ۇسىنىمى مول جارمەڭكە

وسى جولعى ءداستۇرلى جارمەڭكە تاۋەلسىزدىك الاڭىندا وتكىزىلدى. مۇندا زەرەندى, ساندىقتاۋ جانە اقكول اۋداندارىنىڭ وكىلدەرى اۋىل شارۋاشىلىعى ونىمدەرىنىڭ تۇرلەرىن كەڭىنەن ۇسىندى. – ءبىزدىڭ تاۋار وندىرۋشىلەرىمىز 38 ساۋدا نۇكتەسىندە جۇمىس ىستەپ جاتىر, – دەيدى زەرەندى اۋدانىنىڭ اكىمى ەربول ساعديەۆ. – جەرگىلىكتى شارۋا قوجالىقتارى مەن جاۋاپ­كەرشىلىگى شەكتەۋلى سەرىكتەستىكتەر ءونىمنىڭ جۇزگە جۋىق ءتۇرىن ساۋدا ءسو­رەسىنە قويىپ وتىر. اسىرەسە, ۆيك­توروۆ اۋىلىنىڭ بالىنا, يسا­كوۆ­كانىڭ جەمىس قايناتپالارىنا, ءوسىم­دىك مايىنا سۇرانىس كوپ. ەت, ءسۇت جانە نان ونىمدەرىمىزبەن قاتار التى اۆتوكولىككە تيەلگەن جەمشوپ پەن قۇراما ازىقتىڭ زاماتتا ءوتىپ كەتۋى قالالىقتاردىڭ دا  ءوز اۋلا­سىندا مال وسىرۋگە دەن قويعانىن اڭعارتادى. مۇنى قولداۋ قاجەت. وبلىستىق اۋىل شارۋاشىلىعى باسقارماسى باستىعىنىڭ ورىن­باسارى بەكبولات ەلبەرگەنوۆتىڭ ايتۋىنشا, رەسمي بەكىتىلگەن اۋدان­داردان باسقا ايماقتاردىڭ ونىمدەرى دە كوپتەپ ساتىلۋدا. بۇل ەلىمىزدەگى مولشىلىق پەن بايلىقتى كورسە­تەدى. بۋراباي اۋدانىنداعى “ەسىل-اگرو” جشس, “بۋراباي قۇس” جانە ەڭبەكشىلدەر اۋدانىنداعى “قاز گەر قۇس” فابريكالارى, كوكشەتاۋ قالاسىنىڭ جەتەكشى كاسىپورىندارى داستارحان ءمازىرىمىزدى كوركەيتۋگە ارەكەت جاساعانى كورىنىپ تۇر. مۇن­داعى باعا دا بازارلار مەن دۇكەن­دەرگە قاراعاندا اناعۇرلىم ارزان. جۇرتشىلىق كوڭىلىنەن شىققان جارمەڭكەگە قاتىسۋشىلاردى وبلىس اكىمى سەرگەي دياچەنكو قۇتتىقتادى. باقبەرگەن امالبەك. كوكشەتاۋ قالاسى.