قر سىرتقى ىستەر مينيسترلىگى بۇۇ ەسىرتكى جانە قىلمىس جونىندەگى باسقارماسىمەن بىرلەسىپ, بۇۇ ەسىرتكى جانە قىلمىس جونىندەگى باسقارماسىنىڭ ديرەكتورى, بۇۇ ۆەنا بولىمشەسىنىڭ باس ديرەكتورى – گادا فاتحي ۆالي حانىمنىڭ ساپارى اياسىندا «قاقتىعىس ايماقتارىنان قايتارىلعان ازاماتتاردى, ولاردىڭ وتباسى مۇشەلەرىن قىلمىستىق قۋدالاۋ, وڭالتۋ جانە رەينتەگراتسيالاۋ ماسەلەلەرى بويىنشا جوعارى دەڭگەيدەگى ديالوگ. قازاقستان رەسپۋبليكاسىنىڭ تاجىريبەسى» تاقىرىبىندا دوڭگەلەك ۇستەل وتكىزدى.
قر اقدم ءدىن ىستەرى كوميتەتى توراعاسىنىڭ ورىنباسارى باۋىرجان باكىروۆ «جۋسان» وپەراتسياسى اياسىندا تەرروريستىك بەلسەندى ايماقتاردان قايتارىلعان ازاماتتاردى وڭالتۋ جانە رەينتەگراتسيالاۋ جاعدايى تۋرالى بايانداما جاسادى.
ءىس-شاراعا قر پرەزيدەنتىنىڭ كومەكشىسى ەرلان قارين, سىرتقى ىستەر ءمينيسترىنىڭ ورىنباسارى اقان راحمەتۋللين, مەملەكەتتىك ورگانداردىڭ وكىلدەرى, حالىقارالىق ۇيىمدار مەن ديپلوماتيالىق ميسسيالاردىڭ مۇشەلەرى قاتىستى. مودەراتور رەتىندە قر ادام قۇقىقتارى جونىندەگى ۋاكىلى ەلۆيرا ءازىموۆا بولدى.
ەسكە سالا كەتسەك, 2019 جىلى ازاماتتارىمىزدى تەرروريستىك بەلسەندى ايماقتاردان قايتارۋ بويىنشا «جۋسان» گۋمانيتارلىق وپەراتسياسى باستالدى. وپەراتسيا ناتيجەسى بويىنشا بۇگىنگى كۇنى ەلگە 700-دەن استام ازامات ورالدى, ولاردىڭ باسىم بولىگى - ايەلدەر مەن بالالار.
