جۋىردا ىستانبۇلدا Win Eurasia حالىقارالىق كورمەسى ۇيىمداستىرىلدى. اتالعان شاراعا قازاقستاننان ارنايى دەلەگاتسيا بارىپ قاتىستى. وتانداستارىمىز كورمە اياسىندا تۇركيالىق جانە وزگە دە مەملەكەتتەردىڭ ماشينا جاساۋ سالاسىنداعى كاسىپورىندارى وكىلدەرىمەن كەزدەستى. ءبىزدىڭ تاراپتان بۇل شاراعا قازاقستان ماشينا جاساۋشىلار وداعىنىڭ باسقارما توراعاسى م.پىشەمباەۆ, Maker جانە «استانا ەلەكترتەحنيكالىق زاۋىتى» كاسىپورىندارىنىڭ باسشىلارى, Kazakh Invest ۇلتتىق كومپانياسىنىڭ وكىلدەرى قاتىستى.
قازاقستان ماشينا جاساۋشىلار وداعىنىڭ ءباسپاسوز قىزمەتى حابارلاعانداي, ءبىزدىڭ دەلەگاتسيا تۇركيا ماشينا جاساۋ فەدەراتسياسى (MAKFED) ديرەكتورلار كەڭەسىنىڭ توراعاسى ادنان دالگاكيرانمەن, سونداي-اق بەلگىلى ماشينا جاساۋ كاسىپورىندارىنىڭ باسشىلارىمەن كەزدەسۋلەر وتكىزگەن.
– كەزدەسۋ بارىسىندا قازاقستان مەن تۇركيا اراسىنداعى ەكونوميكالىق بايلانىستاردى دامىتۋعا باعىتتالعان ماشينا جاساۋداعى ىنتىماقتاستىق ماسەلەلەرى تالقىلاندى. تۇركيالىق ارىپتەستەرگە قازاقستاننىڭ ماشينا جاساۋ سالاسىنداعى ءوندىرىس كولەمىنىڭ جىل وتكەن سايىن ارتىپ كەلە جاتقانى باياندالدى. سونداي-اق يمپورت كولەمى تۋرالى اقپارات بەرىلدى. 2020 جىلى قازاقستاننىڭ يمپورتى 38 ملرد دوللارعا تەڭ بولدى. ونىڭ 17 ملرد دوللارى ماشينا جاساۋ ونىمدەرىنىڭ يمپورتىنا تيەسىلى. بۇل ەلدەگى جالپى يمپورت كولەمىنىڭ 45 پايىزىن قۇرايدى. سالادا سۇرانىس بار. سوندىقتان دامۋ مەن ينۆەستيتسيالىق ىنتىماقتاستىقتىڭ الەۋەتى دە جوعارى, – دەدى مەيرام پىشەمباەۆ.
بۇدان بولەك قازاقستاندىق دەلەگاتسيا كەزدەسۋگە قاتىسۋشىلارعا ونەركاسىپتىك كووپەراتسيانىڭ پەرسپەكتيۆالارى, مۇناي-گاز جانە تاۋ-كەن مەتاللۋرگياداعى ماشينا جاساۋدىڭ ءوزارا ءتيىمدى ىنتىماقتاستىعى تۋرالى باياندادى.
– ءبىز شەتەلدىك ينۆەستورلاردى وزىق تەحنولوگيالار مەن قۇزىرەتتەردى ترانسفەرتتەۋگە, قازاقستاننىڭ جانە بولاشاقتا ەۋرازيالىق ەكونوميكالىق وداققا مۇشە ەلدەردىڭ نارىعىن بىرلەسىپ دامىتۋعا شاقىرامىز, – دەيدى قازاقستان ماشينا جاساۋشىلار وداعىنىڭ باسقارما توراعاسى.
MAKFED ديرەكتورلار كەڭەسىنىڭ توراعاسى ادنان دالگاكيران قازاقستاندى باۋىرلاس ەل ءارى تۇركيانىڭ نەگىزگى سەرىكتەسى سانايتىنىن, سوندىقتان قازاقستاندا الەۋەتتى جوبالاردى ىسكە اسىرۋ مۇمكىندىكتەرىن پىسىقتاۋعا ءازىر ەكەنىن جەتكىزدى. ءوز كەزەگىندە قازاقستاندىق دەلەگاتسيا شەتەلدىك ارىپتەستەرىن كەلەر جىلى وتەتىن قازاقستان ماشينا جاساۋشىلارىنىڭ ح فورۋمىنا جانە حالىقارالىق Kazakhstan Machinery Fair-2022 ماشينا جاساۋ جانە مەتالل وڭدەۋ مامانداندىرىلعان كورمەسىنە قاتىسۋعا شاقىردى.
كەلىسسوزدەر ناتيجەسىندە Maker جشس-ءنىڭ باسقارما توراعاسى ج.بايعابىلوۆ تۇركيانىڭ Okerel جانە Pres-San كومپانيالارىمەن مەموراندۋمعا قول قويدى. بۇل كەلىسىم بيزنەستىڭ جاڭا ۇزاق مەرزىمدى سەرىكتەستىك قاتىناستارىن ورناتۋعا, سونداي-اق قازاقستان مەن تۇركيانىڭ ماشينا جاساۋ سالاسىنداعى كاسىپورىندارىمەن بىرلەسكەن جوبالاردى جۇزەگە اسىرۋعا باعىتتالعان.
