كينو • 19 قاراشا، 2021

الماتىدا IX حالىقارالىق «باستاۋ» كينوفەستيۆالى وتەدى

110 رەت كورسەتىلدى

30 قاراشا مەن 4 جەلتوقسان ارالىعىندا الماتىدا IX حالىقارالىق «باستاۋ» ستۋدەنتتىك جانە دەبيۋتتىك فيلمدەر كينوفەستيۆالى وتەدى، دەپ حابارلايدى Egemen.kz.

جىل سايىن وتەتىن كينو مەرەكەسىن الماتى قالاسى اكىمدىگىنىڭ، ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ، تۇران ۋنيۆەرسيتەتىنىڭ، ۇلتتىق كينونى قولداۋ مەملەكەتتىك ورتالىعىنىڭ جانە ش.ايمانوۆ اتىنداعى «قازاقفيلم» كينوستۋدياسىنىڭ قولداۋىمەن «Tanaris Production» كينوكومپانياسى ۇيىمداستىرادى.

فەستيۆالدىڭ نەگىزگى ماقساتى – ەۋروپا مەن ازيانىڭ جاس كينەماتوگرافيستەرى اراسىندا ىنتىماقتاستىق ورناتۋ، ولاردىڭ جۇمىستارىن قولداۋ جانە ىلگەرىلەتۋ، ءتۇرلى جانرداعى كينوفيلمدەردى جاساۋعا دەگەن قىزىعۋشىلىقتى ارتتىرۋ.

«باستاۋ» كينوفەستيۆالى - جاس رەجيسسەرلەر مەن ستسەناريستەرگە ءوز جوبالارىن ىسكە اسىرۋ ءۇشىن بىرەگەي الاڭ. كينوفەستيۆالدىڭ كونكۋرستىق باعدارلاماسى 3 بولىمنەن تۇرادى:

  • تولىقمەتراجدى فيلمدەر بايقاۋى - Bastau DEBUTS،
  • قىسقامەتراجدى فيلمدەر بايقاۋى - Bastau SHORTS،
  • دەرەكتى فيلمدەر بايقاۋى - Bastau DOCS.

فەستيۆال داۋرەن قامشىباەۆتىڭ بايقاۋدان تىس كورسەتىلەتىن دەبيۋتتىك كارتيناسى – «زەرە» ءفيلمىنىڭ ۇلتتىق پرەمەراسىمەن اشىلادى. بۇعان دەيىن بۇل فيلم تەك برازيلياداعى São Paulo International Film Festival حالىقارالىق كينوفەستيۆالىنە قاتىسقان. كارتينادا باستى رولدەردە تانىمال جۇلدىزدار بەرىك ايتجانوۆ، مۇرات بيسەنبين، ادينا باجان جانە ولگا لاندينا وينايدى.

سونداي-اق، كونكۋرستان تىس ايجان قاسىمبەكتىڭ «وت» كارتيناسى كورسەتىلەدى. ءفيلمنىڭ الەمدىك پرەمەراسى جاقىندا عانا پۋسانداعى (وڭتۇستىك كورەيا) حالىقارالىق كينوفەستيۆالدە ءوتتى. سونىمەن قاتار، بيىل فيلم گەرمانياداعى Film Festival Cottbus جانە سينگاپۋرداعى Singapore International Film Festival كينوفەستيۆالدەرىنە قاتىستى. ال باستى ءرولدى سومداعان تولەپبەرگەن بايساقالوۆ سوچيدەگى X Russian British Sochi international film festival & Awards 2021 كينوفەستيۆالىندە جانە لوس-اندجەلەستەگى Asian World Film Festival كينوفەستيۆالىندە ەكى بىردەي ماراپاتتى جەڭىپ الدى.

سونىمەن قاتار، بايقاۋدان تىس ءادىلحان ەرجانوۆتىڭ جاڭا ءفيلمى، «ەۋرازيا پاتشايىمدارى» دەرەكتى ءفيلمى جانە سامات نۇراليەۆتىڭ «مۋلتيفرۋكتى» انيماتسيالىق كارتيناسى كورسەتىلەدى.

بولەك باعدارلامالار شەڭبەرىندە: Bastau FOCUS – اۋعانستاندا شىعارىلعان فيلمدەر، AROUND THE WORLD - ءىرى حالىقارالىق كينوفەستيۆالدەردىڭ جۇلدەگەرلەرى جانە BASTAU CENTRAL ASIA - ورتالىق ازيا ەلدەرىنىڭ جاڭا فيلمدەرى ۇسىنىلادى.

اشىلۋ سالتاناتى 30 قاراشا كۇنى اباي اتىنداعى قازاق ۇلتتىق وپەرا جانە بالەت تەاترىندا وتەدى. فەستيۆالدىڭ نەگىزگى الاڭى - Chaplin Cinemas كينوتەاترلار جەلىسى.

«باستاۋ» IX حالىقارالىق ستۋدەنتتىك جانە دەبيۋتتىك فيلمدەر كينوفەستيۆالىنىڭ كەستەسىن -  https://bastauiff.com/ سايتىنان كورە الاسىزدار.

4

سوڭعى جاڭالىقتار

ۇقساس جاڭالىقتار