇشىن ۆاكتسينا الۋعا شەشىم قابىلدادىم, ويتكەنى ەشكىم اۋرۋدان ساقتاندىرىلماعان. مەنىڭ قۇرداستارىم يممۋنداۋعا باسقاشا قارايدى. بىراق مەنىڭ ويىمشا, ۆاكتسينالاۋ قازىر قاجەت.
سونداي-اق 17 جاستاعى دانيل كوۆالچۋكتىڭ اناسى ناتاليا دا تەك يممۋنداۋ ارقىلى اۋرۋدى جەڭۋگە نەمەسە كەم دەگەندە ونىڭ اعىمىن جەڭىلدەتۋگە بولاتىنىن نىق سەنىممەن ايتادى.
– مەنىڭ ۇلىم سپورتشى, باسكەتبولمەن اينالىسادى. پاندەمياعا بايلانىستى ول جارىستارعا بارۋىن توقتاتتى. ءبىز ءبارىمىز بەتپەردە مەن شەكتەۋلەردەن شارشادىق. قالىپتى ومىرگە ورالعىمىز كەلەدى. ۇلىم ءوزى ۆاكتسينا الۋعا بەل بۋدى, ويتكەنى ونىڭ كوز الدىندا تۋعان تاتەسى ەكى رەت كوروناۆيرۋسپەن اۋىردى. مەن ونى قولدايمىن, ويتكەنى بۇل ۆاكتسينا زەرتتەلگەن, ددۇ ماقۇلداعان, – دەدى ناتاليا.
رەسمي مالىمەتكە ساي, Pfizer/BioNTech-Comirnaty جاڭا ۆاكتسيناسىن العاشقى كۇنى 31 ءجاسوسپىرىم مەن بالا ەمىزەتىن 10 ايەل الدى.
قاراعاندى
