كونفەرەنتسيا بارىسىندا بىلىكتى ماماندار جۇيكە جۇيەسى اۋرۋلارىنىڭ تارالۋى, ولاردى ەمدەۋ جانە قالپىنا كەلتىرۋ شارالارى بويىنشا تاجىريبە الماستى.
ەلىمىزدە سوڭعى جىلدارى ينسۋلت ورتالىقتارى كوپتەپ اشىلىپ جاتىر. بۇگىندە ونىڭ سانى جەتپىسكە جەتتى. ءۇشىنشى مەگاپوليس سانالاتىن شىمكەنتتە 3 ينسۋلت ورتالىعى بار. مۇنداي ورتالىقتاردىڭ اشىلۋى ينسۋلتتەن كەلەتىن ءولىمنىڭ سانىن ازايتتى دەيدى ماماندار.
«جىل ساناپ ەلىمىزدە ينسۋلت ورتالىعىنىڭ كوبەيۋى اۋرۋدان كەلەتىن ءولىمنىڭ سانىن تومەندەتتى. دەگەنمەن, بۇل سىرقاتتان كەلەتىن قاۋىپ ءالى دە وتە جوعارى. الەمدى جايلاعان پاندەميا كەزىندە بىزدەگى تەلەمەديتسينا سالاسى ءبىرشاما دامىدى. تەلەمەديتسينا ارقىلى بىلىكتى ماماندارىمىز اۋىر جاعدايداعى ناۋقاستاردى ەمدەۋ جولدارى بويىنشا تاجىريبە ءبولىسىپ, مۇمكىندىگىمىز ارتتى», دەيدى ەلىمىزدىڭ باس نەۆرولوگى ساۋلە توعىسبەكوۆا.
شەتەلدىك ماماندار قازاقستاندىق ارىپتەستەرىنە حالىقارالىق تاجىريبەدەگى ەمدەۋ حاتتاماسى مەن بىلىكتىلىكتى جەتىلدىرەتىن تەگىن جوبالارمەن ءبولىستى. COVID-19 ينفەكتسياسىنىڭ تارالۋى, ونىڭ اسقىنۋىنان پايدا بولاتىن نەۆرولوگيالىق اۋرۋلار تۋرالى دا پىكىر الماستى. ەكى كۇنگە سوزىلعان جيىندا قىرىققا جۋىق مامان بايانداما وقىدى. ولاردىڭ ەمدەۋ جۇمىستارى جونىندە ءتۇرلى ماقالالار جاريالاندى.
