«قاراعاندى-ارەنادا» وتكەن كەزدەسۋدە «كەنشىلەر» كومانداسى قارسىلاستارىنىڭ قاقپاسىنا جاۋاپسىز بەس شايبا سوقتى. ءبىرىنشى كەزەڭنىڭ 30-سەكۋندىندا ميحايل راحمانوۆتىڭ پاسىنان كەيىن ستەپان گريمزين ماتچتىڭ ەسەبىن اشسا, 15-مينۋتتا نيكيتا انوحين تابلوداعى كورسەتكىشتى 2:0-گە جەتكىزدى. ءبىرىنشى كەزەڭنىڭ اياقتالۋىنا بەس سەكۋند قالعاندا ميحايل راحمانوۆ ەندى نيكيتا انوحوۆسكيگە گول سوعاتىن تاماشا مۇمكىندىك جاساپ بەردى – 3:0.
ۇزىلىستەن كەيىن دە ايدىن يەلەرى قارقىنىن باسەڭدەتكەن جوق. 35-مينۋتتا بىلتىر «بارىس» ساپىندا قحل-دا ونەر كورسەتكەن سايان دانيار مەرگەندىگىمەن كوزگە تۇسسە, ءۇشىنشى كەزەڭنىڭ ورتا تۇسىندا ءدال سول س.دانيار ءدۋبلدىڭ اۆتورى اتانىپ, ويىننىڭ نۇكتەسىن قويدى. قورىتىندى ەسەپ – 5:0.
«سارىارقا» بۇل جەڭىسىنەن كەيىن تۋرنير كەستەسىندە 30 ۇپايمەن كوش باستاعان ەدى. الايدا كۇنى كەشە كوكشەتاۋدىڭ «ارلانى» سىرت ايدىندا «تەمىرتاۋدى» بۋلليت سەرياسىندا 4:3 ەسەبىمەن جەڭىپ, «كەنشىلەر» كومانداسىن ەكىنشى ورىنعا ىعىستىردى. ال وسكەمەننىڭ «تورپەدوسى» التىنشى ورىنعا ءتۇسىپ قالدى.
