ەكولوگيا • 19 قاراشا, 2021

بالقاش كولى ارالدىڭ كەبىن كيۋى مۇمكىن

1853 رەت

كورسەتىلدى

2 مين

وقۋ ءۇشىن

بالقاش دەڭگەيى 2040 جىلعا دەيىن ايتارلىقتاي تايازدانۋى مۇمكىن. مۇنداي بولجامدى قر ەكولوگيا, گەولوگيا جانە تابيعي رەسۋرستار مينيسترلىگى ماماندارى ايتىپ وتىر, دەپ حابارلايدى Egemen.kz.

گاۋھار قاپاش

ۆەدومستۆو قىتايداعى سۋ قابىلداعىشتاردى ەسكەرە وتىرىپ, كول دەڭگەيىن مودەلدەۋ جۇرگىزگەن. ناتيجەلەر بالقاش كولىنىڭ دەڭگەيى 341 مەتر سىني بەلگىدەن تومەن تۇسەتىنىن كورسەتكەن.

«بالقاش كولىنىڭ تايازدانۋىنان جاعىمسىز سالدارلار بولۋى مۇمكىن: سۋلى-باتپاقتى القاپتاردىڭ قۇرعاۋى جانە جويىلۋى; جابايى جانۋارلاردىڭ قونىس اۋدارۋ جولدارىنىڭ جويىلۋى, اسىرەسە سۋ ماڭىنداعى جانۋارلاردىڭ (ۇيرەكتەر مەن قازدار) قونىس اۋدارۋىنىڭ وزگەرۋى, بۇل ولاردىڭ تاريحي كوشى-قون باعىتتارىن وزگەرتەدى; كليماتتىڭ وزگەرۋى; ايماقتىڭ فلوراسى مەن فاۋناسىنىڭ جوعالۋى; بۇكىل كول جۇيەسىنىڭ جويىلۋى; بالقاش كولىنىڭ باتىس تۇششى بولىگىنىڭ تۇزدانۋى جاڭا جەرلەردە ءومىر سۇرەتىن بالىقتاردىڭ كوپتەگەن ءتۇرىنىڭ جويىلۋىنا اكەلۋى مۇمكىن», دەپ ەسكەرتتى ەكولوگيا, گەولوگيا جانە تابيعي رەسۋرستار مينيسترلىگى ماماندارى.

مۇنىڭ ءبارى جانۋارلاردىڭ جويىلۋ قاۋپىنە اينالۋى مۇمكىن. ماسەلەن, بالقاش وڭىرىندە قۇستاردىڭ 120 ءتۇرى مەكەندەيدى, ونىڭ 12 ءتۇرى قىزىل كىتاپقا ەنگىزىلگەن. مۇندا جولبارىستى رەينترودۋكتسيالاۋ دا جوسپارلانعان. سونداي-اق, اۋىل شارۋاشىلىعىن سۋمەن قامتاماسىز ەتۋ ماسەلەسى ۋشىعۋى مۇمكىن.

«ماسەلەگە بايلانىستى باسقارما بالقاش كولىن ساقتاۋ جوسپارىن بەكىتتى. سۋارمالى سۋمەن قامتاماسىز ەتۋ ءۇشىن «قازۆودحوز»ماماندارى ۇلكەن جۇمىستار اتقارىپ جاتىر. شەڭگەلدى ءماسسيۆىن اۋىز سۋمەن جانە سۋارمالى سۋمەن قامتاماسىز ەتۋ ءۇشىن قوسىمشا سۋ قۇبىرى تارتىلدى, ۇزىندىعى 1,5 شاقىرىم كانال-قۇبىر سالىندى. سونداي-اق, ىلە اتىراۋىنداعى سۋدى تۇتىنۋ كولەمىن جىلىنا 1 كيلومەتر تەكشەگە دەيىن ازايتۋ ءۇشىن ىلەنىڭ تومەنگى اعىسىندا سۋ ەلەكتر ستانتسياسىنان شامامەن 25 شاقىرىم قاشىقتا «كەربۇلاق» قۇرىلىسى سالىنادى. سىيىمدىلىعى 100 ميلليون تەكشە مەتردەن اسپايتىن قارسى رەتتەۋشى سۋ قويماسى نەگىزىنەن وزەن ارناسىندا ورنالاسادى. كەربۇلاق قارسى رەتتەگىشى سالىنعاننان كەيىن وزەن ساعاسىن اباتتاندىرۋ بويىنشا سۋارۋ جانە درەناج جۇمىستارىن جۇرگىزۋ مۇمكىن بولادى, بۇل ونى ارنالىق فازادا ۇستاپ تۇرۋعا جانە ونىڭ سۋ تۇتىنۋ كولەمىن جىلىنا 1 تەكشە شاقىرىمعا دەيىن ازايتۋعا مۇمكىندىك بەرەدى», دەدى مينيسترلىك ماماندارى.