ايماقتار • 21 قاراشا، 2021

قاراعاندىدا مايتالمان سپورتشىلار ماراپاتتالدى

117 رەت كورسەتىلدى

قاراعاندى وبلىسىنىڭ اكىمى جەڭىس قاسىمبەك  جىل قورىتىندىسى بويىنشا ۇزدىك دەپ تانىلعان ءبىر توپ سپورتشى مەن جاتتىقتىرۋشىنى قابىلداپ، ولارعا العىس حاتتار مەن اقشالاي سەرتيفيكاتتار تابىس ەتتى، دەپ جازادى Egemen.kz.

تۇڭعىش پرەزيدەنت كۇنى مەرەكەسى جانە تاۋەلسىزدىكتىڭ 30 جىلدىعى مەرەيتويى قارساڭىندا ۇيىمداستىرىلعان بۇل ءىس-شاراعا 20 بوكسشى مەن بالۋان جانە 10 باپكەر قاتىستى. ساڭلاق سپورتشىلار اراسىندا ازيا چەمپيوناتىنىڭ جۇلدەگەرلەرى ەلميرا سىزدىقوۆا، ەرۇلان ىسقاقوۆ، اندرەي ساموحين سىندى بالۋاندار، جاستار اراسىنداعى الەم چەمپيونى سابىرجان اقحالىقوۆ، ازيا چەمپيونى ميلانا سافرونوۆا، الەم چەمپيوناتىنىڭ جۇلدەگەرلەرى جاسمين قيزاتوۆا، رۇستەم شاۋمەنوۆ سياقتى بوكسشىلار جانە باسقا دا شەبەر سپورتشىلار بولدى. سونداي-اق، اكىممەن بولعان كەزدەسۋگە وبلىستىق دەنە شىنىقتىرۋ جانە سپورت باسقارماسىنىڭ باسشىسى تەمىرحان ابىلاەۆ، ءا.مولداعۇلوۆا اتىنداعى وليمپيادالىق رەزەرۆتىڭ وبلىستىق مامانداندىرىلعان مەكتەپ-ينتەرنات-كوللەدجىنىڭ ديرەكتورى ەردەن حاليلين جانە سپورت مەكتەپتەرى مەن فەدەراتسيالاردىڭ باسشىلارى دا قاتىستى.

وبلىس اكىمى قاراعاندى وبلىسىنىڭ ەل سپورتىنىڭ داڭقىن حالىقارالىق ارەنالاردا پاش ەتىپ جۇرگەن ساڭلاق اتلەتتەردى دايارلاۋ جاعىنان مەكتەبى مىقتى كوشباسى ءوڭىر سانالاتىنىن اتاپ ءوتتى.

– ءبىزدىڭ وبلىستان شىققان سپورتشىلاردىڭ ەسىمدەرى قازاقستاننان تىس جەرلەردە دە تانىمال. تاۋەلسىزدىك جىلدارىندا جەتى بىردەي سپورتشىمىز الەمدىك جارىستاردىڭ جەڭىمپازدارى – وليمپيادا چەمپيوندارى مەن جۇلدەگەرلەرى اتاندى. ەڭ ءبىرىنشى كەزەكتە، ۋاقىتپەن ساناسپاي، شاكىرتتەرىن سان قىرلى شەبەر ەتىپ دايارلاپ شىعارعان باپكەرلەرگە ەرەن ەڭبەكتەرى ءۇشىن العىس ايتقىم كەلەدى، – دەدى ج.قاسىمبەك.

وبلىس اكىمىنىڭ ماراپاتىن العاشقىلاردىڭ ءبىرى بولىپ بوكستان ۇلتتىق قۇرامانىڭ كاپيتانى، الەم چەمپيوناتىنىڭ ءۇش مارتە قولا جۇلدەگەرى ابىلايحان ءجۇسىپوۆ الدى. تالانتتى بوكسشى الداعى ءدۇبىرلى دودالاردا قاراعاندى وبلىسىنىڭ نامىسىن قولدان بەرمەۋ جولىندا ايانىپ قالمايتىندىقتارىن مالىمدەدى.ك

كەزدەسۋگە قاتىسقان وبلىس اكىمىنىڭ ءبىرىنشى ورىنباسارى، وبلىستىق گرەك-ريم، ەركىن جانە ايەلدەر كۇرەسى مەن بوكس فەدەراتسياسىنىڭ پرەزيدەنتى اسىلبەك دۇيسەباەۆ تاۋەلسىزدىك جىلدارى ءوڭىر سپورتشىلارىنىڭ ۇنەمى جۇلدەلى ورىندارعا يە بولىپ جۇرگەنىن ماقتانىشپەن اتاپ ءوتتى.

– بۇگىندە بوكس نەمەسە كۇرەستەن وتكەن بىردە-ءبىر ءىرى حالىقارالىق جارىستى قاراعاندى سپورتشىلارىنسىز كوز الدىمىزعا ەلەستەتە المايمىز. ءبىزدىڭ مىندەتىمىز – بۇل دەڭگەيدى ساقتاۋ عانا ەمەس، ونى ءارى قاراي ارتتىرىپ، دامىتا بەرۋ. وبلىسىمىزدا كۇرەس پەن بوكسقا قاشاندا كوڭىل ايرىقشا بولىنگەن، ءبولىنىپ كەلەدى جانە الداعى ۋاقىتتا دا بولىنە بەرەتىن بولادى، – دەدى ا.دۇيسەباەۆ.

قاراعاندى وبلىسىندا سپورتتىڭ بوكس جانە كۇرەس تۇرلەرى جۇيەلى تۇردە دامىپ كەلەدى دەپ سەنىممەن ايتۋعا بولادى. قازىرگى تاڭدا وڭىردە ءۇش مىڭنان استام سپورتشى بوكسپەن اينالىسادى. ونىڭ ىشىندە 21 بىلعارى قولعاپ شەبەرى  ۇلتتىق قۇراما كوماندانىڭ ساپىندا ونەر كورسەتىپ ءجۇر. ءاليا مولداعۇلوۆا اتىنداعى وليمپيادالىق رەزەرۆتىڭ وبلىستىق مامانداندىرىلعان مەكتەپ-ينتەرنات-كوللەدجىندە جانە جوعارى سپورت شەبەرلىگى مەكتەبىندە دايىندالاتىن چەمپيونداردىڭ شەبەرلىگىن 88 جاتتىقتىرۋشى-وقىتۋشى ۇشتايدى.

ال وبلىستا كۇرەس تۇرلەرىمەن 82 جاتتىقتىرۋشىنىڭ قاراماعىندا 2 600 اتلەت تۇراقتى اينالىسادى. بۇلاردىڭ اراسىنداعى 48 بالۋان ۇلتتىق قۇراما كومانداعا مۇشە بولىپ كىرگەن.

كەزدەسۋدىڭ سوڭىنا تامان جەڭىس قاسىمبەك پەن سپورتشىلار اراسىندا بەيرەسمي تۇرعىداعى ەمىن-ەركىن اڭگىمە ءوربىدى. جەڭىمپازدار مەن جۇلدەگەرلەر وبلىس باسشىسىنا وزدەرىن قىزىقتىرعان سۇراقتاردى قويدى، الداعى جوسپارلارىمەن ءبولىستى.

 

سوڭعى جاڭالىقتار

اينالما جولدىڭ ازابى

ايماقتار • كەشە

ۇقساس جاڭالىقتار