اقش-تىڭ لاس-ۆەگاس قالاسىنداعى Michelob ULTRA Arena-دا وتكەن بوكس كەشىندە شارشى الاڭعا كوتەرىلگەن جانىبەك ءالىمحان ۇلى ورتا سالماقتاعى بۇرىنعى الەم چەمپيونى, شىققان تەگى كامەرۋندىق, بىراق فرانتسيا ازاماتتىعىن العان حاسسان ن’دام ن’جيكاممەن جۇدىرىقتاسىپ, 8-راۋندتا تەحنيكالىق نوكاۋتپەن جەڭىسكە جەتتى.
كەزدەسۋ باستالا سالا رينگ قوجايىنى كىم ەكەنىن اڭعارتقان وتانداسىمىز ارداگەر بوكسشىنى ء«ا» دەگەننەن ابدىراتىپ قويدى. شارشى الاڭنىڭ بۇرىش-بۇرىشىنا قاشىپ ءجۇرىپ جۇدىرىقتاسقان حاسسان قالاي سوققى جاسايمىن دەپ ەمەس, راۋند بويى قالاي قورعانسام ەكەن دەپ باس قاتىرۋمەن بولدى. رينگتە ءوزىن ەركىن سەزىنگەن جانىبەك ءۇشىنشى راۋندتا بۇرىشقا قاراي ۇمتىلا بەرگەن قارسىلاسىن ورتاعا شاقىرىپ, جىگىتتەرشە ايقاسۋدى ۇسىندى. اشىق بوكس كەزىندە ءتاۋىر سوققى جاسايتىن قانداسىمىز وڭتايلى ءساتتى ءتيىمدى پايدالانىپ, فرانتسيالىق بوكسشىنى نوكداۋنعا جىبەردى. تەز ەسىن جيىپ ۇلگەرگەن حاسسان تورەشىگە كەزدەسۋدى ءارى قاراي جالعاستىرۋعا نيەتتى ەكەنىن ايتتى.
قارسىلاسىنىڭ الەۋەتى بەلگىلى بولعاننان كەيىن جانىبەك جويقىن سوققىلارىن ازايتىپ, جانكۇيەرلەر ءۇشىن جەكپە-جەكتى سوزۋعا تىرىستى. بىراق حاسساننىڭ شاماسى تەك 8-راۋندقا دەيىن جەتتى. بۇل ءۇش مينۋتتىقتا ن’جيكامنىڭ مۇرنىنان قان, اياعىنان ءال كەتە باستاعان ەدى. سونى بايقاعان تورەشى جانىبەكتىڭ كەزەكتى سەريالى سوققىسىنان كەيىن جەكپە-جەكتى توقتاتۋعا ءماجبۇر بولدى. تەحنيكالىق نوكاۋت!
وسىلايشا, 28 جاستاعى قازاقستاندىق بوكسشى كاسىپقوي بوكستاعى 11-جەڭىسىنە قول جەتكىزىپ, وزىنە تيەسىلى WBO Global بەلبەۋىن ءساتتى قورعادى. سونىمەن قاتار جانىبەك WBC Continental تيتۋلىنىڭ يەگەرى سانالادى. 37 جاستاعى ن’جيكام وسىمەن التىنشى مارتە جەڭىلدى.
ال گەرمانيانىڭ گامبۋرگ قالاسىندا وتكەن بوكس كەشىندە ونەر كورسەتكەن اۋىر سالماقتاعى قازاقستاندىق جان كوسوبۋتسكي دە دومينيكاندىق قارسىلاسى الەكسيس گارسيانى تەحنيكالىق نوكاۋتپەن جەڭدى. ون راۋندقا ەسەپتەلگەن ايقاس بەسىنشى راۋندتا اياقتالدى. وتانداسىمىز العاش ا.گارسيانى ءتورتىنشى راۋندتا نوكداۋنعا تۇسىرسە, بەسىنشى راۋندتا تەحنيكالىق نوكاۋتپەن جەڭدى.
بۇعان دەيىن WBA International تيتۋلىنا يە بولعان كوسوبۋتسكي وسى جەڭىسىنىڭ ارقاسىندا WBC International Silver بەلبەۋىن دە يەلەندى.
